މަޝްހޫރު ކޮރެއޮގްރާފަރ ސަރޯޖް ޚާންގެ ބަޔޮޕިކް އިއުލާންކޮށްފި އެވެ.
ޓީ ސީރީޒްގެ ވެރިޔާ ބޫޝަން ކުމާރު މި ބަޔޮޕިކް ހަދާނެ ކަން އިއުލާން ކޮށްފައި މިވަނީ މީގެ ދުވަސްކޮޅެއް ކުރިން، ސަރޯޖް ޚާން މަރުވިތާ އެއް އަހަރު ފުރުނު ދުވަހު އެވެ. ސަރޯޖް ހާން މަރުވެފައި ވަނީ މިދިއަ އަހަރުގެ ޖުލައި 3ގައި އުމުރުން 71 އަހަރުގަ އެވެ.
ސަރޯޖު މަރުވެފައި ވަނީ ހާޓް އެޓޭކެއް ޖެހިގެންނެވެ. އޭނާ މަރުވެފައިވަނީ ނޭވާ ލާން އުދަގޫވެގެން ހޮސްޕިޓަލުގައި އެނދުމަތިކުރިތާ ދުވަސްތަކެއް ފަހުންނެވެ.
ސަރޯޖް ޚާން މަރުވިތާ މަސްތަކެއް ފަހުން ރެމޯ ޑިސޫޒާ ވެސް ވަނީ އޭނާގެ ބަޔޮޕިކެއް ހެދުމަށް ބޭނުންވާކަން އިއުލާން ކޮށްފަ އެވެ. މީގެ އިތުރުން ރެމޯ ބުނެފައިވާ ގޮތުގައި ބަޔޮޕިކެއް ހެދުމާއި ގުޅޭ ގޮތުން އޭނާ، ސަރޯޖް ޚާން އާއި ވާހަކަވެސް ދެއްކިއެވެ. އަދި އެ ބައްދަލުވުމުގައި ސަރޯޖް ވަނީ އޭނާގެ ބަޔޮޕިކެއް ހަދަނީކަމުގައި ވަނީނަމަ އެކަން ވާނީ ރެމޯއަށް ކަމަށް ބުނެފަ އެވެ. ސަބަބީ ރެމޯ އަކީ ވެސް މޮޅު ނެށުންތެރިއަކަށް ވުމުގެ އިތުރުން މި ދާއިރާގައި ކުރިމަތިވާނެ ގޮންޖެހުންތައް ވެސް ވަރަށް ރަނގަޅަށް އެނގޭނެ މީހަކަށް ވާތީއެވެ.
40 އަހަރަށް ވުރެ ގިނަ ދުވަސްވީ ކެރިއަރުގައި ސަރޯޖް ހާން ވަނީ 2000 އަށްވުރެ ގިނަ ލަވަ ކޮރެއޮގްރާފް ކޮށްދީފަ އެވެ. އަދި އޭނާއަށް ވަނީ 3 ފަހަރު ނެޝެނަލް އެވޯޑްވެސް ލިބިފަ އެވެ. އެއީ ފިލްމް "ދޭވްދާސް"ގެ "ޑޯލަރެ ޑޯލަރެ" އާއި ފިލްމް "ތޭޒާބް"ގެ "އޭކް ދޯ ތީން" ގެ އިތުރުން ފިލްމް "ޖަބް ވީ މެޓް"ގެ "ޔޭ އިޝްގް ހާއި" ލަވައަށެވެ.
ސަރޯޖް އެންމެ ފަހުން ކޮރެއޮގްރާފް ކޮށްފައިވަނީ މާދުރީ ޑިކްސިޓްގެ "ތަބާ ހޯގައޭ" ލަވަ އެވެ. މި ލަވަ އަކީ 2019 ގެ ފިލްމް "ކަލަންގް"ގެ ލަވައެކެވެ.
