މިއަދު ޖަޕާނުގެ ޓޯކިޔޯގައި ފަށާ އޮލިމްޕިކްސްގެ ހުޅުވުމުގެ ރަސްމިއްޔާތުގައި ރާއްޖޭގެ ދިދަ އުފުލުމުގެ ޝަރަފް ބެޑްމިންޓަން ކުޅުންތެރިޔާ ފާތިމަތު ނަބާހާ (ނަބާ) އާއި ފެތުންތެރިޔާ މުބާލް އައްޒާމަށް ލިބިއްޖެއެވެ.
ދިދަ އުފުލުމުގެ ޝަރަފް ލިބުނު ނަބާހާ އަކީ ރާއްޖޭގެ ތާރީހުގައި އޮލިމްޕިކްސްގައި ވާދަކުރާނެ ފުރަތަމަ އަންހެން ކުޅުންތެރިޔާ އެވެ. މީގެ ކުރިން އޮލިމްޕިކްސްގައި ވާދަކުރި ރާއްޖޭގެ ހަމައެކަނި ބެޑްމިންޓަން ކުޅުންތެރިއަކީ 2012 ވަނަ އަހަރުގެ އޮލިމްޕިކްސްގައި ވާދަކުރި މުހައްމަދު އަޖުފާން އެވެ. ދިދަ އުފުލާނެ ކުޅުންތެރިން ކަނޑައަޅާ އިއްޔެ ދިދަ ހަވާލުކުރުމުގެ ރަސްމިއްޔާތު ކުރިއަށް ގެންދިޔައީ ޖަޕާނުގައެވެ.
މި ދެ ކުޅުންތެރިންނާ ދިދަ ހަވާލުކުރީ މޯލްޑިވްސް އޮލިމްޕިކް ކޮމިޓީގެ ރައީސް މުހައްމަދު އަބްދުއްސައްތާރާއި އޮލިމްޕިކްސްގައި ރާއްޖޭން ވާދަކުރާ ކޮންޓިންޖެންޓުގެ ޗެފް ޑި މިޝަނަރަށް އެތުލެޓިކްސް އެސޯސިއޭޝަން އޮފް މޯލްޑިވްސް (އޭއޭއެމް)ގެ ޖެނެރަލް ސެކްރެޓަރީ އަހުމަދު މުންތަގިމް (މުންތޭ) އެވެ. އަދި މި އިވެންޓްގައި އޮލިމްޕިިކް ކޮމިޓީގެ ސެކްރެޓަރީ ޖެނެރަލް ތަމޫހު އަހުމަދު ސައީދު (ތަމޫ) އާއި ރާއްޖޭގެ ކޮންޓިންޖެންޓްގައި ހިމެނޭ އެހެން މެމްބަރުން ބައިވެރިވިއެވެ.
މި ފަހަރުގެ އޮލިމްޕިކްސްގައި ރާއްޖޭން ވާދަކުރަނީ ތިން ކުޅިވަރަކުން ހަތަރު އެތުލީޓުންނެވެ. އެއީ ފެތުމުން މުބާލާއި އައިޝަތު ސާޖިނާ އަދި ބެޑްމިންޓަން އިން ނަބާހާ އަދި ދުވުމުން ރާއްޖޭގެ އެންމެ ބާރު ދުވުންތެރިޔާ ހަސަން ސާއިދުއެވެ.
ކޮމެންޓު ފޮނުވާ