ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދަށް އަމާޒުކޮށް ދިން ބޮމުގެ ހަމަލާއާ ގުޅިގެން ރައްޔިތުންގެ މަޖިލީހުގެ 241 ކޮމިޓީން ތައްޔާރުކުރި ރިޕޯޓުގައި ފާހަގަކޮށްފައިވާ ކަންކަމަށް ފަސްނުޖެހި އަވަހަށް ފިޔަވަޅު އެޅުއްވުމަށް ރައީސް ނަޝީދު، ރައީސުލްޖުމްހޫރިއްޔާގެ ކިބައިން އެދިވަޑައިގެންފިއެވެ.
ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދަށް ދެމުން ގެންދާ ސަލާމަތާއި ރައްކާތެރިކަން ބްރީޗްވިގޮތުގެ އިންކުއަރީ ރިޕޯޓު، ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދަށް އެރުވުމުމަށް އޮންލައިންކޮށް ބޭއްވި ރަސްމިއްޔާތުގައި ވާހަކަ ދައްކަވަމުން މަޖިލިސް ރައީސް ވިދާޅުވީ ރިޕޯޓަކީ ވަރަށް ރުފިހަމަ ވަރަށް ރަނގަޅު ރިޕޯޓެއް ކަމަށެވެ. ރިޕޯޓުގައި ފާހަގަކޮށްފައިވާ ކަންކަމަށް ލަސްނުކޮށް، ފިޔަވަޅު އެޅުމަކީ އެންމެ މުހިންމު ކަންތައް ކަމަށްވެސް ރައީސް ނަޝީދު ވިދާޅުވިއެވެ.
ނަޝީދު ވިދާޅުވީ މިއީ ވަރަށް ސީރިއަސް އަދި ނުރައްކާތެރި މައްސަލައެއްކަން ދިވެހި ރައްޔިތުން ގަބޫލު ކުރާކަމަށެވެ. މިމައްސަލަ ނުބެލި ލަސްވާނަމަ މިކަމުގެ ގެއްލުން ވެގެންދާނީ ދިވެހި ޤައުމަށް ކަމަށް ނަޝީދު ވިދާޅުވިއެވެ. ރާއްޖެއަކީ ފަތުރުވެރިކަމަށް ބަރޯސާވެފައިވާ ޤައުމަކަށްވާއިރު، ރާއްޖޭގެ އިޤްތިޞާދު ހިފެހެއްޓުމަށްވެސް މިކަމުގައި އަވަސް ފިޔަވަޅު އަޅަންޖެހޭކަމަށް ރައީސް ނަޝީދު ވިދާޅުވިއެވެ.
މައްސަލަ ނުބަލައި ލަސްކޮށްފިނަމަ އިޤްތިޞާދަށް ވަރަށްބޮޑު ގެއްލުމެއްވާނެ. ރާއްޖޭގެ އިޤްތިޞާދު ބަރޯސާ ވެފައިވަނީ ފަތުރުވެރިކަމަށް. ރާއްޖެއަކީ ބޮންގޮއްވާ ތަނަކަށްވެ، ވެރިންނަށް ފަސޭހައިން ހަމަލާދޭ ތަނަކަށް ދުނިޔެއަށް ފެންނަނަމަ، އޭގެ ގެއްލުން ރާއްޖެއަށް ކުރާނެ.
– ނަޝީދު ވިދާޅުވިއެވެ.
ރައީސް ނަޝީދު ވިދާޅުވީ ރިޕޯޓުގައި ފާހަގަކޮށްފައިވާ ކަންކަމަށް ރައީސުލްޖުމްހޫރިއްޔާއާއި، އުއްތަމަ ފަނޑިޔާރު އަވަސް ފިޔަވަޅު ތަކެއް އަޅުއްވާނެކަމަށް ޔަގީން ކުރައްވާކަމަށެވެ. އަދި ރައީސުލްޖުމްހޫރިއްޔާ މިކަމުގައި ފަސްނުޖެހި ކުރިއަށް ދާނެކަމީ ޔަގީންކަމެއްކަމަށް ރައީސް ނަޝީދު ވިދާޅުވިއެވެ.
ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދަށް އަމާޒުކޮށް ދިން ބޮމުގެ ހަމަލާއާ ގުޅިގެން ރައްޔިތުންގެ މަޖިލީހުގެ 241 ކޮމިޓީން ތައްޔާރުކުރި އިންކުއަރީ ރިޕޯޓް މަޖިލީހުން ފާސްކޮށްފައިވަނީ މިދިޔަ ހުކުރުވިލޭރޭގެ ފަތިހުއެވެ. މަޖިލީހުން ފާސްކުރި ރިޕޯޓަށް އެއްވެސް އުނި އިތުރުކަމެއް ނުގެސް، ދައުލަތުގެ ތިން ބާރުގެ އެންމެ އިސްވެރިންނާއި ހިއްސާކުރައްވާނެކަމަށް މަޖިލީހުގެ ރިޔާސަތުން ވަނީ ހާމަކޮށްފައެވެ.
ރައީސުލްޖުމްހޫރިއްޔާގެ އޮފީހުގެ ތަރުޖަމާނު މުހައްމަދު މަބްރޫކް އަޒީޒް ވިދާޅުވީ، ރައީސް މުހައްމަދު ނަޝީދަށް އަމާޒުކޮށް ދިން ބޮމުގެ ހަމަލާއާ ގުޅިގެން ރައްޔިތުންގެ މަޖިލީހުގެ 241 ކޮމިޓީން ތައްޔާރުކުރި ރިޕޯޓް ރަސްމީކޮށް ހިއްސާކޮށްފައި ނުވާކަމަށެވެ. ނަމަވެސް މަޖިލީހުން އާއްމުކޮށްފައިވާ ރިޕޯޓް ކަމާއިގުޅޭ އިދާރާތަކުން ދިރާސާކުރަމުންދާކަމަށް މަބްރޫކް ވިދާޅުވިއެވެ. މަބްރޫކް ވިދާޅުވީ ރިޕޯޓް ފާސްކުރީ ހުކުރު ދުވަހުގެ ފަތިސްވަނިކޮށްކަމުން، ރައީސަށް ރިޕޯޓް ހުށަހެޅުން އަދި ލަސްވެފައިވާކަމަށް ދެކެވަޑައިނުގަންނަވާ ކަމަށެވެ.
241 ކޮމިޓީން ތައްޔާރުކުރި އިންކުއަރީ ރިޕޯޓްގައި ވަނީ ރައީސް މުހައްމަދު ނަޝީދަށް ދިން ހަމަލާއާއި އެމަނިކުފާނަށް ދެއްވަމުންދާ ސެކިއުރިޓީގެ ކަންކަން ދިރާސާކޮށްފައެވެ. އަދި އެކަމާއި ގުޅިގެން ދައުލަތުގެ އިދާރާތަކުން އިސްލާހުކުރަން ފެންނަކަމަށް މަޖިލީހަށް ފެންނަ ކަންކަން މި ރިޕޯޓުގައި ފާހަގަކޮށްފައިވެއެވެ.
