މިހާރު ވެރިކަން ކުރަމުންދާ ކޯލިޝަން ރުހޭހާ ގޮތަކަށް ކަންކަން ކުރާނަމަ އެމްޑީޕީއަށް ދެން ވާނީ ގެއްލުން ކަމުގައި ވެރިކަން ކުރާ ކޯލިޝަންގެ މައި ޕާޓީގެ ރައީސް މުހައްމަދު ނަޝީދު ވިދާޅުވެއްޖެއެވެ.

ބޭސްފަރުވާއަށް އިނގިރޭސި ވިލާތުގައި މިވަގުތު ހުންނެވި ރައީސް ނަޝީދު ގެންދަވަނީ ސަރުކާރަށް ތައީދު ނުކުރާކަން މުޅިދުނިޔެއަށް ހާމަކުރައްވަމުންނެވެ. އަދި ރައީސް ޞާލިހަކީވެސް ހަރުކަށި ފިކުރުގެ ބޭފުޅުން ރުހުން ހޯއްދަވާ ބޭފުޅެއްކަމަށް ވިދާޅުވެ ރައީސް ޞާލިހަށްވެސް ނަޝީދު ގެންދަވަނީ ފާޑުވިދާޅުވަމުންނެވެ. ނަޝީދުގެ އެންމެ ބޮޑު ނުރުހުމެއް އޮތީ ކޯލިޝަންގެ ތެރެއިން އަދާލަތު ޕާޓީއަށެވެ.

އެމްޑީޕީގެ ގިނަ މެމްބަރުންނާއި، އާންމުން ހިމެނޭ ވަޓްސް އަޕް ގްރޭޕަކަށް މިއަދު ނަޝީދު ލިޔުއްވި މެސެޖުގައި ވިދާޅުވީ ސަރުކާރުން އެމްޑީޕީގެ ސިޔާސަތު ދޫކޮށް ވެރިކަން ކުރާ ކޯލިޝަންގެ ސިޔާސަތުގައި ހިފައިގެން ކުރިއަށްދާނަމަ، އެމްޑީޕީއަށް ލިބޭނެ އެއްވެސް ފައިދާއެއް ނެތްކަމަށެވެ. މިކަމުގެ ގެއްލުން ކުރިއަށް އޮތް އިންތިޚާބުތަކުގައިވެސް އެމްޑީޕީއަށް ކުރާނެކަމަށް ރައީސް ނަޝީދު ވަނީ ވިދާޅުވެފައެވެ.

ސަރުކާރުގެ ނިންމުން ތަކުގެ ސަބަބުން އެމްޑީޕީގެ މެމްބަރުންގެ ތާއީދު ގެއްލި، ޕާޓީ ބަލިކަށި ވުމުން، ކުރިއަށް އޮތް އިންތިޚާބުތަކުގައި، ލިބޭނެ ގެއްލުން ވަރަށް ބޮޑުވާނެކަމަށް އަޅުގަނޑު ދެކެނީ. ސަރުކާރުން އެމްޑީޕީގެ ސިޔާސަތު ދޫކޮށް، އިއްތިހާދުގެ ބައިވެރިން ހިތްހަމަ ޖައްސަން އުޅެފިނަމަ އެއީ ޕާޓީއަށް ވަރަށް ބޮޑު ދެރައެއް.

– ރައީސް ނަޝީދު ވިދާޅުވިއެވެ.

ސަރުކާރުގެ ފަރާތުން މަޖިލީހަށް ހުށަހަޅާފައިވާ ނަފްރަތުގެ ބިލަށް މިސަރުކާރުން ތާއީދު ނުކުރާނަމަ، މިސަރުކާރަށް ތާއީދު ނުކުރާނެ ކަމަށް ނަޝީދު ވަނީ ވިދާޅުވެފައެވެ. އަދި އިދިކޮޅު ޕީޕީއެމްއާއި އެކު ކޯލިޝަން ހަދައި ގުޅުން ގާއިމް ކުރުމަކީ އެމްޑީޕީއަށް އޮތް އެންމެ ރަނގަޅު ގޮތްކަމަށްވެސް ނަޝީދު ވަނީ ވިދާޅުވެފައެވެ.

ރައީސް ނަޝީދު ވިދާޅުވެފައި ވަނީ، ދީނީ ހަރުކަށި ފިކުރުގެ މީހުންގެ ރުހުން ހޯއްދަވަން ރައީސް މަސައްކަތް ކުރައްވާ ކަމަށެވެ. އެކަން ހުއްޓާލަން ޖެހޭ ކަމަށް ނަޝީދު ވިދާޅުވިއެވެ. ރައީސް ނަޝީދުގެ މި ތުހުމަތަކީ ވެރިކަން ކުރާ ކޯލިޝަންގައި ހިމެނޭ އަދާލަތު ޕާޓީން ބުނާ ބަސްތަކަށް ރައީސް ތާއީދު ކުރައްވާތީ ވިދާޅުވި ވިދާޅުވުމެއްކަމަށް ބެލެވެއެވެ.

މުސްލިމަކާ ދިމާއަށް ކާފަރެކޭ ބުނުން ކުށަކަށް ހަދަން ސަރުކާރުގެ ފަރާތުން ތުޅާދޫ ދާއިރާގެ މެމްބަރު ހިސާން ހުސައިން ގާނޫނުލްއުގޫބާތަށް އިސްލާހު ގެނައުމަށް ހުށަހަޅާފައިވާ ހިސާން ބިލު މަޖިލީހުގެ ނިމިގެންދިޔަ ދައުރުގެ ތެރޭގައި ފާސްކުރުމަށް މަސައްކަތްކުރި ނަމަވެސް ސަރުކާރުން މިބިލް އަލުން ކޮމެޓީއަށް ފޮނުވައިގެން ގިނަ އިސްލާހުތަކެއް ގެނައުމަށް ބޭނުންވުމުން ބިލު ވަނީ އަލުން ކޮމެޓީއަކަށް ފޮނުވާފައެވެ. މިބިލުގެ މައްސަލާގައި އެމްޑީޕީގެ މެމްބަރުންގެ މެދުގައި ދަނީ ހޫނު ބަހުގެ ހަމަލާތައް ބަދަލުކުރަމުންނެވެ. އަދި މިބިލާއިކު މަޖިލީހުގައި ރައީސް ނަޝީދަށް ތާއީދު ކުރާ މެމްބަރުންނާއި، ރައީސް ޞާލިހަށް ތާއީދު ކުރާ މެމްބަރުން ވަނީ ވަރަށް ބޮޑަށް ސާފުވެފައެވެ.