ސްޕެއިނުގެ ރެއާލް ސޮސިއެޑާޑަށް ކުޅެމުން އަންނަ އަލެކްސަންޑަ އިސާކް ހޯދަން އިނގިރޭސި ކްލަބްތަކުން މަސައްކަތް ފަށާފައިވާ ކަމަށް މީޑިއާ ރިޕޯޓްތައް ބުނެފިއެވެ.
މީޑިއާ ރިޕޯޓްތައް ބުނާގޮތުން އިސާކް ހޯދަން މަސައްކަތް ކުރަނީ މެންޗެސްޓާ ސިޓީ، ޗެލްސީ އަދި ލިވަޕޫލް އެވެ. ސޮސިއެޑާޑާ އެކު އިސާކް ހަދާފައިވާ އެއްބަސްވުން އުވާލަން ދައްކަން ޖެހޭ އަގު 70 މިލިއަން ޔޫރޯ އަށް އަަރަ އެވެ. ސޮސިއެޑާޑުން ވަނީ އިސާކް ވިއްކާލަން ބޭނުންނުވާ ކަމަށް ބުނެފައެވެ.
އިސާކްގެ ވާހަަކަ ބޮޑަށް ދެކެވެން ފެށީ މި ފަހަރުގެ ޔޫރޯ ފުޓްބޯޅަ މުބާރާތުގައި އޭނާ ދައްކަމުން އަންނަ މޮޅު ކުޅުމުގެ ސަބަބުންނެވެ. ސްވިޑެން އިން ފުރަތަަމަ މެޗުގައި ސްޕެއިނާއި އެއްވަރުވިއިރު، އިސާކް ވަނީ ސްޕެއިނުގެ ޑިފެންޑަރުންނަށް ބާރުބޮޑުކޮށް ލަނޑެއް ޖެހުމާ ގާތަށް ޖެހިލައިފައެެވެ. އަދި ސްލޮވާކިއާއާ ދެކޮޅަށް ސްވިޑެން އިން ކުޅުނު މެޗުގައި ވެސް މޮޅަށް ކުޅެ، އެ މެޗުގެ މޮޅު ކުޅުންތެރިޔާގެ މަގާމު ހޯދިއެވެ.
ދެ އަހަރު ކުރިން 2019 ވަަނަ އަހަރު ޖޫން މަހު ބޮރޫޝިއާ ޑޯޓްމަންޑް ދޫކޮށް ސޮސިއެޑާޑަށް ބަދަލުވެ، އިސާކް އެ ޓީމާ އެކު ސޮއިކުރީ ފަސް އަހަރުގެ އެއްބަސްވުމެއްގައެވެ.
