އިނގިރޭސި ޕްރިމިއާ ލީގުގެ މެޗެއްގެ ތެރެއިން ބޮލަށް ސީރިއަސް އަނިޔާއެއް ކުރިމަތިވި ވުލްވަހެމްޓަން (ވުލްވްސް)ގެ މެކްސިކޯ ފޯވާޑް ރައުލް ހިމެނޭޒް، އަށް މަސް ދުވަހުގެ ތެރޭގައި ފުރަތަމަ ފަހަރަށް މެޗެއް ކުޅެފިއެވެ.
މިދިޔަ ނޮވެމްބަރު މަހުގައި އާސެނަލް ދަނޑުގައި ކުޅުނު މެޗުގައި އެ ޓީމުގެ ޑިފެންޑަރު ޑޭވިޑް ލުއިޒް ފުއްމައިގެން އަރައި ބޯޅައިގައި ބޮލުން ޖަހަން އުޅުމުގެ ތެރޭގައި އޭނާ އަށް ޖެހުނީ ހިމެނޭޒް ބޮލުގައެވެ. ހިމެނޭޒަށް ވަގުތުން ދަނޑުމަތީގައި އޮކްސިޖަން ދީގެން ފަރުވާ ދިނުމަށް ފަހު އޭނާ ހޮސްޕިޓަލަށް ގެންގޮސް ޓެސްޓްތަކެއް ކުރިއެވެ. ޕްރީ ސީޒަން ފްރެެންޑްލީ މެޗެއްގައި ހިމެނޭޒް ވަނީ ވުލްވްސް އަށް 30 މިނިޓް ކުޅެދީފައެވެ.
ހިމެނޭޒް، އަލުން ޓްރެއިނިންގައި ބައިވެރިވާން ފެށީ މިދިޔަ މާޗް މަހުގެ ތެރޭގައެވެ. މިދިޔަ މެއި މަހު ހިމެނޭޒަށް އަލުން ކުޅެވޭނެ ކަމަށް ބެލެވުނު ނަމަވެސް އޭނާ އިތުރު ޓެސްޓްތަކެއް ހަދަން މަޑުކުރަން ޖެހުމުންނެެވެ. ހިމެނޭޒް ކުރިއަށް އޮތްތަނުގައި ކުޅޭނީ ބޮލުގައި ހާއްސަ ހެޑްބޭންޑެއް އަޅައިގެންނެވެ. ކުރިން އަނިޔާވިތަނަށް ދެ ވަނަ ފަހަރަށް އަނިޔާވެއްޖެނަމަ ދެން ފުޓްބޯޅަ ނުކުޅެވުމުގެ ބިރު އޮތުމުންނެވެ.
އޮޕަރޭޝަނެއް ކުރުމަށް ފަހު ހިމެނޭޒަށް އަލުން ފުޓްބޯޅަ ކުޅެވިދާނެތޯ ސުވާލު އުފެދުނު ނަމަވެސް ރަނގަޅަށް ރިކަވާވެގެން އޭނާ މި ވަނީ އެނބުރި އައިސްފައެވެ.
ކޮމެންޓު ފޮނުވާ