ރާއްޖޭގައި އިސްލާމީ ކަންކަން ހިންގުމުގެ ހުރިހާ ކަމެއް ރައީސުލްޖުމްހޫރިއްޔާ ކަނޑައަޅުއްވާ ވުޒާރާއެއްގެ ބަދަލުގައި މިނިވަން މުއައްސަސާއެއް އުފައްދަވައި، އިސްލާމީ ކަންތައްތަކާ ބެހޭ އެންމެ މަތީ މަޖުލިސް އެއް ޤާއިމްކުރުމަކީ މުހިންމު ކަމެއް ކަމުގައި ކުރީގެ އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެެވެ.
ރާއްޖޭގެ އިސްލާމީ ކަންކަން މިހާރު ކުރިއަށް ގެންދިއުމުގައި ހުރި ހުރަސްތަކާއި ގުޅޭގޮތުން ޑރ.ޝަހީމް ވިދާޅުވީ، ވަކި ވުޒަރާއެއްގެ ދަށުގައި އިސްލާމީ ހުރިހާކަމެއް ބެލެހެއްޓެމުގެ ބާރު އޮތުމުގެ ބަދަލުގައި މިނިވަން މުސްތަގިއްލު ތަނެއް އޮތުން މާ ރަނގަޅު ވާނެކަމަށެވެ. އެގޮތުން އިސްލާމީ ކަންތައްތަކާ ބެހޭ އެންމެ މަތީ މަޖުލިސް ރާއްކޭގައި ގާއިމް ކުރުމަކީ މުހިންމު ކަމެއްކަމަށް ޑރ.ޝަހީމް ވިދާޅުވިއެވެ.
ރާއްޖޭގެ އިސްލާމީ ކަންކަން ހިންގުމުގެ އިދާރީ އެންމެހާ ކަންކަމެއް އެކައުންސިލްގެ އިޚުތިޞާޞްގެ ތެރޭގައި ހިމަނައި މިނިވަން މުސްތަޤިއްލު ތަނެއްގެ ގޮތުގައި ޤާނޫނެއްގެ ދަށުން،" އިސްލާމީ ކަންތައްތަކާ ބެހޭ އެންމެ މަތީ މަޖުލިސް" ރާއްޖޭގައި ޤާއިމުކުރުމަކީ، މުހިންމުކަމެއްގެ ގޮތުގައި ދެކެން.
– ޑރ.ޝަހީމް ވިދާޅުވިއެވެ.
ޝަހީމް ވިދާޅުވީ ވަކި ވުޒާރާއެއްގެ ބަދަލުގައި މިފަދަ ކައުންސިލެއް އެކުލަވާލެވިއްޖެނަމަ ތަފާތު ނުފޫޒުތަކުން އެއްކިބާވެ، އިސްލާމީ ކަންކަން ރާއްޖޭގައި ހިންގުމަށް ފުރުސަތު ފަހިވެގެން ދާނެކަމަށެވެ. އަދި މިގޮތަށް ކަންކަން ބަދަލުވެއްޖެނަމަ އެކި ނުފޫޒުތަކުން އެއްކިބާވެ، މިނިވަންކަމާއިއެކު ކަންކަން ނިންމުމުގެ އިހުތިޔާރު ލިބިގެންދާނެކަމަށް ގަބޫލު ކުރައްވާކަމަށެވެ.
ވުޒާރާއެއްގެ ބަދަލުގަައި މިގޮތައް ކައުންސިލެއް ޤާއިމުކުރެވިއްޖެ ނަމަ ތަފާތު ނުފޫޒުތަކުން އިސްލާމީ ކަންކަން މިނިވަންވެ، އެކަންކަމުގެ މަަޞްލަޙަތު ދެމެހެއްޓި މަސްރަޙަށް އަންނަ ސިޔާސީ ބަދަލުތަކުން އެކަންކަން ސަލާމަތްވެ ޤައުމީ ދީނީ ކަންކަން ދެމެހެއްޓެނިވި ގޮތެއްގައި ޤާއިމުކުރެވޭނެ.
– ޑރ.ޝަހީމް ވިދާޅުވިއެވެ.
އިސްލާމީ ކަންކަން ކުރިއެރުވުމާއި ދީނީ ގޮތުން ޚިލާފްތައް އުފެދޭ ދުވަސްތަކުގައި ދީނީ ގޮތުން އެ ކަންކަން އޮތް ގޮތް ސާފު ކޮށްދިނުން ފަދަ ކަންކަން އިސްލާމިކް މިނިސްޓްރީއަށް ނުކުރެވޭ ކަމަށް ބުނެ ބައެއް ފަރާތްތަކުން ދަނީ ކަންބޮޑުވުން ފާޅު ކުރަމުންނެވެ.
