ރައީސް ސޯލިހުއާއި ރައީސް ނަޝީދުއާއި ދެބޭފުޅުންގެ ދެމެދުގައި އުފެދިފައިވާ ކަމަށް އެތައް ބަޔަކު ބުނަމުންއައި ދެބަސް ވުމާއި، ޚިޔާލު ތަފާތުވުމާއި، ކޯޅުން، "ބުޅާ ގޯނިން ބޭރުވާ ފަަދައިން" އާންމުންނާއި ހަމައަށް މި ކޯޅުންތައް އެންމެ ފަހުން މިވަނީ ފާޅުވެ ތިލަ ވެފައެވެ.
އަދި ތަފާތު އެތަކެއް މައްސަލަތަކުގައި، ދެބޭފުޅުންގެ މެދުގައި އުފެދިފައިވާ ބޮޑެތި ޚިޔާލު ތަފާތުވުންތަކުގެ ހުރިހާ ތަފްސީލެއް ކަހަލަ ގޮތަކަށް، ވަޓްސްއަޕް ގުރޫޕް ތަކުންނާއި، ޓުވިޓާ އަދި އެނޫނަސް ތަފާތު ސޯސަލް މީޑިއާ ޕްލެޓްފޯމްތަކުގެ ބޭނުން ކުރައްވައިގެން ރައީސް ނަޝީދު ގެންދަވަނީ ފާޅު ކުރައްވަމުންނެވެ.
މިގޮތުން ދެބޭފުޅުންގެ މެދުގައި އެތައް ދުވަހެއް ވަންދެން އުފެދިފައިވާ ކަމަށް ބުނާ ދެބަސް ވުންތަކާއި، އަދި ޚިޔާލު ތަފާތުވުންތަކުގެ ތަފްސީލުތައް އެންމެ ފުރަތަމަ ނަޝީދު ބަންޑުން ކޮށްލީ އެމްޑީޕީގެ އިސް ބޭފުޅުންވެސް ހިމެނޭގޮތަށް، އަދި އެނޫނަސް ތަފާތު ފިކުރުގެ އެތައްބަޔަކު ހިމެނޭގޮތަށް "ޖަޒީރާ"ގެ ނަމުގައި ހިންގަމުން އަންނަ އާންމު ވަޓްސްއަޕް ގުރޫޕެއްގައެވެ.
މި ވަޓްސްއަޕް ގުރޫޕުގައި، ފާއިތުވެދިޔަ ހަފްތާގައި، ނަޝީދު ޖަޒްބާތު ބަންޑުން ކޮށްލަމުން ވަނީ، ރައީސް ސޯލިހާއި އެކީ ސިޔާސީ މަސައްކަތެއް ދެން ނުކުރައްވާނެ ކަމަށް ވިދާޅުވެ، ރައީސް ސޯލިހަށް އަމާޒުކޮށް އެތަކެއް ތުހުމަތު ތަކެއްވެސް ކުރައްވާފައެވެ.
މީގެތެރޭގައި، އިސްލާމީ ހަރުކަށި ފިކުރުގެ މީހުންގެ މެދުގައި ރައީސް ސޯލިހު ހުންނެވީ ފިތި ބާރުވެފައި ކަމުގައި ތުހުމަތު ކުރެއްވިއެވެ. އަދި ހަމަ އެއާއެކު، އިސްލާމީ ހަރުކަށި ފިކުރުގެ މީހުން އެމްޑީޕީގައިވެސް ތިބި ކަމަށް ތުހުމަތު ކުރައްވާ، ސަރުކާރުން ނަޝީދު އެދިވަޑައިގަންނަވާ ކަންކަން އިސްލާހު ނުކޮށްފިިނަމަ، ރައީސް ޔާމީނާއެކީ ސިޔާސީ މަސައްކަތް ކުރައްވަން ފައްޓަވާނޭކަމުގެ އިންޒާރުވެސް ނަޝީދު ވަނީ ސަރުކާރަށް ދެއްވާފައެވެ.
އެހެންނަމަވެސް، ނަޝީދުގެ މިއިން އެއްވެސް ޝަކުވާއަކަށް، އަދި އިންޒާރަކަށްވިޔަސް ރައީސް ސޯލިހު މިހާތަނަށް ފާޅުގައި ނުވަތަ ސިއްރުން ނަމަވެސް ޖަވާބެއް ދެއްވާފައެއް ނުވެއެވެ. ހުންނެވީ ހަނުއެވެ.
ސަރުކާރަށް އޮތް ތާއީދު ނަޝީދު އަބުރާ ގެންދެވުން!
ފާއިތުވެދިޔަ ހަފްތާގައި، އާންމު ވަޓްސްއަޕް ގުރޫޕެއްގައި ނަޝީދު ރައީސް ސޯލިހުއަށް ސީދާކޮށް، ބޮޑެތި ފާޑުކިއުންތަކެއް އަމާޒު ކުރައްވާފައި ވަނިކޮށް، އަނެއްކާވެސް އިއްޔެވަނީ ކުރައްވަމުން ގެންދަވާ ޝަކުވާތަކާއި، އައި ރައީސް ސޯލިހަށް އަމާޒު ކުރައްވާ އަލުން އާ އިންޒާރުތަކެއް ދެއްވުމުގެ އިތުރުން، ބައެއް ކަންކަމާ ފާޅުގައި ޖާމިނު ކުރުވައި، ނަޝީދު ސަރުކާރުގައި ދެމިހުރުމާއި ނުހުރުން ވަނީ އެކަންކަމާ މަތި ކޮށްފައެވެ.
މާނައަކީ، މިހާރު މަޖިލީހުގައި އޮތް ނަފްރަތުގެ ބިލް މަޖިލީހުން ފާސްކުރުމަށް ސަރުކާރު އެއްބާރުން ނުދީފިނަމަ، މި ސަރުކާރަށް ތާއީދު ދެން އިތުރަށް ނުކުރައްވާނެ ކަމަށް އިއްޔެ ވަނީ ފާޅުގައި ވިދާޅުވެފައެވެ.
އިގިރޭސިބަހުން އަމިއްލަފުޅު ޓުވިޓަރ އެކައުންޓު މެދުވެރިކޮށް، ނެރުއްވި މި ބަޔާނުގައި ވިދާޅުވެފައިވަނީ، ސަރުކާރު ކޯލިޝަންގައި ހިމެނޭ އެންމެ ކުޑަ ޕާޓީން ރައީސް ސޯލިހުގެ ނިންމެވުންތަކަށް ނުފޫޒު ފޯރުވަމުން ދާ ކަމުގައެވެ. އަދި އޭގެ އިތުރަށް ވިދާޅުވެފައިވަނީ، މިހާރު މިއޮތް ކޯލިޝަނުން މި ރާއްޖޭގައި ގާއިމްވެފައި އޮތް ޑިމޮކްރަސީގެ ހުރިހާ އަސާސްތައް މުޅި ފުނޑު ފުނޑު ކުރަމުން އަންނަ ކަމުގައެވެ.
ހަމައެއާއެކު، ރައީސް ސޯލިހުގެ ސަރުކާރުގައި، ދީނީ ގޮތުން ހައްދު ފަހަނަ އަޅާފައިތިބި އެތައް ބަޔަކު ތިބިކަމުގައި ތުހުމަތު ކުރައްވަމުން، މި ބަޔާނުގައި ނަޝީދުވަނީ، މިހާރު މަޖިލީހަށް ހުށަހެޅިފައިވާ ނަފްރަތުގެ ބިލް މަޖިލީހުން ފާސްކުރުމަށް ސަރުކާރުން އެއްބާރުލުން ނުދީފިނަމަ ސަރުކާރަށް އެމަނިކްފާނު ކުރައްވަމުން ގެންދަވާ ތާއީދު އުބުރާ ގެންދަވާނެ ކަމުގެ އިންޒާރުވެސް ދެއްވާފައެވެ.
އިގިރޭސިބަހުން، ނެރުއްވި މިބަޔާނުގައި، މި ސަރުކާރުގައި ދީނީގޮތުން ހައްދު ފަހަނައަޅާފައިވާ އެތައް ބަޔަކު ތިބިކަމުގެ ތުހުމަތުކޮށް، އަދި މަރަށްމަރު ހިފުމަށް ރާއްޖޭގައި މަގުފަހިކުރުމަށް މީގެ ކުރިން ނެރުއްވާފައިވާ ފަތުވާތަކުގެ ވާހަކަވެސް މި ބަޔާނުގައި ނަޝީދު ލިޔުއްވާފައިވަނީ، ގަބޫލުކުރެވޭ ގޮތުގައި، މިޝަކުވާތަކާއި އަދި ރައީސް ސޯލިހަށް ދެއްވަމުން ގެންދަވާ އެތަކެއް އިންޒާރުތައް ދުނިޔެއަށް ވަރަށް ރަގަޅަށް ފަހުން ކޮށްދެއްވުމުގެ ބޭނުމުގައެވެ.
ނަތީޖާއެއްގެ ގޮތުން، ޚިޔާލު ފާޅުކުރުމުގެ މިނިވަންކަމުގެ ވާހަކައާއި، ރާއްޖޭގައި ދީނީގޮތުން ހައްދު ފަހަނައަޅައި ދިއުން އޮތްކަމުގެ އިތުރުން ދީނީ ބައިބައިވުންތަކުގައި މީހުން މެރުންވެސް މިއީ ރާއްޖޭގައި ހިގަމުންދާ އަދި ހިގައިގެން ގޮސްފައިވާ ކަންކަމުގެ ގޮތުގައި އެވާހަކަތައް އިގިރޭސިބަހުން ނަޝީދު އާންމު ކުރުމުގެ ނަތީޖާއެއްގެ ގޮތުން، ބައިނަލް އަގުވާމީ ޕްރެޝަރު މިކަންކަކުގައި ރައީސް ސޯލިހަށް އަމާޒުވެގެން ދާނޭކަމުގެ ހިސާބުވެސް ނަޝީދު ޖައްސަވާނޭ ކަމީވެސް ކަށަވަރުވެ ޔަގީންވާ ކަމެކެވެ.
ކޮންމެއަކަށް، ސަރުކާރާށާއި އަދި ޚުދު ރައީސް ސޯލިހަށްވެސް އަމާޒުކޮށް ނަޝީދު ދެއްވަމުން ގެންދަވާ އިންޒާރުތައް، މިހާތަނަށް އައިއިރު، މުޅިން އާ މަރުހަލާއަކަށް ގެންދަވާފައިވި ނަމަވެސް، އަދި ސަރުކާރުގެ މައްޗަށް ބޮޑެތި އެތަކެއް ތުހުމަތުތަކެއް ކުރައްވާ، އަމިއްލަފުޅު ޓުވިޓަރ އެކައުންޓް މެދުވެރިކޮށް ޖަޒުބާތު ބަންޑުން ކުރެއްވި ނަމަވެސް، އަދިވެސް މި ސިޔާސީ ކޯޅުމާއި ގުލިގެން ސަރުކާރު އޮތީ ހަނުއެވެ. ރައީސް ސޯލިހުވެސް އަދިވެސް ހުންނެވީ ހަނުއެވެ. ސަރުކާރުގެ ވަޒީރަކުވެސް މިއިން އެއްވެސް ދެބަސްވުމަކާއި ގުޅޭގޮތުން ވާހަކަފުޅު ދައްކަވާފައެއް ނުވެއެވެ.
ރައީސް ސޯލިހުގެ ހަމަހިމޭންކަން!
2018ވަނަ އަހަރު ވެރިކަމަށް އައުމަށް ހެދުނު ކޯލިޝަންގެ ބައިވެރިންގެ މެދުގައި، ފާއިތުވެދިޔަ 2 އަހަރާއި ބައިގެ ތެރޭގައި ތަފާތު އުދާސްތައް އުފެދިފައި ވެއެވެ. މީގެތެރޭގައި، ކޯލިޝަން ޕާޓީތަކަށް ލިބެންޖެހޭ ވަޒީފާތައް ނުލިބުމާއި، އަދި ކެބިނެޓަށް އައި ބަދަލުތަކާއި ގުޅުންހުރި ތަފާތު އުދާސްތައްވެސް ހިމެނެއެވެ.
އެހެންނަމަވެސް ފާއިތުފެދިޔަ 2 އަހަރެއްހާ ދުވަހުގެ ތެރޭގައި ކޯލިޝަން އެއްވެސް ޕާޓްނަރަކު މިގޮތުން ކުރިމަތިވި އެއްވެސް މައްސަލައެއްގެ އުދާހުގައި ކޯލިޝަން ރޫލުމާއި ދިމާލަށް ދަތުރު ކޮށްފައެއް ނުވެއެވެ. އަދި ފާހަގަވާން އޮތް ކަމަކީ، މިގޮތުން އުފެދުނު ގިނަ މައްސަލަތަކާއި ގުޅިގެން އުފެދުނު އުދާސްތަކާ ގުޅޭގޮތުން ރައީސް ސޯލިހުވެސް ހުންނެވީ ހަނު ކަމެވެ.
އެހެންނަމަވެސް، ކޯލިޝަންގައި ހިމެނޭ އެންމެ ބޮޑު ޕާޓީގެ އެތެރޭގައި މިފަހަރު އުފެދިގެން ގޮސްފައިމިވަނީ، ސަރުކާރުގެ އެތެރޭގައި އަދި މިހާތަނަށް އުފެދިގެން ގޮސްފައި ނުވާވަރުގެ ބޮޑު މައްސަލަގަޑެއް ކަމުގައި ދަންނަވަން ޖެހެއެވެ. ފާޅުގައި ސަރުކާރަށް ފާޑުވިދާޅުވެ، ރައީސް ސޯލިހަށް ފާޑު ވިދާޅުވާން ފެއްޓެވީ ރައީސް ނަޝީދެވެ. އަދި އެއީވެސް ނުހަނު ފާޅުކަން ބޮޑު ގޮތުގައެވެ. އެއީ ސަރުކާރު ހިންގާ ޕާޓީގެ ރައީސްވެސް މެއެވެ.
ފާއިތުވެދިޔަ ތަނުގައި މިގޮތުން އުފެދިގެން ގޮސްފައިވާ ހުރިހާ މައްސަލަތަކުގައި ރައީސް ސޯލިހު ހަމަހިމޭންކަން އިސްކޮށްފައިވާ ފަދައިން، އެމްޑީޕީ ފަޅަފަޅާއިގެން ގޮސް، ރައީސް ނަޝީދު އެންމެ ފަހުން އެތެރެއާއި ބޭރުން ސަރުކާރާ ދެކޮޅަށް ކުޅުއްވަން ފަށްޓަވާފައިވާއިރު، ރައީސް ސޯލިހު އަދިވެސް ހުންނެވެނީ ހަނުއެވެ.
އުފެދިގެން އުޅޭ ބޮޑެތި ޚިޔާލު ތަފާތުވުންތަކާ ގުޅޭގޮތުން ރައީސް ސޯލިހުގެ ވިސްނުންފުޅު ހުރި ގޮތެއް ސާފެއް ނޫނެވެ. ފާއިތުވެދިޔަ ތަނުގައި ބޭއްވުނު ޕްރެސް ކޮންފަރެންސްތަކުގައި، އޭރު ދެބޭފުޅުންގެ ދެމެދުގައި އުފެދިގެން ގޮސްފައިވާކަމަށް މީޑިއާގައި އަޑު ފެތުރެމުން ގޮސްފައިވާ ޚިޔާލު ތަފާތުވުންތަކާ ގުޅޭގޮތުން ވިދާޅުވެފައިވަނީ، ރައީސް ނަޝީދާއި ދެބޭފުޅުންގެ ދެމެދުގައި ހައްލު ނުކުރެވޭ ވަރުގެ ޚިޔާލު ތަފާތުވުމެއ އުފެންދިގެން ނޫޅޭ ކަމުގައެވެ. އަދި އެއްވެސް މީހަކަށް ދެބޭފުޅުންގެ ދެމެދަށް ނުވަދެވޭނެ ކަމަށްވެސް ރައީސް ސޯލިހު ވިދާޅުވެފައި ވެއެވެ.
އެހެންނަމަވެސް، އެއްވެސް ފޮރުވުމެއްނެތި އެގެން އޮތް މިންވަރަށް ނަޝީދު މިވަނީ ޚިޔާލު ތަފާތުވުންތަކާއި އުދާސްތައް މިފަހަރު ބަންޑުން ކޮށްލާފައެވެ.
ޔަގީނުންވެސް އެގެން އޮތްކަމަކީ، މިހާލަތުގައި، މައްސަލައެއް ނެތްކަމަކަށް ވިދާޅުވުމުގެ ފުރުސަތެއް ރައީސް ސޯލިހަށް ދެން ނޯންނާނޭ ކަމެވެ. އަދި ދެން އެންމެ އަވަހަށް ބޭއްވޭ ޕްރެސް ބްރީފިންއެއްގައި ނޫސްވެރިންގެ މި ސުވާލުތައް ރައީސް ސޯލިހަށް އަމާޒުވެގެން ދާނެ ކަމީވެސް ކަށަވަރުވެ ޔަގީންވާ ކަމެކެވެ.
ފަހަރެއްގައި، ނަޝީދުގެ ފަރާތްޕުޅުން ރައީސް ސޯލިހަށް އަމާޒުވަމުންދާ ހަމަލާތަކާއި ފާޑުވިދާޅުވުންތައް އަދި، މިހާރު ގައުމުން ބޭރުގެ މީޑީއާތައްވެސް ހިމެނޭގޮތުން، ނަޝީދު ރައީސް ސޯލިހުއަށާއި ސަރުކާރުގެ މައްޗަށް ކުރައްވަމުން ގެންދަވާ ބޮޑެތި ތުހުމަތުތަކަށް ރައީސް މިވަގުތު ދެއްވަން ބޭނުންފުޅުވާ ޖަވާބަކީ ހަމަހިމޭންކަން ކަމުގައި ވުމަކީ އެކަށީގެންވާ ކަމެކެވެ. އަދި އޭގައި ހިކުމަތްތަކެއް ހުރުމަކީވެސް އެކަށީގެންވާ ކަމަކެވެ.
އެހެންނަމަވެސް ގަބޫލުކުރަން ޖެހޭ ހަގީގަތަކީ، ރައީސް ސޯލިހުގެ ހަމަހިމޭން ކަމުގައިވެސް ހައްދެއް އޮންނާނެ ކަމެވެ. އަދި ދެއްވަން ބޭނުންފުޅުވާ މެސެޖު، ހަމަހިމޭންކަމުން ތާއަބަދު ދެއްވަން ބޭނުންފުޅު ވެވަޑައި ނުގަންނަވާނޭވެސް ކަމެވެ. އެ ހަހިމޭންކަން ތަރުޖަމާކޮށްގެން ހުރިހާ ހާލަތެއްގައި ކަމުގެ ހަގީގަތާ ހަމައަށް ވާސިލް ނުނެވޭނޭ ކަންވެސް މެއެވެ.
އެހެންކަމުން ގިނަބަޔަކު މިއަދު ތިބީ، ސަރުކާރު ހިންގާ ކޯލިޝަންގެ އެންމެ ބޮޑު ޕާޓީގެ އެތެރޭގައި މިއަދު އުފެދިގެން ގޮސްފައިވާ ބޮޑެތި ހަމަނުޖެހުންތަކާ ގުޅޭގޮތުން ރައީސް ސޯލިހު ވިދާޅުވާނެ ވާހަކަފުޅެއްގެ އިންތިޒާރުގައެވެ. ދެން އެމަނިކްފާނު ބާއްވަވާ ޕްރެސް ކޮންފަރެންސްއެއްގައި މިގޮތުން އުފެދިގެން ގޮސްފައިވާ ގިނަ ސުވާލުތަކެއްގެ ޖަވާލު ލިބިގެންދާނެ ކަމުގެ އުއްމީދާއި ޔަގީން ކަމުގައެވެ.
