އިސްރާއީލުގެ އާ ފޮރިންގ މިނިސްޓަރ ޔުނައިޓެޑް އަރަބި އެމިރޭޓްސްއަށް މިހާރު ކުރައްވަމުން ގެންދަވާ ދަތުރުފުޅުގައި، އެގައުމުގައި ފުރަތަމަ ފަހަރަށް އިސްރާއީލުގެ އެމްބަސީއެއް ހުޅުވައިފިއެވެ.
ފާއިތުވެދިޔަ އަހަރު އަރަބި ބައެއް ގައުމުތަކުން އިސްރާއީލާއެކު ސިޔާސީ ގުޅުން ގާއިމްކުރިފަހުން، އިސްރާއީލުގެ ކެބިނެޓް ވަޒީރަކު އަރަބި ގައުމަކަށް ކުރައްވަމުން ގެންދަވާ ދެ ދުވަހުގެ މި ދަތުރުފުޅުގައި، ޔައިރ ލަޕިޑް ޔޫއޭއީގެ ދުބާއީގަވެސް އިސްރާއީލުގެ ކޮންސިއުލޭޓެއް ހުޅުވުމަށް ވަނީ ހަމަޖެހިފައެވެ. އަދި މި ދަތުރުފުޅުގައި އިގްތިސާދީގޮތުން އެއްބާރުލުން ދިނުމުގެ ގޮތުން ބައިލެޓްރަލް އެގްރީމަނޓެއްގައިވެސް އޭނާ ސޮއި ކުރައްވާނެއެވެ.
ޔައިރު ލަޕިޑްގެ މި ދަތުރުފުޅަކީ، 2 ހަފްތާވީ އިސްރާއީލުގެ އާ ސަރުކާރުގެ، ހަރުކަށި ވަތަނީ ވިސްނުމުގެ ބޮޑުވަޒީރު ނަފްތާލީ ބެނެޓްގެ ޚާރިޖީ ސިޔާސަތަށް ތާއީދު ހޯދުމަށް މުހިންމު ދަތުރުފުޅެއް ކަމުގައި ގިނަބަޔަކު ދެކެއެވެ.
"އިސްރާއީލުން ބޭނުންވަނީ އަވައްޓެރި ހުރިހާ ގައުމަކާ އެކީވެސް ސުލްހަވެރިކަން، ހުރިހާ ގައުމަކާ އެކީވެސް، އަހަރެމެން އެއްހެން އެއްވެސް ތާކަށް ނުދާނަން. މެދު އިރުމައްޗަކީ އަހަރެމެންގެ ގެ،" އަބުދާބީގެ އުސް އިމާރާތެއްގައި، ހުޅުވި ވަގުތީ އެމްބަސީ ހުޅުވުމުގެ ގޮތުން ބޭއްވުނު ރަސްމިއްޔާތުގައި ޔައިރ ލަޕިޑް ވިދާޅުވެފައި ވެއެވެ.
"އަހަރެމެން ތިބޭނީ މިތަނުގައި، އަހަރެމެން މިސަރަހައްދުގެ ހުރިހާ ގައުމަކަށްވެސް މިކަން ބަލައިގަތުމަށް ގޮވާލަން،" އޭނާ ވިދާޅުވިއެވެ.
އިރާނާމެދު ދެގައުމަށްވެސް އޮތް ކަންބޮޑުވުމާއި، އިގްތިސާދީގޮތުން ކުރިއެރުންތަކެއް ލިބިގަތުމުގެ އުއްމީދުގައި، ފާއިތުވެދިޔަ އަހަރު، އެމެރިކާގެ އޭރުގެ ރައީސް ޑޮނަލްޑް ޓްރަމްޕްގެ ވެރިކަމުގައި، "އަބްރަހަމް އެކޯރޑް"ގެ ނަމުގައި ވެވުނު އެއްބަސްވުންތަކުން، ޔޫއޭއީއާއި ބަހުރެއިންއިންވަނި އިސްރާއީލާއެކީ ސިޔާސީ ގުޅުން ގާއިމް ކޮށްފައެވެ.
އަދި އެއަށްފަހު، ސޫދާންއާއި މޮރޮކޯއިންވެސް ވަނީ އިސްރާއީލާއެކު ސިޔާސީ ގުޅުން ގާއިމް ކޮށްފައެވެ.
ޔުއޭއީންވެސް ވަނި އިސްރާއީލުގައި އެގައުމުގެ އެމްބަސީއެއް ގާއިމް ކޮށްފައެވެ. މި އެމްބަސީ ހުޅުވާފައިވަނީ ބޭއްވުނު ވަރަށް ކުޑަ ރަސްމިއްޔާތަކާއެކު، އިސްރާއީލުގެ ވެރިރަށް ޓެލްއަވީވްގެ ސްޓޮކް އެކްސްޗޭންގައެވެ.
