އިރާނުން އެހީތެރިވެދޭ ޔަމަނުގެ ހޫތީ ހަގުރާމަވެރިން ވަގަށް ނަގާފައިވާ ޔަމަނުގެ މޮޑެލް، ޖަލުގައި ދަންޖެހެން މަސައްކަތް ކޮށްފައިވާ ކަމަށް އޭނާގެ ގާނޫނީ ވަކީލާއި ހަވާލާދީ މީޑިއާތަކުން ރިޕޯޓު ކޮށްފިއެވެ.
ހޫތީ ހަގުރާމަވެރިން ވަނީ އޭނާ ވަގަށް ނެގުމަށްފަހު އޭނާގެ މައްޗަށް ޝަރީއަތްވެސް ކޮށްފައެވެ.
ޔަމަނުގެ މޮޑެލްއެއް ކަމުގައިވާ އެންޓިސާރު އަލް-މައްމާދީ އަށްވަނީ، އޭނާ ދަންޖެހެން މަސައްކަތް ކުރުމުގެ ތެރޭގައި ލިބުނު އަނިޔާތަކަށް، ފަރުވާ ދިނުމަށްޓަކާ ވެރިރަށް ސަނާގެ ހޮސްޕިޓަލެއްގައި އޭނާ އެޑްމިޓް ކޮށްގެން ފަރުވާވެސް ދީފައިކަމަށް މީޑިއާތަކުން ވަކީލާއި ހަވާލާދީ ރިޕޯޓު ކޮށްފައި ވެއެވެ.
އަލް ހައްމާދީގެ ގާނޫނީ ވަކީލާއި ހަވާލާދީ މީޑިއާތަކުން ރިޕޯޓު ކޮށްފައިވާ ގޮތުގައި، ހޫތީން އޭނާ ހައްޔަރު ކުރުމަށްފަހު، ހަށިވިއްކާ މީހުން ހައްޔަރުކޮށްފައި ތިބޭ ބަޔަށް އޭނާ ބަދަލުކުރިފަހުން އޭނާއަށްވަނީ ނަފްސާނީ ބޮޑެތި މައްސަލަތަކާ ކުރިމަތިލާން ޖެހިފައެވެ.
"ހޫތީން އޭނާގެ ކަރާމާތް ގެއްލުވާލާފައިވާތީ އޭނާއަށް ވަނީ ނަފްސާނީ ބޮޑެތި މައްސަލަތަކާ ކުރިމަތި ލާން ޖެހިފައި،" ގާނޫނީ ވަކީލު ޚާލިދު އަލް ކަމާލް ވިދާޅުވެފައި ވެއެވެ.
އުމުރުން 20 އަހަރު މޮޑެލްއެއް އަދި ފިލްމީ ތަރިއެއްކަމުގައިވާ ހައްމާދީ ހޫތީން ހައްޔަރު ކޮށްފައިވަނީ މިއަހަރުގެ ފެބްރުއަރީ މަހުއެވެ. އަދި އެއަށްފަހު ހޫތީން ވަނީ، އޭނާގެ މައްޗަށް ތަހުގީގެއް ހިންގާ، އޭނާއަށް އަނިޔާކޮށްފައެވެ. އަދި އޭނާ އެތައް ދުވަހެއްވަންދެން ގިނިކަންޒާ ކުޑަގޮޅީގައި ހައްޔަރު ކޮށްފައިވެސް ވެއެވެ.
އަދި އޭނާ ހައްޔަރު ކުރުމަށްފަހު، ނަސްލީ ގޮތުންނާއި އަދި ޖިންސީ ގޮތުންވެސް އޭނާއާއިމެދު އެތަކެއް ތަފާތުކުރުންތަކެއް ގެންގުޅެ، އަނިޔާ ދީފައިވާ ކަމަށްވެސް، އިންސާނީ ހައްގުތަކަށް މަސައްކަތް ކުރާ ފަރާތްތަކުން ބުނެފައި ވެއެވެ.
ހޫތީން އަލް ހައްމާދީގެ މައްޗަށް ކޮށްފައިވާ ތުހުމަތަކީ ހަށިވިއްކުމާއި، ޑްރަގްގެ ވިޔަފާރި ކުރުމާއި، އިސްލާމީ އުސޫލުތަކާ ޚިލާފަށް އުޅުމުގެ ތުހުމަތެވެ. އަދި މީގެ އިތުރުން އޭނާގެ ގަނޫނީ ވަކީލަށް އޭނާގެ މައްޗަށް ކުރެވޭ ތުހުމަތުތަކާ ގުޅޭ ލިޔެކިޔުންތައްވެސް ފޯރު ކޮށްދީފައެއް ނުވެއެވެ.
އެހެންނަމަވެސް، ހައްމާދީވަނީ މިހުރިހާ ތުހުމަތުތަކަށްވެސް އިންކާރު ކޮށްފައެވެ.
ހައްމާދީގެ ގާނުނީ ވަކީ ވިދާޅުވެފައިވަނީ، ދުނިޔޭ އިންސާނީ ހައްގުތަކަށް ވަކާލާތުކުރާ އެތަކެއް ޖަމިއްޔާތަކުގެ ގޮވާލުމާ އެކުވެސް، ހޫތީން އޭނާ ދޫކުރުމަށް ދެކޮޅު ަހަދާފައިވާ ކަމަށާއި އަދި އެއްވެސް މީޑިއާއަކުން އޭނާގެ މައްސަލަ ރިޕޯޓުކުރުންވެސް ހުއްޓުވާފައިވާ ކަމަށެވެ.
ފަހަކަށް އައިސް ހޫތީންވަނީ، އަންހެނުންނާ ދެކޮޅަށް ހިންގޭ ލާއިންސާނީ އަމަލްތައް އިތުރު ކޮށްފައެވެ. މީގެތެރޭގައި، އައިސިސް ޖަމާއަތުން ގެންގުޅުން ޒާތުގެ އުސޫލުތައް ތައާރަފްކޮށް، އަންހެނުން ކެފޭ ރެސްޓޯރަންޓްތަކުގައި މަސައްކަތް ކުރުން މަނާކޮށް، ދަރިން ހޯދުން ކޮންޓްރޯލް ކުރުމުގެ ވަސީލަތްތަކަށް ބޭނުންވާ އެއްވެސް އެއްޗެއް ގަތުމުގެ ކުރިން ފިރިމީހާގެ ހުއްދަ ހޯދުން މަޖުބޫރުކޮށް، އަދި ޔުނިވަރސިޓީތަކުގައި، އަންހެން ކުދިންނާއި ފިރިހެން ކުދިން، ކޮންކުރީޓް ފާރުތަކުން ވަކިކޮށްފައިވާ ކްލާސް ރޫމްތަކުގައި ވަނީ ބައިތިއްބަން ފަށާފައެވެ.
