މާލެ އަދި ވިލިމާލޭގެ ލޭންޑްޔޫސް ޕްލޭނެ ހެދުމަށާއި ރައްޔިތުންގެ ޚިޔާލު ހޯދުމަށް ބާއްވާ ރައްޔިތުންގެ ބައްދަލުވުންތައް ޢީދު ބަންދަށް ފަހު ފަށާނެކަމަށް މާލޭ ސިޓީގެ މޭޔަރ ޑރ. މުޙައްމަދު މުޢިއްޒު ވިދާޅުވެއްޖެ އެވެ.
ބުރާސްފަތި ދުވަހުގެ ރޭ ބޭއްވެވި ހަފުތާ ޕްރެސްކޮންފަރެންސްގައި މޭޔަރ ވިދާޅުވީ އެޗްޕީއޭގެ ގައިޑްލައިންނަށް ރިޢާޔަތްކޮށް ސިޓީ ކައުންސިލުން ހުށަހެޅި ގައިޑްލައިނާ އެއްގޮތަށް ބައްދަލުވުންތަށް ބޭއްވުމުގެ ހުއްދަ މިހާރު ދީފައިވާކަމަށެވެ.
އެގޮތުން މާލޭގެ ލޭންޑް ޔޫސް ޕްލޭން ހެދުމުގެ ބައްދަލުވުންތައް ކޮންމެ އަވަށެއްގައި ވަކިން ބޭއްވުމަށް ހަމަޖެހިފައިވާއިރު، މި ބައްދަލުވުންތައް ފަށަނީ އޮގަސްޓް 5 ވަނަ ދުވަހު ގަލޮޅު އަވަށުން ކަމަށް ސިޓީކައުންސިލުން ބުނެއެވެ. ކޮންމެ ބައްދަލުވުމެއް ވެސް ބާއްވަން ހަމަޖެހިފައި ވަނީ ރޭގަނޑު 8:30 ގައެވެ.
ބައްދަލުވުންތަށް ތާވަލްކޮށްފައި ވާގޮތަށް ބަލާއިރު، ގަލޮޅުގެ ބައްދަލުވުން 5 ވަނަ ދުވަހުގެ ރޭސިޓީ ޕާކްގައި، ވިލިމާލެ 8 ވަނަދުވަހުގެރޭ ފުޓްބޯޅަ ދަނޑުގަ، މައްޗަންގޮޅި 10 ވަނަދުވަހުގެރޭ މާފަންނު ޓާފް ދަނޑުގައި، މާފަންނު 12 ވަނަދުވަހުގެރޭ ރަސްފަންނުގައި، އަދި ހެންވޭރު 14 ވަނަ ދުވަހުގެރޭ ލޮނުޒިޔާރަތް ޕާކްގައި ބެއޭއްވުމަށް ސިޓީކައުންސިލުން ވަނީ ނިންމާފަ އެވެ.
މި ބައްދަލުވުންތަކުގައި މަޝްވަރާކުރަން ހަމަޖެހިފައިވާ މައިގަނޑު ކަންތައްތައްކުގެ ތެރޭގައި ލޭންޑް ޔޫސް ޕްލޭންހެދުމަށް ޚިޔާލު ހޯދުމާއި، ގެދޮރުވެރިކަމުގެ މަޝްރޫޢުތައް ހިންގުމާއި، ގުޅީފަޅުން ގޯއްޗާއި ފްލެޓް ދޭނެ ބިންކަނޑައެޅުމާމެދު ޚިޔާލު ހޯދުމާއި، އިމާރާތްކުރުމުގެ މަސައްކަތަށް މަގުބަންދުކުރުމުގެ ވަގުތާ ބެހޭގޮތުންނާއި، މަގު ހިނގާ މީހުނަށް އުނދަގޫވާގޮތަށް ހުންނަ ކަންކަން ރަނގަޅު ކުރުމާއިބެހޭގޮތުންނާއި، އެއްގަމު އުޅަނދު ދުއްވުން މަނާ ގޯޅިތަކާބެހޭގޮތުންނާއި، ޓްރެފިކް ވާޑުން ތަޢާރަފްކުރުމާއި ގުޅޭގޮތުންނާއި، ޕާކިންގް ބިލްޑިންގްތައް އަޅާނެ ތަންތަނާބެހޭގޮތުންނާއި، ފުޓްސަލް ދަނޑާއި ނެޓްބޯލް ކޯޓްތައް އަޅާނެ ތަންތަނާބެހޭގޮތުން މަޝްވަރާކުރުން ހިމެނެއެވެ.
މީގެ އިތުރުން އެ އަވަށަކަށް ޚާއްޞަ ބައެއްކަންކަމާބެހޭގޮތުންވެސް މަޝްވަރާކުރެވޭނެކަމަށް ސިޓީ ކައުންސިލުން ބުނެއެވެ. އެގޮތުން މާފަންނު ބޮޑުގޭގައި މިސްކިތެއް އެޅުންފަދަ ކަންކަމާއި ސިޓީ ޕާކްގައި ރަނގަޅު ފެންވަރުގެ ޕާކެއް ތަރައްޤީކުރުން ފަދަ ކަންކަން ހިމެނޭ ކަމަށް ސިޓ ީކައުންސިލުން ބުނެއެވެ.
