ބްރެޒިލް ބަލިކޮށް އާޖެންޓީނާއިން 28 އަހަރަށް ފަހު ކޮޕާ އެމެރިކާގެ ޗެމްޕިއަންކަން ހޯދައިފިއެވެ.
ބްރެޒިލްގެ މަޝްހޫރު މަރަކާނާ ސްޓޭޑިއަމްގައި މިއަދު ފަތިހު ކުޅުނު ފައިނަލް މެޗުގައި ބްރެޒިލްގެ މައްޗަށް އާޖެންޓީނާ ކުރިހޯދީ 0-1 ގެ ނަތީޖާއަކުންނެވެ.
މި ނަތީޖާއާއެކު އާޖެންޓީނާގެ ކެޕްޓަން ލިއޮނަލް މެސީއަށް ވަނީ އާޖެންޓީނާއާއެކު ފުރަތަމަ ތަށި ކާމިޔާބުކުރެވި، ކެރިއަރުގައި އެންމެ ބޮޑަށް އުންމީދުކުރި ހުވަފެން ހަގީގަތަކަށް ވެފައެވެ. އާޖެންޓީނާއިން އެންމެފަހުން ކޮޕާ އެމެރިކާ ކާމިޔާބުކޮށްފައިވަނީ 1993 ވަނަ އަހަރުގައެވެ. އަދި މިއީ ބްރެޒިލްގައި ބޭއްވި ކޮޕަ އެމެރިކާ ފުޓްބޯޅަ މުބާރާތެއްގައި އެ ޓީމަށް ތަށި ނުލިބި ނިންމާލަން ޖެހުނު ފުރަތަ ފަހަރެވެ.
މުބާރާތުގެ އެންމެ ފަހުގެ ޗެމްޕިއަން ބްރެޒިލްއާއި ދެކޮޅަށް އާޖެންޓީނާ ކުޅުނު ފައިނަލް މެޗުގައި ޖެހި ހަމައެކަނި ލަނޑު އެޓީމުން ކާމިޔާބުކުރީ މެޗުގެ ފުރަތަމަ ހާފުގައެވެ. މި ލަނޑު 21 ވަނަ މިނެޓުގައި ކާމިޔާބުކޮށްދިނީ، އެންހެލް ޑި މާރިއާއެވެ. ޑިމާރިއާ މި ލަނޑު ޖެހީ ކީޕަރ ބޯ މަތިން ބޯޅަ ގޯލުގެ ތެރެއަށް ފޮނުވާލައިގެންނެވެ.
މިއީ އާޖެންޓީނާއިން ކޮޕަ އެމެރިކާ ކާމިޔާބުކުރި 15 ވަނަ ފަހަރެއެވެ.
