އިޤްތިސާދީ ކުރިއެރުމަށް މިހާރު އޮތް އެންމެ ބޮޑު ހުރަހަކީ, ކޯވިޑް ޕޮޒިޓިވްވާ ރޭޓް އިތުރުވެދާނެ ކަމުގެ ބިރުކަމަށް ފިނޭންސް މިނިސްޓަރ އިބްރާހީމް އަމީރު ވިދާޅުވެއްޖެއެވެ.
ކޯވިޑް ވެކްސިންގެ ނުވަ ލައްކަ ޑޯޒަށް ދައުލަތުން 69 މިިލިއަން ރުފިޔާ (4.5 މިލިއަން ޑޮލަރު) ހަރަދުވާނެ ކަމަށް މިނިސްޓަރ ވިދާޅުވެފައިވާ ވިދާޅުވުމަށް އިޝަރާތްކުރައްވާ އަމީރު ވިދާޅުވީ، އިޤްތިސާދީ ކުރިއެރުމަށް މިހާރު އޮތް އެންމެ ބޮޑު ހުރަހަކީ, ކޯވިޑް ޕޮޒިޓިވްވާ ރޭޓް އިތުރުވެދާނެ ކަމުގެ ބިރުކަމަށެވެ. އެހެންކަމުން އިޤްތިސާދަށް މިހާރު ދެވޭނެ އެންމެ ބޮޑު ފަރުވާއަކީ, ވީހާވެސް ގިނަބަޔަކު, ވީ އެންމެ އަވަހަކަށް ވެކްސިން ޖެހުންކަމަށް އަމީރު ވިދާޅުވިއެވެ.
އޭރުން, މިހާރު އެޗްޕީއޭ އިން ދީފައިވާ ލުއިތަކާއި އެއްގޮތަށް އިޤްތިސާދު އިޔާދަކޮށް އާރާސްތުކުރުމުގެ ފުރުސަތު ލިބޭނެ. ހުރިހާ ބޭފުޅުންވެސް އަވަހަށް ވެކްސިންޖެހުން ވަރަށް މުހިއްމު.
– އިބްރާހީމް އަމީރު
މިނިސްޓަރ އަމީރު މިހެން ވިދާޅުވެފައިވާއިރު، ސަރުކާރުން ހޯދަން އެއްބަސްވެފައިވާ އަދަދުގެ ތެރެއިން މިހާތަނަށް 40 މިލިއަން ރުފިޔާ (2.6 މިލިއަން ޑޮލަރު) ދައުލަތުން ވެކްސިނަށް ހޭދަކޮށްފައިވެއެވެ.
ރާއްޖެއިން ކޯވިޑް-19ގެ ވެކްސިން ގެނައުމަށް ސިންގަޕޫރުގެ އެސްޓްރަޒެނެކާ ކުންފުންޏާއެކު ސޮއިކޮށްފަިއ ވީނަމަވެސް، ސަރުކާރުން ދިން ތާރީޚަށް އަދިވެސް ވެކްސިން ރާއްޖެއަށް އައިސްފައިނުވެއެވެ. ރާއްޖޭގައި ކޯވިޑް ވެކްސިން ލިބުމުގައި ދަތިވެފައިވާއިރު، މިހާރު ޖަހަމުން ދަނީ އަމިއްލަ ފަރަތަކުން ހަދިޔާކުރި ވެކްސިންކަމަށް ސަރުކާރުން ހާމަކޮށްފައިވެއެވެ.
