ހިންދީ ފިލްމް "ޝޭރްނީ"އަށް ފަހު ބޮލީވުޑްގެ ތަރި ވިދްޔާ ބާލަންއަށް އަންނަނީ އެތަށް ތައުރީފެއް އޮހެމުންނެވެ. ވިދްޔާ އޭނާގެ ފިލްމު ތަކުގައި އިޖުތިމާއީ މައްސަލަ ތަކަށް އަމާޒުކޮށްފައި ވުމީ ގިނަ ބެލުންތެރިން ވިދްޔާ ގެ ރޯލްތަށް ބަލައިގަންނަ އެއް ސަބަބެއެވެ.
އަންހެނުން ބާރުވެރިކުރުވުމުގެ އިތުރުން މުޖުތަމައުގައި ހިނގާ ގިނަ މައްސަލަތަކެއް އެންމެ ފުރިހަމައަށް ބެލުންތެރިންނަށް ވިދްޔާ ގެނެސްދީފައި ވާތީ މިކަން ވަނީ އިންޑިއާގެ ސަރުކާރުންވެސް ފާހަގަ ކޮށްފައެވެ.
އިންޑިއާގެ އެކަޑަމީ އޮފް މޯޝަން ޕިކްޗާސް އާޓް އެންޑް ސައިންސް އިން ވަނީ އެ އެކަޑަމީގެ ބޯޑު މެމްބަރަކަށް ވުމަށް ވިދްޔާއަށް ހުށައަޅާފައެވެ. މީގެ އިތުރުން ކަޝްމީރުގައި ހުންނަ އިންޑިއާ ސިފައިންގެ ފަޔަރިން ރޭންޖަކަށް ވަނީ ވިދްޔާ ބާލަން ފަޔަރިން ރޭންޖްގެ ނަމުން ނަންދީފަ އެވެ. މިއީ ކަޝްމީރުގެ ގުލްމާގުގައި ސިފައިންގެ ތަމްރީންތަކަށް ބޭނުންކުރާ މިލިޓަރީ ފަޔަރިން ރޭންޖެކެވެ.
މި އަހަރު ކުރީކޮޅުގައި އިންޑިއާ ސިފައިން ބޭއްވި ގުލްމާގުގައި ވިންޓަރ ފެސްޓިވަލްގައިވެސް ވިދްޔާ އާއި ފިރިމީހާ ސިދާތު ރޯއީ ކަޕޫރު ބައިވެރި ވެފައި ވެއެވެ.
އިޖްތިމާއީ އަދި މުޖުތަމައުއަށް ރަނގަޅު މެސެޖުތަށް ފޯރުކޮށްދޭފަދަ ކެރެކްޓާތަކަށް އިސްކަންދޭ ވިދްޔާގެ ކާމިޔާބު "ޝޭރްނީ"އަށް ފަހު ދެންއެންމެ އަވަހަށް ފެނިގެން ދާނީ ސުރޭޝް ގެ ފިލްމަކުންނެވެ. މީ ވިދްޔާގެ ކާމިޔާބު ފިލްމް "ތުމާރީ ސުލޫ"ގެ ވެސް ޑައިރެކްޓަރެވެ.
