ވަރުގަދަ އުރުގުއޭގެ މައްޗަށް ކުރި ހޯދައި އާޖެންޓީނާއިން ކޮޕާ އެމެރިކާގައި ފުރަތަމަ މޮޅު ހޯދައިފިއެވެ.
ބްރެޒިލުގައި ކުރިއަށްދާ މި މުބާރާތުގައި އުރުގުއޭގެ މައްޗަށް އާޖެންޓީނާ ކުރިހޯދީ 0-1 ގެ ނަތީޖާއަކުންނެވެ. މުބާރާތުގައި އާޖެންޓީނާ ކުޅުނު ފުރަތަމަ މެޗު ނިމުނީ ޗިލީ އަތުން 1-1 އިން އެއްވަރުވެގެންނެވެ.
މޮޅާއެކު އާޖެންޓީނާއިން ވަނީ ބަލި ނުވެ 15 މެޗުގެ ސިލްސިލާއެއް ދަމަހައްޓާފައެވެ. އެންމެފަހުން އާޖެންޓީނާ ބަލިވެފައި ވަނީ 2019 ވަނަ އަހަރުގެ ކޮޕާ އެމެރިކާ ސެމީ ފައިނަލްގައެވެ.
މި މެޗުގައި އާޖެންޓީނާއިން ލަނޑު ޖަހާފައިވަނީ މެޗުގެ 13 ވަނަ މިނެޓުގައެވެ. މި ލަނޑު ގީޑޯ ރޮޑްރިގޭޒް ޖެހީ މެސީ އޭރިއާ ތެރެއަށް ހުރަސްކޮށްލި ބޯޅައެއް ބޮލުން ޖަހާ ގޯލުގެ ތެރެއަށް ވައްދާލައިގެންނެވެ.
ގޯލުގެ ތެރެއަށް ބޯޅަ ވަނީ ދަނޑީގައި ޖެހިފައެވެ. މީގެއިތުރުން ވެސް އާޖެންޓީނާއަށް ލީޑު ފުޅާކުރާނެ ރަނގަޅު ފުރުސަތުތަކެއް ލިބިގެންދިޔައެވެ.
މި މެޗުގައި އުރުގުއޭ އިން ގިނަ ވަގުތު ބޯޅަ ހިފަހައްޓައިގެން ކުޅުނު ނަމަވެސް، އާޖެންޓީނާގެ ގޯލަށް އަމާޒުކޮށް އެންމެ ބޯޅައެއްވެސް ފޮނުވާލެވިފައެއް ނުވެއެވެ. ބާސެލޯނާއިން ބާކީ ކޮށްލުމުން އެތުލެޓިކޯ މެޑްރިޑަށް ބަދަލުވި އުރުގުއޭގެ ތަރި ލުއިސް ސުއަރެޒް އަށް ލިބުނު ފުރުސަތު އޭނާ ވަނީ ބޭކާރު ކޮށްލާފަ އެވެ.
މި ނަތީޖާ ތަކާއި އެކު މިހާރު ގްރޫޕުގެ އެއް ވަނައިގައި ހަތަރު ޕޮއިންޓާއި އެކު އޮތީ އާޖެންޓީނާ އިންނެވެ. ޗިލީއަށް ދެވަނަ ލިބެނީ ފައިދާ ގޯލުގެ ތަފާތުން އާޖެންޓީނާ މަތީގައި އޮތީމަ އެވެ. އެއް މެޗުން މޮޅުވެ، ޕެރެގުއާއީ އޮތީ ތިން ވަނައިގަ އެވެ. ހަތަރު ވަނައިގައި ޕޮއިންޓެއް ނުލިބި އުރުގުއޭ އޮތް އިރު، ބޮލީވިއާ ގްރޫޕުގެ ފުލުގައި އޮތީ ބައިކޮޅަށް ގިނަ ގޯލު ވަދެފައި ވާތީއެވެ.
މިފަހަރުގެ މުބާރާތް ކުރިޔަށްދާނީ ދެ ގްރޫޕަކަށް ބަހާލައިގެންނެވެ. ގްރޫޕް އޭގައި ހިމެނެނީ ބްރެޒިލް އާއި ކޮލަމްބިއާ އާއި އެކުއެޑޯ އަދި ވެނެޒުއޭލާގެ އިތުރުން ޕެރޫ އެވެ.
