މުޅި ރާއްޖެ ހިމެނޭގޮތަށް، ފުޓްބޯޅައިގެ އައު ފޯމެޓް އިޢުލާކޮށްފި

މުޅި ރާއްޖެ ހަތަރު ޒޯނަކަށް ބަހާލައި ފުޓްބޯޅައިގެ އައު ފޯމެޓް ފުޓްބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން އިޢުލާންކޮށްފިއެވެ.

2023-2024 ވަނަ ވަނަ އަހަރުގެ ސީޒަނުން ފެށިގެން ރާއްޖޭގެ ފުޓްބޯޅަ ސީޒަން ކުރިޔަށް ގެންދިޔުމަށް އެފްއޭއެމުން ރާވާފައިވާ ފޯމެޓް އިއުލާންކުރެއްވީ އެ މަސައްކަތަށް އެފްއޭއެމުން ހަމަޖެއްސި ކޯޗު މުހައްމަދު އާދަމް އެވެ. މިކަން އިޢުލާންކުރުމަށް ރަސްމީ ފުޓްބޯޅަ ދަނޑުގައި ބޭއްވި ނޫސްވެރިންގެ ބައްދަލުވުމުގައި އެފްއޭއެމްގެ ރައީސް ބައްސާމް އަދީލް ޖަލީލް އާއި އެ އިދާރާގެ ޖެނެރަލް ސެކެޓްރީ ޙުސައިން ޖަވާޒް ވެސް ވަނީ ބައިވެރިވެވަޑައިގެންފައެވެ.

މި ޕްލޭނަކީ އެފްެއޭއެމުގެ ރައީސްކަމަށް ދެވަނަ ދައުރަކަށް ހޮވިވަޑައިގެންނެވި ބައްސާމް އަދީލް ޖަލީލްގެ ވައުދެކެވެ.

ކޮންމެ ޒޯނެއްގައި ގާއިމްކުރާ ލީގުގައި ތިން ޑިވިޝަނެއް ބާއްވަން ވަނީ ނިންމައިފަ އެވެ. އެއީ ފުރަތަމަ ޑިވިޝަނާއި ދެ ވަނަ ޑިވިޝަނުގެ އިތުރުން ތިން ވަނަ ޑިވިޝަނެވެ. މިހާރު ރާއްޖޭގައި މިގޮތަށް ޑިވިޝަންތައް ހަމައެކަނި އޮންނަނީ މާލެ ސަރަހައްދުގަ އެވެ. މުހައްމަދު އާދަމް ވިދާޅުވީ ތިން ޑިވިޝަނުގެ އިތުރުން ކޮންމެ ލީގެއްގައި އޯޕަން ޑިވިޝަނެއް އޮންނާނެ ކަމަށެވެ.

ޒޯން އެކެއް: ހއ، ހދ، ށ، ނ، ރ

ޒޯން ދޭއް: ބ، ޅ، ކ، އއ، އދ، ވ، މ، ފ، ދ

ޒޯން ތިނެއް: ތ، ލ، ގއ، ގދ، ފުވައްމުލައް ސިޓީ، އައްޑޫ ސިޓީ

ޒޯން ހަތަރެއް: ވިލިމާލެ، މާލެ، ހުޅުމާލެ

މި ޑިވިޝަންތަކަކީ މިހާރުވެސް މާލޭގައި ކުރިޔަށްދާ ގޮތެވެ. އަލަށް އެކުލަވާލާ ފޯމެޓާއެކު ކޮންމެ ޒޯނެއްގައި ވެސް ޑިވިޝަންތަކަކަށް ބަހާލެވިގެންދާނެ އެވެ. އަދި ގިނަ ކުޅުންތެރިންނާއި ޓީމުތަކަކަށް އިތުރު ފުރުސަތުތަކެއް ލިބިގެންދާނެ އެވެ. ކޮލިފައިންގެ ބުރުތައް ނިމުމަށް ފަހު ޕްރިމިއާ ލީގުގައި ވާދަކުރާނީ 12 ޓީމެކެވެ.

އެފްއޭއެމުގެ ޓާގެޓަކީ ކުރިޔަށްއޮތް އީދާއި ބަންދަށްފަހު އަންނަ އޯގަސްޓުމަހު ލީގުގެ މަސައްކަތް ފެށުމަށެވެ. އެކަމާއި ގުޅޭ ގިނަ ތައްޔާރީތަކެއް އެފްއޭއެމުން ދަނީ ވަމުންނެވެ.