ކޯވިޑުން ރައްކާތެރިވުމަށްޓަކާ ޖަހާ ވެކްސިންގެ ދެވަނަ ޑޯޒް ޖަހައި އިއްޔެ އެކަނިވެސް 4982 މީހުން ވެކްސިން ފުރިހަމަ ކޮށްފި އެވެ.
ރާއްޖޭގައި މިހާރު ވަނީ ކޮވިޝީލްޑްގެ ދެ ވަނަ ޑޯޒް ނުޖެހި ތިބި މީހުނަށް ދެ ވަނަ ޑޯޒް ޖަހަން ފަށާފަ އެވެ. މިއާއެކު ވެކްސިން ފުރިހަމަ ކުރާ މީހުންގެ އަދަދު މިވަނީ މައްޗަށް ޖެހިލާފަ އެވެ.
ރާއްޖޭގައި މިހާތަނަށް 199،784 މީހުން މިވަނީ ކޯވިޑް ވެކްސިން ފުރިހަމަކޮށްފަ އެވެ.
އެޗްޕީއޭއިން އާޢްމުކޮށްފައިވާ އެންމެފަހުގެ ތަފާސްހިސާބަށް ބަލާއިރު އިއްޔެގެ ވެކްސިންގެ ދެވަނަ ޑޯޒް ޖެހި މީހުންގެ ތެރޭގައި ހިމެނެނީ މާލެ ސަރަޙައްދުން ވެކްސިންޖެހި 4174 މީހުންނާއި އަތޮޅުތެރޭގެ ރަށްތަކުން ވެކްސިން ޖެހި 808 މީހުންނެވެ.
ވެކްސިންގެ ފުރަތަމަ ޑޯޒު ދިނުމުގެ މަސައްކަތްވެސް ކުރިއަށްދާއިރު އިއްޔެ 151 މީހަކުވަނީ ވެކްސިންގެ ފުރަތަމަ ޑޯޒް ޖަހާފައެވެ. މީގެތެރޭގައި ހިމެނެނީ މާލެ ސަރަޙައްދުން ވެކްސިންޖެހި 33 މީހުންނާއި އަތޮޅުތެރެއިން ވެކްސިން ޖެހި 118 މީހުންނެވެ. މިއާއެކު ވެކްސިންގެ ފުރަތަމަ ޑޯޒް ޖެހި މީހުންގެ އަދަދު މިހާރު ވަނީ 317،549 އަށް އަރާފަ އެވެ.
މުޅި ރާއްޖޭގައި ޢުމުރުން 18 އަހަރާއި 60 އަހަރާ ދެމެދުގެ މީހުންނަށް ސިނޯފާމް ވެކްސިންގެ ފުރަތަމަ ޑޯޒާއި 2ވަނަ ޑޯޒް ޖަހަމުން އަންނައިރު، ކޮވިޝީލްޑްގެ ދެވަނަ ޑޯޒްވެސް މިހާރު ވަނީ އަލުން ޖަހަން ފަށާފަ އެވެ. އެގޮތުން މާލެއާއި ވިލިމާލެއާއި ހުޅުމާލެ ހިމެނޭހެން 6 ސެންޓަރެއްގައި ވެކްސިން ދިނުން އެޗްޕީއޭއިން ކުރިއަށްގެންދެ އެވެ. އަދި ގޭގެއަށް ގޮސްގެން ވެކްސިން ދިނުމަށް މާލެސަރަހައްދުގައި 2 މޮބައިލް ޓީމް ހަރަކާތްތެރިވަމުން ދެއެވެ. އަތޮޅުތަކުގައި 193 ވެކްސިން ސެންޓަރުން އަންނަނީ ވެކްސިންދެމުންނެވެ.