ޒުވާން ބަތަލާ ކްރިތީ ސެނޮން ގެ "މީމީ" މި މަހުގެ 30 ގައި ރިލީޒްކުރާ ގޮތަށް ހަމަޖެހިއްޖެ އެވެ.
މި ފިލްމު މި މަހުގެ 9 ވަނަ ދުވަހަށްވެސް މީގެ ކުރިން ތާވަލް ކުރިއެވެ. އަދި މިއީ ކުރިން ސިނަމާތަކުގައި އެޅުވުމަށް ނިންމާފައި އޮތް ފިލްމެކެވެ. ނަމަވެސް ކޯވިޑްގެ ބަލިމަޑުކަމުގެ ސަބަބުން ފިލްމު އޮންލައިން ޕްލެޓްފޯމްގައި ރިލީޒްކުރަން ޕްރޮޑަކްޝަން ޓީމުން ނިންމީއެވެ.
މަސައްކަތް ނިމިފައިވާ މި ފިލްމް ރިލީޒް ކުރާގޮތަށް ހަމަޖެހިފައިވަނީ ނެޓްފްލިކްސްގެ އިތުރުން ޖިއޯ ސިނަމާގަ އެވެ. ފިލްމުގެ ބަތަލާ ކްރިތީ ވަނީ ފިލްމްގެ ޓްރެއިލާ އަންނަ އަންގާރަ ދުވަހު ފެނިގެންދާނެ ކަމަށްބުނެ ސޯޝަލް މީޑިއާގައި ފިލްމުގެ ޕޯސްޓަރެއްވެސް ހިއްސާކޮށްފަ އެވެ.
View this post on Instagram
މަރާޓި ފިލްމެއްގެ މައްޗަށް ބިނާކޮށް ހަދާފައިވާ މި ފިލްމުން ކްރިތީ ފެނިގެންދާނީ ސަރޮގޭޓް މައެއްގެ ރޯލުން ނެވެ. "މިމީ" އަކީ ކްރިތީގެ 2019 ވަނަ އަހަރުގެ ފިލްމު "ލުކާ ޗުއްޕީ"ގެ ޑައިރެކްޓަރު ލަކްޝްމަން އުޓޭކަރް ޑައިރެކްޓުކޮށްފައިވާ ފިލްމެކެވެ.
ކްރިތީގެ އިތުރުން ފިލްމުގެ މުހިންމު ރޯލްތައް އަދާކޮށްފައިވާ ތަރިންނަކީ މަނޯޖް ޕަހްވާ، ސުޕްރިޔާ ޕާޓަކް، އަދި ޕަންކަޖް ތުރިޕާޓީ އެވެ.
