އަޔުޝްމާން ކުރާނާ އާއި ނުޝްރަތު ބަރޫޗާ ލީޑްރޯލުން ފެނިގެން ދިއަ ފިލްމް "ޑްރީމް ގާލް" ގެ ސީކުއަލް އެއް ހެދުމުގެ މަސައްކަތް ކުރަމުންދާކަމަށް ރިޕޯޓްތަށް ބުނެފިއެވެ.
2019 ވަނަ އަހަރުގެ ހިޓް ފިލްމް "ޑްރީމް ގާލް" އަކީ ރާޖް ޝާންދިލްއާ ލިއެ ޑައިރެކްޓް ކޮށްފައިވާ ފިލްމެކެވެ. މި ފިލްމުގެ ޕްރޮޑިއުސަރަކީ އެކްތާ ކަޕޫރެވެ.
"ޑްރީމް ގާލް" އަށް ލިބުނު ބޮޑު ތަރުހީބުގެ ސަބަބުން ފިލްމްގެ ޕްރޮޑިއުސަރުން މި ފިލްމުގެ ސީކުއަލްއެއް ހެދުމުގެ މަސައްކަތް ކުރަމުން ދާކަމަށާއި ނަމަވެސް އަދި ވަކިގޮތެއް ނުނިމޭކަމަށް ޚަބަރުތައް ބުނެއެވެ. ނަމަވެސް މިހާރު ފިލްމްގެ ވާހަކަ ވަރަށް ބޮޑަށް ނިމިފައިވާ ކަމަށްވެސް މައުލޫމާތު ލިބެއެވެ. ވާހަކަ ލަސްވެގެން އުޅެނީ ރާޖް ޝާންދިލްއާގެ އިތުރު ވާހަކަތަކެއްވެސް ނުނިމި ހުރުމުގެ ސަބަބުންނެވެ.
ރިޕޯޓްތައް ބުނާގޮތުގައި މި ފިލްމުންވެސް ފެނިގެން ދާނީ އަޔުޝްމާން ކުރާނާއެވެ.
"ޑްރީމް ގާލް" ގައި ފެނިގެން ދިޔައީ އަންހެން އަޑުން ވާހަކަ ދައްކަން މޮޅު ފިރިހެނެއްގެ ވާހަކަ ތަކެކެވެ. އަދި ވަޒީފާއެއް ކޮންމެހެން ބޭނުންވެގެން އޭނާ ކޯލްސެންޓަރެއްގައި އަންހެނެއްގެ އަޑުން ކޯލްތަކަށް ޖަވާބުދޭ މީހެއްގެ ގޮތުގައި ހަރަކާތްތެރިވާ މަޖާ ހާދިސާ ތަކެއް ފިލްމުން ވަނީ ގެނެސްދީފަ އެވެ.
