ބޭސްފަރުވާއަށްފަހު އެނބުރި މާލެ ދާތަނުން އަނެއްކާވެސް ބަޔަކު މީހުންގެ ރޭވުމަކުން މަރާލާނެކަމުގެ ރޭވުންތަކެއް ރޭވި، އެފަދަ ކަމެއް އޮވެގެން ނުވާނެކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.

ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދަށް ދެމުން ގެންދާ ސަލާމަތާއި ރައްކާތެރިކަން ބްރީޗްވިގޮތުގެ އިންކުއަރީ ރިޕޯޓު، ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދަށް އެރުވުމަށް ބޭއްވި ރަސްމިއްޔާތުގައި ވާހަކަ ދައްކަވަމުން މަޖިލިސް ރައީސް ވިދާޅުވީ ބޭސްފަރުވާއަށްފަހު ހެޔޮ ހާލުގައި ވީހާވެސް އަަވަހަށް މާލެ ދިއުމަށް އުންމީދު ކުރައްވާކަމަށެވެ.

ނަމަވެސް ލިބިފައިވާ އަނިޔާތަކަށް ބަލައި، އަދިވެސް ދުވަސްކޮޅަކު ފަރުވާ ހޯދުމަށް ރާއްޖެއިން ބޭރުގައި ހުންނަން ޖެހޭކަމަށް މަޖިލިސް ރައީސް ވިދާޅުވިއެވެ. ނަމަވެސް ފަރުވާއަށްފަހު އެނބުރި މާލެ ގޮސް އަލުން މަސައްކަތާއިގެން އުޅޭއިރު، އަނެއްކާވެސް މަރާލާނެ ކަމުގެ ރޭވުންތަކާއި، އެފަދަ ކަންކަން އޮގެން ނުވާނެކަމަށް ގިނަ ބަޔަކު މިހާރު ދެކޭ ކަމުގައި ރައީސް ނަޝީދު ވިދާޅުވިއެވެ.

އަޅުގަނޑު އެނބުރި އަންނަ އިރުގައި އިރާދަކުރެއްވިއްޔާ ހެޔޮ ހާލުގައި، ހެޔޮ ސިއްހަތުގައި އައުން ބޭނުންތެރި ކަމަކަށްވާތީވެ، އަދި ހަމައެއާއިއެކީގައި އަޅުގަނޑު މާލެ އަރާތަނުން އަނެއްކާވެސް އިތުރަށް ބަޔަކު މީހުން މަސައްކަތް ކޮށްގެން އަޅުގަނޑު މަރާލުމަށް ކަންކަން ހިންގާން އުޅޭ އުޅުމެއް އޮވެގެން ނުވާނެކަމަށް އަޅުގަނޑުމެން އެމެންނަށްވެސް އެބަފެނޭ.

– ރައީސް ނަޝީދު ވިދާޅުވިއެވެ.

ރައީސް ނަޝީދު ވިދާޅުވީ އެމަނިކުފާނަށް އަމާޒުކޮށް ދިން ހަމަލާގައި އަވަހާރަ ނުވިޔަސް، އެމީހުންގެ ރޭވުން ވަރަށް ކާމިޔާބު ކަމާއިއެކު ކުރިއަށް ގޮސްފައިވާކަމަށެވެ. މިފަދަ ދެވަނަ ހަމަލާއެއް ތަކުރާރުވެ، އެއްވެސް ރައްޔިތަކަށް މިކަމުގެ ބިރުވެރިކަން ކުރިމަތި ވުމަކީ ވެގެންވާނެ ކަމެއް ނޫންކަމަށް ނަޝީދު ވިދާޅުވިއެވެ.

މިރިޕޯޓުގައި ރައީސް ނަޝީދަށް ޙަމަލާދިން ގޮތް ހިމެނުމުގެ ގޮތުން އެމަނިކުފާނުގެ ޕްރޮފައިލަކާއި، ތްރެޓް ލެވަލް އޮތް މިންވަރުގެ އިތުރުން ތްރެޓް ހިސްޓްރީއާއި، އިންކުއަރީން ބެލި ކަންކަން ވަނީ ހިމަނާފައެވެ.

އެގޮތުން ރައީސް ނަޝީދަށް ހަމަލާދިން ވަގުތު ކަންހިނގާފައިވާ ގޮތާއި، ރައީސް ނަޝީދަށް ލިބިވަޑައިގެންފައިވާ ޒަޚަމްތަކާއި، ޑޮކްޓަރުންގެ ޓީމުގެ މަސައްކަތާއި، ރައީސް ނަޝީދަށް ހަމަލާދިން ދުވަހު ކަންހިނގާފައިވާ ގޮތާއި، ހަމަލާދިނުމަށްފަހު ކަންހިނގާފައިވާގޮތާއި، އޭޑީކޭ ހޮސްޕިޓަލުގެ ފާޚާނާއެއްގެ ތެރެއިން ފެނުނު ފިސްތޯލައާއި ގުޅޭ 4 ކަމަކާއި، އިންޓެލިޖެންސް މައުލޫމާތު އެއްކުރުމާއި، އެމައުލޫމާތު ޙިއްސާކޮށްފައިވާ ކަންކަން މި ރިޕޯޓުގައި ވަނީ ހިމަނާފައެވެ.

މަޖިލީހުން ކުރިއަށްގެންދިޔަ ޕާލިމަންޓްރީ އިންކުއަރީގެ ރިޕޯޓު ސަލާމަތީ ޚިދުމަތްތަކާ ބެހޭ ކޮމިޓީން ފާސްކޮށްފައިވަނީ ޖުމްލަ 45 ހުށަހެޅުމަކާއެކުއެވެ. އޭގެ ތެރޭގައި ހިމެނޭ ބައެއް މުހިއްމު ހުށަހެޅުންތަކަކީ ރައީސް ނަޝީދު އުޅުއްވާ ވަގުތުތަކާއި ނޫޅުއްވާ ވަގުތުގައިވެސް އެ މަނިކުފާނުގެ ގެކޮޅުގެ ސެކިއުރިޓީ ކޮންޓްރޯލްކޮށް، ހަތިޔާރާއެކު 24 ގަޑި އިރު ފޯރިމެރުމާއި، ހަމާލާއާއި ގުޅޭ ކަންކަމުގައި އިހުމާލުވި މީހުންނާއި ޒިންމާ އަދާނުކުރި ފަރާތްތައް ވަކިކޮށް ފިޔަވަޅުއެޅުމާއި، ރައީސް ނަޝީދުގެ ސަލާމަތީ ކަންކަން ބަލަހައްޓާ އޮފިސަރުން އަަހަރަކު އެއް ފަހަރު އެމީހުންގެ މައްސަޢޫލިއްޔަތު އަދާކުރެވޭ ފެންވަރުހުރިތޯ ދެނެގަތުމާއި، އިންޓެލިޖެންސާ ބެހޭ އެކްޓެއް ނުވަތަ ޚާއްސަ ގާނޫނެއް އެކުލަވާލުން ހިމެނެއެވެ.