ލާދީނީ ފިކުރު ރައްޖޭގައި ބަލިވަމުން ދާކަމަށް ދީނީ އިލްމުވެރިޔާ ޝައިޚު އަލީ ޒައިދު ވިދާޅުވެއްޖެ އެވެ.
ނަފްރަތުގެ ޢަމަލުތައް ހުއްޓުވުމުގެ ނަމުގައި ޤާނޫނުލް އުޤޫބާތުގެ 123 ވަނަ މާއްދާގެ ފަހަތަށް މާއްދާއެއް އިތުރުކުރަން މަޖިލީހަށް ހުށަހެޅިފައިވާ ބިލާއި ގުޅިގެން މިހާތަނަށް އެންމެ ބޮޑަށް މިކަމާއި ދެކޮޅު ހައްދަވަމުންދާ އެއްބޭފުޅާ ކަމަށްވާ ޝައިޚު ޒައިދު ވިދާޅުވީ ރާއްޖޭގައި ލާދީނީ ފިކުރު ބަލިވަމުންދާ ދިއުމަކީ ޙަމްދު ކުރަން ޖެހޭ ވަރުގެ ކަމެއް ކަމަށެވެ. ޒައިދު އަބަދުވެސް ސިފަކުރަމުން ގެންދެވީ ނަފްރަތުގެ އަމަލު ބަޔާންކުރާ ބިލަކީ ދީނާއި ޚިލާފު އަދި ލާދީނިއްޔަތަށް ހިތްވަރުދޭ ބިލެއްގެ ގޮތުގަ އެވެ.
މީގެ އިތުރުން އިދިކޮޅު ޕާޓީ ޕީޕީއެމް އިން ލާދީނީ ފިކުރަށް ދީލާނުލާނެ ކަމަށް އުންމީދު ކުރައްވާކަމަށްވެސް ޝައިޚު ޒައިދު ވިދާޅުވިއެވެ. އަދި ޕީޕީއެމް ލާދީނީ ފިކުރަށް ދީލާލައިފިނަމަ ޕާޓީ ވިއްސިވިހާލިވެގެން ދާނެ ކަމަށާއި އުންމީދުކުރަނީ އެހެންނުވުން ކަމަށްވެސް ޒައިދު ވިދާޅުވިއެވެ.
ނަމަވެސް ޒައިދަކީ މީގެކުރިން ޕީޕީއެމްގެ ވެރިކަމުގައި އެޕާޓީއަށާއި އޭރުގެ ވެރިންނަށް ވަރަށްބޮޑަށް ފާޑުވިދާޅުވެ ވާހަކަ ދެއްކެވި ބޭފުޅެކެވެ.
ލާދީނީ ފިކުރު ރައްޖޭގައި ދަނީ ބަލިވަމުން! މީ ޙަމްދު ކުރަންޖެހޭ ވަރުގެ ކަމެއް! އަޅުގަނޑު އުންމީދުކުރަނީ ޕީޕީއެމް އިން ލާދީނީ ފިކުރަށް ދީލާނުލާނެ ކަމަށް! ދީލާލައިފިނަމަ ޕީޕީއެމް ވިއްސިވިހާލިވެގެން ދާނެކަން ޔަޤީން! އުންމީދުކުރަނީ އެހެންނުވާނެ ކަމަށް! ބުއްދި އިސްކުރާނެކަމަށް!
— Ali Zaid (@alizaid1000) July 13, 2021
ޝައިޚު އަލީ ޒައިދު މި މޭރުމުން ވާހަކަދައްކާފައި މިވަނީ ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް މުޙައްމަދު ނަޝީދު، އެމްޑީޕީއަށް އައު އިއްތިހާދެއް ބޭނުންވާ ކަމުގައި ވިދާޅުވެ އެއިއްތިހާދުގައި ހިމެނެން ބޭނުންވާ ފަރާތްތަކުގެ ޝަރުތުތަށް ހާމަކުރައްވާފައި ވަނިކޮށެވެ. އެގޮތުން ނަޝީދު ވިދާޅުވެފައި ވަނީ އެފަދަ އިއްތިހާދެއް އެމްޑީޕީން އެކުލަވާލަން ބޭނުންވަނީ އިންޑިއާ އައުޓް ނުގޮވާ، ނަފްރަތު ބިލަށް ތާއީދުކުރާ، މިއުޒިކް ހަރާމް ނުކުރާ، ކީރިތި ރަސޫލާއަށާއި، އިސްލާމް ދީނަށް ފުރައްސާރަ ނުކުރާ މީހުނާއި ޕާޓީތަކާއެކު ކަމަށެވެ.
