ޔޫރޯ ފުޓްބޯޅަ މުބާރާތުގެ ގްރޫޕް ސްޓޭޖުގެ ފަހު މެޗުގައި ހަންގޭރީ އަތުން ބަލިނުވެ ސަލާމަތްވެގެން ހޯދި 1 ޕޮއިންޓާއެކު ގްރޫޕްގެ 2 ވަނަ ހޯދައި ޖަރުމަނު މުބާރާތުގެ ދެވަނަ ބުރުން ޖާގައެއް ކަށަވަރުކޮށްފިއެވެ.
ހަންގޭރީ އާއި ޖަރުމަނު ވާދަކުރި މެޗު ނިމުނީ 2-2 ގެ ނަތީޖާއަކުން ދެ ޓީމު އެއްވަރުވެގެންނެވެ.
ޖަރުމަނުގެ އެލިއެންޒް އެރީނާގައި މިރޭ ކުޅުނު މެޗުގައި ފުރަތަމަ ލަނޑު ޖަހައި ކުރި ހޯދީ ހަންގޭރީންނެވެ. މެޗުގެ 11 ވަނަ މިނެޓުގައި މި ގޯލު ހަންގޭރީއަށް ކާމިޔާބު ކޮށްދިނީ އެޑަމް ޒަލާއީއެވެ. މަތިމަތިން ހުރަސް ވެގެން އައި ބޯޅަ ޒަލާއީ ވަނީ ޖަރުމަނުގެ ގޯލަށް ފޮނުވާލާފައެވެ. ޖަރުމަނުން މެޗުގެ ނަތީޖާ ހަމަހަމަކުރީ މެޗުގެ 67 ވަނަ މިނެޓުގައެވެ. މިއީ އެޓީމަށް ލިބުނު ހިލޭ ޖެހުމަކުން އޭރިއާ ތެރެއިން ލިބުނު ފުރުސަތެއްގައި ހަވާޓްޒް ޖެހި ލަނޑެެކެއެވެ.
ނަމަވެސް އޭގެ ދެ މިނެޓު ފަހުން އަނެއްކާވެސް ހަންގޭރީން ވަނީ ލަނޑެއް ޖަހާ ލީޑު އަތުލާފައެވެ. މި ލަނޑު ހަންގޭރީއަށް ކާމިޔާބުކޮށްދިނީ އަންޑްރެއަސް ޝާފާއެވެ. ހަންގޭރީން ދެވަނަ ފަހަރަށް ލީޑު ނެގިނަމަވެސް ޖަރުމަނުން ހިތްވަރު އެލުވާނުލާ ނަތީޖާ ހަމަހަމަކުރުމަށް ވަރަށް މަސައްކަތްކުރިއެވެ. މި މަސައްކަތް ކަމިޔާބުކުރެވޭގޮތްވީ 84 ވަނަ މިނެޓުގައެވެ. މި ލަނޑު ޖަރުމަނަށް ކާމިޔާބުކޮށްދިނީ ލެއޯން ގޮރެޓްޒްކާއެވެ.
ޖަރުމަނު ދެވަނަ ބުރަށް ދިޔައީ ކިރިޔާއެވެ. ހަންގޭރީއާއި ވާދަކޮށް އެ ޓީމު ދެވަނަ ބުރަށް ދިޔައީ 2-2 ގެ ނަތީޖާއަކުން މެޗު އެއްވަރުވުމާއެކުއެވެ. މި މެޗުން ބަލިވިނަމަ ޖަރުމަނު މުބާރާތުން ކަޓާނެއެވެ.
މުބާރާތުގެ ދެވަނަ ބުރުގައި ޖަރުމަނު ބައްދަލުކުރާނީ އިންގްލޭންޑާއެވެ.
