އެމެރިކާގެ ފަރސްޓް ލޭޑީ ޖިލް ބައިޑްން މިހަރުގެ އޮލިމްޕިކްސްގެ ފެށުމުގެ ރަސްމިއްޔާތުގައި ބައިވެރި ވަޑައިގަތުމަށްޓަކާ، މިމަހުގެ 23 ވަނަ ދުވަހު ޖަޕާންގެ ޓޯކިޔޯއަށް ވަޑައިގަތުމަށް ހަމަޖެހިފައިވާ ކަމަށް ވައިޓް ހައުސްއިން ބުނެފިއެވެ.
އަދި މިފަހަަރުގެ އޮލިމްޕިކްސްގައި ބައިވެރިވާ އެމެރިކާގެ ޑެލިގޭޓުންގެ އެންމެ އިސް ވެރިއެއްގެ ގޮތުގައިވެސް ޓޯކިޔޯއަށް ވަޑައިގަންނަވާނީވެސް އެކަމަނާކަންވެސް ވައިޓް ހައުސްއިން ހާމަ ކޮށްފައި ވެއެވެ. އެހެންނަމަވެސް އެމެރިކާގެ ޑެލިގޭޝަންގައި އެެކަމަނާގެ ފިރިކަލުން، އެމެރިކާގެ ރައީސް ޖޯ ބައިޑްން ހިމެނިވަޑައެއް ނުގަންނަވާނެއެވެ.
މުޅި ދުނިޔޭގައި އަދިވެސް ފެތުރެމުންދާ ކޯވިޑް19ގެ ނުރައްކާތެރިކަމާއެކު، ޖަޕާނުން ވަނީ މިފަހަރުގެ އޮލިމްޕިކްސްގެ އެއްވެސް އިވެންޓެއްގައި ބެލުންތެރިން ނުހިމަނާގޮތަށް ނިންމާފައެވެ. އަދި ޖަޕާނުގެ ޓޯކިއޯގައި އޮތީ އޮގްސްޓް 22 ވަނަ ދުވަހާ ހަމައަށް ސިއްޙީ ކުއްލި ނުރައްކަލުގެ ހާލަތު އިއުލާން ކޮށްފައެވެ.
އޮލިމްޕިކްސް ނިމޭނީ އޮގަސްޓް މަހުގެ 8ވަނަ ދުވަހުއެވެ.
2020 ވަނަ އަހަރު ބޭއްވުމަށް ހަމަޖެހުނު އޮލިމްޕިކްސް މުބާރާތް މިއަހަރަށް ލަސްކުރަންޖެހުނީ ކޯވިޑް19ގެ ހާލަތު ދުނިޔޭގައި ގޯސްވަމުން ދިއުމާ ގުޅިގެންނެވެ. ޖަޕާނުގައި އޮލިމްޕިކްސް ކުރިޔަށް ދާނީ ޖުލައި މަހުގެ 23ވަނަ ދުވަހުން އޮގަސްޓް މަހުގެ 8 ވަނަ ދުވަހާ ހަމައަށެވެ.
