އޮލިމްޕިކްސްގެ ފުޓްބޯޅަ އިވެންޓުގައި ވާދަކުރާ ބްރެޒިލް ޓީމުގެ ކެޕްޓަންކަން ތަޖުރިބާކާރު ކުޅުންތެރިޔާ ޑެނީ އަލްވޭސްއާ ހަވާލުކޮށްފިއެވެ.
ބްރެޒިލް އިން 2016 ވަނަަ އަހަރު އަމިއްލަ ގައުމުގައި ބޭއްވި އޮލިމްޕިކްސްގެ ފުޓްބޯޅަ އިވެންޓުގެ ރަން މެޑަލް ހޯދިއިރު ޓީމުގެ ކެޕްޓަނަކީ ނޭމާ އެވެ. މިހާރު ކޮޕަ އެމެރިކާ ކުރިއަށްދާތީ މި ފަހަރު އޮލިމްޕިކް ސްކޮޑުގައި ނޭމާގެ ނަން ނުހިމަނަ އެވެ. އޮލިމްޕިކްސްގައި ކުޅެނީ 23 އަހަރުން ދަށުގެ ޓީމެވެ. އުމުރުން 38 އަހަރުގެ އަލްވޭސް ބްރެޒިލް އޮލިމްޕިކް ޓީމުގައި ހިމަނަން ނިންމީ ދޮށީ އުމުރުގެ ތިން ކުޅުންތެރިން ސްލޮޓުގަ އެވެ. އަލްވޭސްގެ އިތުރުން ދެން ހިމެނީ ސެވިއްޔާ އަށް ކުޅެމުން އަންނަ އުމުުރުން 28 އަހަރުގެ ޑިފެންޑަރު ޑިއޭގޯ ކާލޯސް އާއި އެތުލެޓިކޯ ޕަރަނައެންސޭގެ ގޯލްކީޕަރު އުމުރުން 31 އަހަރުގެ އަޑޭބާ ސަންޓޯސްއެވެ.
ޖަޕާނުގެ ޓޯކިޔޯގައި އަންނަ މަހު ފަށާ އޮލިމްޕިކްސްގައި ވާދަކުރާ ބްރެޒިލް ޓީމުގައި ހިމެނޭ އެހެން ކުޅުންތެރިންނަށް ބަލާއިރު އެސްޓަން ވިލާގެ ޑަގްލަސް ލުއީޒް، ލިޔޯނަށް ކުޅެމުން އަންނަ ބްރޫނޯ ހުއިމާރޭސް، މި ސީޒަނުގައި އާސެނަލަށް ކުޅުނު ގަބްރިއެލް މަގާޅައެސް، ބަޔާ ލެވަކޫސަންގެ ޕައުލީނިއޯ އަދި ޒެނިޓަށް ކުޅޭ މެލްކަމް ހިމެނެއެވެ.
އަލްވޭސް ވަނީ ބްރެޒިލާ އެކު 2003 ވަނަ އަހަރުގެ ފީފާ ޔޫތު ވޯލްޑް ކަޕާއި 2007 އާއި 2019 ވަނަ އަހަރުގެ ކޮޕަ އެމެރިކާ އަދި 2009 އާއި 2013 ވަަަނަ އަހަރުގެ ފީފާ ކޮންފެޑެރޭޝަން ކަޕް ކާމިޔާބުކޮށްފައެވެ.
