ރާއްޖޭގެ ރިސޯޓެއްގެ ސްވިމިން ޕޫލަކަށް އެރި އުޅުނު ކުއްޖަކު މަރުވެއްޖެއެވެ.
ފުލުހުންގެ މީޑިއާ އޮފިޝަލް ވިދާޅުވީ އެ ހާދިސާ ފުލުހުންނަށް ރިޕޯޓްކޮށްފައިވަނީ ރޭ 7:56 ގައި ކަމަށެވެ. ކުޑަކުއްޖާ މަރުވީ އާއިލާއާއެކު ޕޫލުގައި އުޅެނިކޮށް ދިމާވި ކަމެއްގެ ސަބަބުން ކަމަށް ފުލުހުން މައުލޫމާތު ދީފައިވެއެވެ. އެކަމަކު އޭގެ އިތުރު ތަފްސީލް ހިއްސާކޮށްފައެއް ނުވެއެވެ. މިހާދިސާ ހިނގީ ދ. މީދޫ ދާއިރާގެ މެމްބަރު އަހުމަދު ސިޔާމް މުހައްމަދުގެ ވިލު ރީފް ރިސޯޓްގަ އެވެ.
އެ ހާދިސާގައި މަރުވީ ރަޝިއާއަށް ނިސްބަތްވާ ފަސް އަހަރުގެ ފިރިހެން ކުއްޖެކެވެ. އޭނާ މަރުވީ ގެބިގެން ކަމަށް ވެސް އެނގިފައި ވެއެވެ. ނަމަވެސް ފުލުހުން އެކަން ކަށަވަރެއް ނުކޮށްދެއެވެ.
ފުލުހުން އިތުރަށް ބުނީ ކުއްޖާއަށް އިތުރު ފަރުވާ ދިނުމަށް ފ. ނިލަންދޫ ސިއްހީ މަރުކަޒަށް ގެނައި އިރުވެސް އޮތީ މަރުވެފައި ކަމަށެވެ.
