އިސްރާއީލުން ހިފާފައިވާ ޖެރޫސެލަމްގައި ގާއިމް ކޮށްފައި ހުންނަ އެމެރިކާގެ އެމްބަސީގައި ބޭއްވުނު މިއަހަރުގެ އެގައުމުގެ މިނިވަންދުވަހުގެ އިހުތިފާލް، ޖަރުމަނު ވިލާތާއި އަދި ފްރާންސްގެ އެމްބެސަޑަރުން ބޮއިކޮޓް ކޮށްފައި ވާކަމަށް އިސްރާއީލުގެ މީޑިއާތަކުން ރިޕޯޓު ކޮށްފިއެވެ.
އިސްރާއީލިގެ ލޯކަލް ނޫހެއް ކަމުގައިވާ Ynet އިން ހާމަ ކޮށްފައިވާ ގޮތުގައި، މި ހަފްލާއަށް ހާޒިރު ވެފައިވަނީ، ރޫމޭނިއާ، އިގނިރޭސިވިލާތް، ކޮސޯވޯ، އޮސްޓްރޭލިއާ، ނޯވޭ، އަދި ކެނެޑާނެ އެމްބެސެޑަރުން އެކަންޏެވެ.
މި ނޫހުން އިތުރަށް ހާމަ ކޮށްފައިވާ ގޮތުގައި، މި އިހުތިފާލް ބޮއިކޮޓް ކުރި ގައުމުތަކުން، މި ރަސްމިއްޔާތު ބޮއިކޮޓް ކޮށްފައިވަނީ، ޖެރޫސެލަމްއަކީ އިސްރާއީލުގެ ވެރި ރަށުގެ ގޮތުގައި މިގައުމުތަކުން ބަލައި ނުގަންނާތީއެވެ.
އެމެރިކާގެ ކުރީގެ ރައީސް ޑޮނަލްޑް ޓްރަމްޕްގެ ވެރިކަމުގައި 2018 ވަނަ އަހަރު، އެގައުމުންވަނީ ޓެލްއވީވްގައި ހުންނަ އިސްރާއީލް އެބަސީ ޖެރޫސެލަމްއަށް ބަދަލު ކުރުމަށް އަމުރު ކޮށްފައެވެ. އަދި އޭނާވަނީ، 2017ވަނަ އަހަރު، ޖެރޫސެލަމްއަކީ އިސްރާއީލުވެ ވެރި ރަށުގެ ގޮތުގައި ބަލައިގެންވެސްފައެވެ. އެހެންނަމަވެސް، އިރުމަތީ ޖެރޫސެލަމްއަކީ ފަލަސްތީނުގެ މިނިވަން ދަައުލަތެއްގެ ވެރިރަށުގެ ގޮތުގައި އެގައުމުން ބަލައިގަންނަ ސިޓީއެވެ. އަދި ބައިނަލް އަގުވާމީ ގާނޫނުތައް ބުނާގޮތުންވެސް މިއީ ފަލަސްތީނުގެ ބިމެކެވެ.
އެމެރިކާއަކީ، ބައިނަލްއަގުވާމީ ގާނޫނުތަކާ ޚިލާފަށް، އިސްރާއީލުން ފަލަސްތީން ހިފައިގެން އޮތް އޮތުމަށް އެންމެ ބޮޑަށް ހިތްވަރު ދެމުންދާ ގައުމުވެ.
