ލޯނު އެއްބަސްވުމެއްގެ ދަށުން އިޓަލީގެ ޔުވެންޓަސްއަށް ކުޅެމުން އަންނަ ފެޑެރީކޯ ޗިއޭސާ ހޯދުމަށް ޗެލްސީން ބިޑް ކުރަން ނިންމާފައިވާ ކަމަށް ރިޕޯޓްތައް ބުނެފިއެވެ.
ރިޕޯޓްތައް ބުނާ ގޮތުން ޗެލްސީން ޗިއޭސާ ހޯދުމަށް 100 މިލިއަން ޕައުންޑް ޚަރަދުކުރުމަށް އޮތީ ތައްޔާރަށެވެ. އެކަމަކު ޔުވެންޓަސްއިން ވެސް އަންނަނީ ޗިއޭސާގެ އެއްބަސްވުން ދާއިމީ ކުރުމަށް މަސައްކަތް ކުރަމުންނެވެ. ޗެލްސީން ޗިއޭސާގެ ސޮއި ހޯދުމަށް މަސައްކަތް ކުރަމުން އަންނަނީ، އެ ކްލަބްގެ ކޯޗު ތޯމަސް ޓުޗެލްގެ އެދުމުގެ މަތިންނެވެ. އަދި މި ޓްރާންސްފާ މާކެޓުގައި ޗެލްސީގެ އެންމެ ބޮޑު ޓާގެޓަކީވެސް ޗިއޭސާއެވެ.
ޔުވެންޓަސް އާއިއެކު ނިމިދިޔަ ސީޒަނުގައި މޮޅު ކުޅުމެއް ދެއްކި ޗިއޭސާ ހޯދުމަށް ޔޫރަޕްގެ ގިނަ ކްލަބްތަކަކުން އަންނަނީ ޝައުގުވެރިކަން ފާޅުކުރަމުންނެވެ. އޭގެ ތެރޭގައި އިނގިރޭސިވިލާތުގެ މެންޗެސްޓާ ސިޓީ ވެސް ހިމެނެއެވެ. މީގެ އިތުރުން ފްރާންސްގެ ޕީއެސްޖީ އާއި ޖަރުމަނުގެ ބަޔާން މިޔުނިކްއިން ވެސް ވަނީ ކިއޭސާއަށް ޝައުގުވެރިކަން ފާޅުކޮށްފައެވެ.
ޗިއޭސާ ވަނީ ހުސްވި ސީޒަނުގައި ޔުވެންޓަސްއަށް ކުޅެދިން މެޗުތަކުގައި 14 ލަނޑު އެޓީމަށް ކާމިޔާބު ކޮށްދީފައެވެ.
