ކޯވިޑް19ގެ ނުރައްކަލުން ސަލާމަތްވުމަށް އަޅާފައިވާ ވަރުގަދަ ސިއްޙީ ސަލާމަތީ ފިޔަވަޅުތަކާއެކު، ހުރިހާ ހައްޖުވެރިންވެސް މާސްކު އަޅައިގެން، ގައިދުރުކޮށް އަރާފާތު ބިމުގައި ވަގުތު ހޭދަަ ކުރަމުން އެބަދެއެވެ.
މިއަހަރުގެ ހައްދު ދުވަހު، ހައްޖު ވުމުގެ ފުރުސަތު ސައުދީ އަރަބިއާއިން ހައްޖު ވުމުގެ ފުރުސަތު ދީފައިވަނީ 60،000 ހައްޖުވެރިންނަށެވެ. އަދި މިއީ މުޅި ދުނިޔޭގައި ފެތުރެމުންދާ ކޯވިޑް19ގެ ނުރައްކަލުގެ ސަބަބުން، އަޅާފައިވާ ރައްކާތެރިކަމުގެ ފިޔަވަޅުތަކާއެކު ސައުދީ އަރަބިއާގައި ކުރިޔަށްދާ ދެވަނަ ހައްޖެވެ.
ހައްޖުގެ އަޅުކަމަކީ، އާންމުކޮށް ކޮންމެ އަހަރަކުވެސް ދުނިޔޭގެ އެކި ކަންކޮޅުތަކުން މައްކާއަށް 2.5 މިލިއަން މުސްލިމުން ޒިޔާރަތް ކުރާ އަޅުކަމެކެވެ. އެހެންނަމަވެސް ކޯވިޑް19ގެ ނުރައްކަލުގެ ސަބަބުން މިއަހަރު މައްކާގައި ހައްޖުގެ އަޅުކަން އަދާކުރުމުގެ ފުރުސަތު ލިބިދީފައިވަނީ 60،000 މުސްލިމުންނަށެވެ. އަދި އެއީވެސް ސައުދީ އަރަބިއާގައި ދިރިއުޅެމުންދާ، ކޯވިޑް19 ވެކްސިންގެ ދެ ޑޯޒް ފުރިހަމަ ކޮށްފައިވާ މީހުންނަށް އެކަންޏެވެ.
ފާއިތުވެދިޔަ އަހަރުތަކުގެ، ކޯވިށް19ގެ ކުރިންކުރިން ކޮންމެ އަހަރަކުވެސް ޖުމްލަކޮށް 2.5 މިލިއަން މުސްލިމުން ހައްޖަށް ދާއިރި އަރަފާތު ބިން މިފަހަރު ފެންނަނީ މުޅި ތަފާތު ކޮށްނެނެވެ.
މިގޮތުން އެހެން އަހަރުތަކުގައި ތޮށްޖެހިފައި އޮންނަ އަރަފާތުބިން މިފަހަރު ފެންނަން އޮތީ، ތޮށްޖެހުމެއް ނެތި، ނުހަނު ބޮޑުކޮށް ހުސްޖާގަވެސް އޮތްތަނެއްގެ ގޮތުގައެވެ.
ހައްޖު ދުވަހު، އަރަފާތު ބިމުގައި ހައްޖުވެރިން މެދުރު ނަމާދު ވަގުތު، ދެނަމާދު އެއްކޮށް ކުރުމަށްފަހު، އިރު އޮއްސިއްޖައުމަށް ދާންދެން، ދުޢާ ދެންނެވުމުގައާއި ޒިކުރު ކުރުމުގައި އަރަފާތު ބިމުގައި ދެމިތިބޭނެއެވެ.
އަރަފާތު ބިމުގައި ދުއާ ދެންނެވުމާއި ޒިކުރު ކުރުމުގައި އިރު އޮއްސެންދެން ހޭދަ ކުރުމަށްފަހު، ދެން ހައްޖުވެރިން ދަތުރު ކުރާނީ މުޒްދަލިފާއަށެވެ. އަދި އެއަށްފަހުން ހިލައުކާ، ދެން މައްކާއަށް ދަތުރު ކުރާނެއެވެ.
ސައުދީ ސަރުކާރުން ބުނެފައިވަނީ، އެގައުމުން އުއްމީދު ކުރަނީ ފާއިތުވެދިޔަ އަހަރެކޭ އެއްގޮތަށް މިއަހަރުވެސް ކާމިޔާބު ކަމާއެކު ހައްޖާޖީންނަށް އަޅުކަން ފުރިހަމަ ކުރުމުގެ ފުރުސަތު ލިބިގެންދާނެ ކަމަށެވެ.
މިއަހަރުގެ ހައްޖުގެ އަޅުކަން ފުރިހަމަކުރުމުގެ ފުރުސަތު ސައުދީގައި ދިރިއުޅެމުންދާ، ވެކްސިން ފުރިހަމަ ކޮށްފައިވާ ފަރާތްތަކަށް ދީފައިވާއިރު، ހައްޖަށް މިއަހަރު ދެވޭނީ އުމުރުން 18 އަހަރާއި 65 އަހަރާ ދެމެދުގެ، އަދި އަލަށް ހައްޖުގެ އަަޅުކަން އަދާކުރާ، އަދި ނޭވާލާ ނިޒާމާއި ގުޅުންހުރި ސިއްޙީ އެއްވެސް މައްސަލައެއް ކުރިމަތިވެފައި ނުވާ ފަރާތްތަކަށް އެކަންޏެވެ.
އަދި އަޅުކަން އަދާ ކުރަމުންދާއިރު، ހުރިހާ ވަގުތެއްގައިވެސް ގައިދުރުކަން ބެހެއްޓޭނެކަން ޔަގީން ކުރެވިގެން ދާއިރު، ސެނިޓައިޒް ކުރުމަށްޓަކާ ހުރިހާ ވަގުތެއްގައިވެސް ކައުބާ އެކި ހިސާބުތަކުގައި ރޮބޯޓުތައްވެސް ވަނި ބެހެއްޓިފައެވެ. އަދި ހަރަމްފުޅުގެ ތެރޭގައި ފެން ފޯރުކޮށްދިނުން ފަދަ އެކިއެކި ކަންކަމުގައިވެސް ރޮބޯޓްތަކުގެ ބޭނުން ކުރެވޭނެ އިންތިޒާމްތައްވެސް ވަނީ ގާއިމް ކުރެވިފައެވެ.
