2026 ވަނަ އަހަރާ ހަމައަށް ބާސެލޯނާގައި މަޑުކުރަން އެ ޓީމްގެ ކެޕްޓަން ލިއޮނަލް މެސީ ނިންމައިފިއެވެ.
މިދިޔަ ޖޫން މަހުގެ ނިޔަލަށް ބާސެލޯނާއާއެކު މެސީ ކުރިން ހަދައިފައިވާ އެއްބަސްވުމުގެ މުއްދަތު ހަމަވި އިރު އެންމެ ފަހުން ބާސެލޯނާ އިން ބުނެފައިވަނީ މެސީ އިތުރު ދެ އަހަރު ދުވަހު ކްލަބްގައި މަޑުކުރުވަން އެއްބަސްވުމަކާ ހަމައަށް އާދެވޭތޯ މަސައްކަތްކުރަމުން އަންނަ ކަމަށެވެ. ކޮޕާ އެމެރިކާ ފުޓްބޯޅަ މުބާރާތުގެ ތަށި އާޖެންޓީނާއަށް ހޯދައިދިނުމަށްފަހު މިވަގުތު ޗުއްޓީގައި ހުރި މެސީ ބާސެލޯނާގައި މަޑުކުރަން ނިންމިކަން މީޑިއާތަކުން ރިޕޯޓްކޮށްފައިވީ ނަމަވެސް ބާސެލޯނާއިން އަދި މިކަމާ ގުޅޭގޮތުން އެއްވެސް އެއްޗެއް ބުނެފައެއް ނުވެއެވެ.
މިވަގުތު ފްރީ އޭޖެންޓެއްގެ ގޮތުގައި ހުރި މެސީ އިތުރު ފަސް އަހަރު ބާސެލޯނާގައި މަޑުކުރަން ނިންމި އިރު އޭނާ ވަނީ ކުރިން ލިބެމުން އައި މުސާރަ ކުޑަކުރަންވެސް އެއްބަސްވެފައެވެ. މެސީ ގެންދިއުމަށްޓަކައި ފްރާންސްގެ ޕީއެސްޖީންނާއި، އިނގިރޭސި ވިލާތުގެ މެންޗެސްޓާ ސިޓީން މަސައްކަތްކޮށްފާނެ ކަމުގެ ވާހަކަތަކެއް އޮތީ މީޑިއާގައި ފެތުރިފައެވެ.
އެއިން އެއްވެސް ކްލަބަކުން މެސީ ގެންދިއުމާ ގުޅޭގޮތުން މަޝްވަރާކުރި ކަމުގެ މައުލޫމާތެއް އަދި ހާމަވެފައެއް ނެތެވެ.
