ﷲ ތަޢާލާ ފިޔަވާ އެހެން އެއްވެސް ފަރާތަކުން ވާތްގަކަށްވެސް، މަދަދުވެރި ކަމަށްކަަށް ވެސް ނޭދުމަށާއި، ހަމައެކަނި ﷲއަށް އަޅުކަން ކުރުމަށް، މައްކާގެ ހަރަމްގެ އިމާމު، ސައުދީ އަރަބިއާގެ ޝެއިޚް ބަންދަރު ބިން އަބުދުލް އަޒީޒު ބަލީލާ މުސްލިމް އުއްމަތަށް ގޮވާ ލައްވައިފިއެވެ.
މިއަދު ހައްޖު ޚުތުބާ ދެއްވަމުން ޝެއިޚް ބަންދަރު ބިން އަބުދުލް އަޒީޒު ބަލީލާ ވިދާޅުވެފައިވަނީ، އަޅުކަން ކުރުން ހައްޤުވެގެންވަނީ ހަމަ އެކަނި ﷲ ސުބުޙާނަހޫ ވަތަޢާލާއަށް ކަމަށާއި، އަދި އެންމެހާ މުސްލިމުންވެސް ރަސޫލާ ގެނެސްދެއްވި ރިސާލަތުގައި ހިފެހެއްޓުމަށް ގޮވާލެއްވިއެވެ.
މިއަދު މައްކާގައި މެންދުރު ވުމުގެ ކުރިން، މަސްޖިދުއްނަމިރާގައި ހުންނަވާއިގެން، ޝޭއިޚް ބިލާލާ ދެއްވި އަރަފާތު ޚުތުބާ މައިގަޑު ގޮތެއްގައި ބިނާ ކުރައްވާފައިވަނީ، "އިހުސާން" ނުވަތަ އިންސާނިއްޔަތު ކަމުގެ މައްޗަށެވެ.
މުޅި ދުނިޔެއަށް ފެތުރެމުންދާ ކޯވިޑް19ގެ ނުރައްކަލުގެ ސަބަބުން ސައުދީ ސަރުކާރުން މިއަހަރު ހައްޖުވުމުގެ ފުރުސަތު ދީފައިވަނީ 60،000 މީހުންނަށެވެ. އެއީވެސް ސައުދީ އަރަބިއާގައި ދިރި އުޅެމުންދާ މީހުންގެ ތެރެއިން ވެކްސިންގެ ދެ ޑޯޒް ފުރިހަމަ ކޮށްފައިވާ، ނޭވާލާ ނިޒާމުގެ އެއްވެސް މައްސަލައެއް ނެތް، އުމުރުން 18 އަހަރާއި 65 އަހަރާ ދެމެދުގެ މީހުންނަށް އެކަންޏެެވެ.
ހައްޖު ޚުތުބާގައި ޝޭއިޚް ބިލާލާ ވިދާޅުވި، ﷲ ސުބުހާނަހޫ ވަތަޢާލާ އެއްވެސް އިންސާނެއްގެ ބުރަ މަސައްކަތް ބޭކާރު ވިޔަ ނުދެއްވާނޭ ކަމަށެވެ.
"އިޙުސާންތެރި ކަމުގެ އެންމެ މިހިންމު ބަޔަކީ ތައުޙީދު (ޙައްގު ގޮތުގައި ﷲއަށް އަޅުކަން ކުރުން). އިޙުސާންގެ އަނެއް ބަޔަކީ، ދަތި އުދަގޫ ވަގުތުތަކުގައިވެސް އިޙުސާންތެރި ވުން، ހިތްތިރި ކަމާއެކު، ﷲގެ މަދަދަށް އެދުން، ކެތްތެރިވުން، ﷲގެ ކިބައިން އުއްމީދު ކަނޑާނުލުން. ނަމާދު ކުރުމަށް ރައްކާތެރިވޭ. ﷲއަށް އަޅުވަތައިގެން ނަމާދު އަދާކުރޭ، ﷲވަނީ އަނެކުންނަށް އެހީތެރިވުމަށް އަމުރު ކުރައްވާފަ، ޤުރުއާންގައި އަކަލާނގެ ވަނީ އަންގަވާފަ، އެކަނލާގެއަށް ހެޔޮ ގޮތުގައި ސަޖިދަ ކުރާ ކޮންމެ އަޅަކީ އޭގެ ފައިދާ ލިބެނިވި އަޅެއް. ﷲއަށް ބިރުވެތިވޭ، ހެޔޮ ކަން ކަން އިސްކުރޭ، އަދި ހެޔޮ ގޮތުގައި ދެމި ހުރެވޭނީ ޒަކާތް އަދާކޮށްގެން."
މިއަދުގެ ޚުތުބާގައި ޝެއިޚް ބިލާލާ ވިދާޅުވައިވަނީ، ހަމަ ކަށަވަރުންވެސް ﷲ ވޮޑިގެންވަނީ ހެޔޮ ކަންކަން އަދާ ކުރާ އަޅުތަކުންނާ އެކު ކަމަށެވެ.
"ކީރިތި ގުއުއާންގައި ވަނީ، ތިޔަބައި މީހުން ތިޔަބައި މީހުންގެ އަނބިންނަށް ހެޔޮކޮށް ހިތުމަށް އަންގަވާފަ. މި ދުނިޔޭގެ ހަޔާތުގައި ހެޔޮކަންތައް އަދާކުރި މީހަކަށް އާޚިރަތުގައި އޭގެ ސަވާބު ލިބިގެން ދާނެ. ﷲ އަބަދުވެސް ވަނީ އެކަލާގެ އަޅުތަކުންނަށް އިސްލާހު ވުމުގެ ދޮރު ހުޅުއްވާ ދެއްވާފަ."
މިއަދުގެ ހައްޖު ޚުތުބާގައި ޝޭއިޚް ބިލާލާ ވަނީ ކެތްތެރިކަމުގެ މާތްކަމުގެ މަތިންވެސް އިސްލާމީ އުއްމަތް ހަދާން ކޮށްދެއްވާފައެވެ.
"އަނެކުންގެ ފަރާތުން ކުރިމަތިވާ މައްސަލަތަކަށާއި ދަތި އުދަގޫތަކަށް ކެތްތެރި ވެލައްވާ. އަދި ހެޔޮ ކަންކަން އިސްކުރޭ. ހެޔޮ ކަންކަން ކުރުމަށް އިސްވެގަންނަ މީހާ ދެކެ ﷲ ލޯބިވެ ވޮޑިގެންވޭ. ﷲގެ ފަރާތުން ފާފަ ފުއްސެވުން ވަނީ ވަރަށް ކައިރީގަ. ދިރި ހުރުމާއި މަރުގެންނެވުމަކީ އިންސާނާ އިމްތިހާން ކުރުމުގެ ތެރެއިންވާ ކަންކަން."
މިއަދުގެ ޚުތުބާގައި ޝެއިޚް ބިލާލާވަނީ އެންމެހާ ހައްޖާޖީންނަށްވެސް ކާމިޔާބު ހައްޖަކަށް އެދިވަޑައިގެން ދުއާ ކުރައްވާފައެވެ. އަދި ވަނީ، މިއަހަރުގެ ހައްޖުގެ އަޅުކަން އަދާކުރުމުގެ ފުރަސަތު ލިބިގެންދިޔަ ހުރިހާ މުސްލިމުންގެ ދުއާތައްވެސް އިޖާބަ ކުރެއްވުން އެދި ދުއާކުރައްވާފައެވެ. އަދި ހަޢްޖުގެ އަޅުކަމަށް މަގުފަހި ކުރުމަށް ސައުދީ ސަރުކާރުން ކުރައްވަމުން ގެންދަވާ މަސައްކަތްތަކަށް، ސައުދީ ރަސްގެފާނު ކިންގ ސަލްމާން ބިން އަބުދުލް އަޒީޒު އަށާއި އަދި ސައުދީ ވަލީ އަހުދު މުހައްމަދު ބިން ސަލްމާނަށްވެސް ވަނީ ޝުކުރު އަދާ ކުރައްވާފައެވެ.
