ވެލާނާ އިންޓަނޭޝަނަލް އެއާޕޯޓު ތަރައްގީކުރަން ބޭނުންވާ އިތުރު ފައިނޭންސްގެ ގޮތުގއި ކުވައިތު ފަންޑުން 15 މިލިއަން ކުވައިތު ދީނާރު (50 މިލިއަން ޑޮލަރު، 770 މިލިއަން ރުފިޔާ) ގެ ލޯނެއް ސަރުކާރުން ހޯދައިފިއެވެ.
ރައީސް އަބްދުﷲ ޔާމީންގެ ވެރިކަމުގައި ފެށި ވީއައިއޭ ތަރައްގީ ކުރުމުގެ އެއް ބިލިއަން ޑޮލަރުގެ ބިޔަ މަޝްރޫއުގެ ނުނިމި ހުރި ބައި ނިންމަން ކުވެއިތު ފަންޑުން ދިން މި 15 މިލިއަން ޑޮލަރުގެ ލޯނު އެއްބަސްވުމުގައި ރާއްޖެ ފަރާތުން ސޮއިކުރެއްވީ ފިނޭންސް މިނިސްޓަރު އިބްރާހިމް އަމީރެވެ.
މި ރަސްމިއްޔާތުގައި ކުވެއިތު ފަންޑުގެ ފަރާތުން ސޮއި ކުރެއްވީ އެ ގައުމުގެ ޑެޕިއުޓީ ޑިރެކްޓަރު ޖެނެރަލް އެޑްމިން އެންޑް ފައިނޭންސް އެފެއާޒް ނަދާލް އަލް އޮލަޔާލް އެވެ. މި ލޯނު އެއްބަސްވުމުގެ އިތުރު ތަފުސީލުތައް ފިނޭންސް މިނިސްޓްރީން އަދި ބުނެދީފައެއް ނުވެއެވެ. ރާއްޖޭގައި މިހާތަނަށް ހިންގާ އެންމެ ބިޔަ މަޝްރޫއު، ވެލާނާ އިންޓަނޭޝަނަލް އެއާޕޯޓު ތަރައްގީކުރަން 800 މިލިއަން ޑޮލަރު (12.3 ބިލިއަން ރުފިޔާ) ހަރަދުކުރަން ހަމަޖެހިފައިވެއެވެ.
Minister @iameeru and Deputy Director General for Admin & Finance Affairs Mr. Nedhal A Al-Olayan of @KuwaitFund signed an additional financing of KWD 15million for the Expansion & Upgrading of VIA Project pic.twitter.com/LEtljaqkXZ
— Ministry of Finance (@MoFmv) July 12, 2021
އެއާޕޯޓު ޕްރޮޖެކްޓްގެ ދަށުން އާ ރަންވޭ އާއި ފިއުލް ފާމެއް، ޕެސެންޖާ ޓާމިނަލް، ސީ ޕްލޭން ޓާމިނަލް އަދި ކާގޯ ކޮމްޕްލެކްސްއެއް ހަދާނެއެވެ. މީގެ ތެރެއިން ވީއައިއޭގައި 3،400 މީޓަރު ދިގު، 60 މީޓަރު ފުޅާ އާ ރަންވޭގެ މަސައްކަތް ނިންމައިފަ އެވެ. އަދި ފިއުލް ފާމާއި ސީ ޕްލޭން ޓާމިނަލް އާއި އާ ޓާމިނަލް އާއި ކާގޯ ކޮމްޕްލެކްސްގެ މަސައްކަތްތައް އަންނަނީ ކުރަމުންނެވެ.
އަގު ބޮޑު އިމާރާތް ނިންމިތާ ދެ އަހަރުވާން ކައިރިވާއިރު ވެސް އެތަން ހުޅުވިފައެއް ނުވެ އެވެ. އާ ސީ ޕްލޭން ޓާމިނަލްގެ މަޝްރޫއުގެ ދަށުން 3.2 ހެކްޓަރު (32،000 އަކަމީޓަރު) ގެ ބިން ހިއްކުމުގެ މަސައްކަތް ނިންމާފައި ވަނީ މިދިޔަ އަހަރުގެ ޖޫން މަހު އެވެ. އެ ޕްރޮޖެކްޓަކީ ޖުމްލަ 40 މިލިއަން ޑޮލަރު (616 މިލިއަން ރުފިޔާ) ގެ މަޝްރޫއެކެވެ.
