ރިޗާލިސަންގެ ހެޓްރިކާއިއެކު ބްރެޒިލް ފުރަތަމަ މެޗު ކާމިޔާބުކޮށްފި

މިހާރު ކުރިޔައްދާ ޓޯކިޔޯ އޮލިންޕިކްސް ފިރިހެނުންގެ ފުޓްބޯޅަ އިވެންޓުގައި ބްރެޒިލް ކުޅުނު ފުރަތަމަ މެޗުން މޮޅުވެއްޖެއެވެ.

ގްރޫޕް ޑީގައި ކުޅުނު ފުރަތަމަ މެޗުން ބްރެޒިލް މޮޅުވީ ޖަރުމަން އަތުން 4-2 ލަަނޑުންނެވެ. ޓޯކިއޯގެ ނިސާން ސްޓޭޑިއަމުގައި ކުޅުނު މި މެޗުގެ 30 މިނެޓު ހަމަވިއިރު، ބްރެޒިލުގެ ރިޗާލިސަން ވަނީ ހެޓްރިކެއް ހަދާފައެވެ. އެކަމަކު ދެވަނަ ހާފުގައި ޖަރުމަނުން އެ ޓީމުގެ ކުޅުން ރަނގަޅުކުރިއިރު، 57 ވަނަ މިނެޓުގައި ނަދީމް އަމީރީ ވަނީ އެ ޓީމުގެ ފުރަތަމަ ލަނޑު ޖަހާފައެވެ.

މެޗުގެ 84 ވަނަ މިނެޓުގައި ރަގްނާ އަކޭ ވަނީ ލަނޑެއް ޖަހައި، ޖަރުމަނަށް ފަރަގު ކުޑަކޮށްދީފައެވެ.މި މެޗުގައި ބްރެޒިލުން އަލުން ލީޑު ފުޅާކޮށްފައިވަނީ މެޗުގެ އިތުރު ވަގުތުގައެވެ. މި ލަނޑު އެ ޓީމަށް ކާމިޔާބުކޮށްދިނީ ޕައުލީނިއޯއެވެ.