އުމުރުން 84 އަހަރުގެ، ނަސާރާ ދީނުގެ އެންމެ އިސް ފާދިރީ، ޕޯޕު ފުރާންސިސް އިޓަލީގެ ރޯމުގައި އާދީއްތަ ދުވަހު، ބޮޑު ގޮހޮރުގެ އޮޕަރޭޝަންއެއް ކޮށްފިއެވެ.
ނަސާރާ ދީނުގެ އެންމެ އިސް އަދި ރަސްމީ ކިއްލާ ކަމުގައިވާ އިޓަލީގެ ރޯމުގައި ހުންނަ ވެޓިކަންއިން ނެރުނު ބަޔާނެއްގައި ބުނެފައިވަނީ، މި އޮޕަރޭޝަން ކޮށްފައިވަނީ، ބޮޑު ގޮހޮރު (ލާޖް ކޯލޯން) ދުޅަވުމުގެ ސަބަބުން ކަމުގައެވެ.
ވެޓިކަންއިން ހާމަ ކޮށްފައިވާ ގޮތުގައި، ޕޯޕު އެޑްމިޓް ކޮށްފައިވަނީ، ގެމެލި ޔުނިވަރސިޓީ ހޮސްޕިޓަލުގައި "ސިޕްޓޮމެޓިކް ޑައިވާރޓިކިއުލަރ ސްޓެނޯސިސް އޮފް ދަ ކޯލޯންގެ ކުރިންވެސް ޝެޑިއުލް ކުރެވިފައިވާ" އޮޕަރޭޝަނެއް ކުރުމަށެވެ.
ބައެއް މީޑިއާތަކުން ރިޕޯޓު ކޮށްފައިވާ ގޮތުގައި ޕޯޕަށް ކުރިމަތިވެފައިވާ މައްސަލައަކީ، ބޮޑު ގޮހޮރުގެ ޑައިވާރޓިކިއުލަމް ނަމަކަށް ކިޔާ ސަރަހައްދެއް ދުވަޅަވެ އެކަމުގެ ވޭނެވެ. ޑައިވާރޓިކިއުލަމް އަކީ، ބޮޑު ގޮހޮރު (ކޯލޯން)ގެ ގައި އުފެދޭ ދުޅަގަޑެކެވެ. މީގެ މައްސަލައަކީ، އުމުރުން ދުވަސްވާ ވަރަކަށް ވަރަށް ގިނަ މީހުންނަށް ކުރިމަތިވާ މައްސަލަތަކެކެވެ.
މި މައްސަލަ ކުރިމަތިވީމަ ކުރިމަތިވާ ސިއްޙީ މައްސަލަ ކަމަށް ޑޮކްޓަރުން ވިދާޅުވަނީ، އާދަޔާ ޚިލާފަށް ބޮޑު ގޮހޮރުގައި ޖާގަ ކުޑަވުމުގެ މައްސަލައެވެ.
ޕޯޕުގެ މި އޮޕަރޭޝަން ނިމުމުން، ޕޯޕުގެ ސިއްޙީ ހާލަތާ ގުޅޭ ޚާއްސަ "ހެލްތު ބުލެޓިން"އެއް ނެރުމަށް ވަނީ ހަމަޖެހިފައެވެ.
1963ވަނަ އަހަރުގެ ޑިސެމްބަރު މަހު އާޖެންޓީނާއަށް އުފަންވި ޕޯޕުގެ އުމުރުން އެންމެ 21 އަހަރުގައި އޭނާގެ ކަނާތު ފުއްޕާ މޭގެ ބައެއް ވަނީ ހލާާކުވެފައެވެ. އަދި އަބަދުވެސް އޭނާއަކީ އުނަގަޑުގެ މައްސަލަ ހުންނަ މީހެކެވެ.
