ޔޫރޯ ފުޓްބޯޅަ މުބާރާތުގައި މިރޭ ފަހަތުން އަރައި ޑެންމާކް އަތުން 2-1 އިން ބެލްޖިއަމް މޮޅުވި ގޯލު ޖެހުމަށް ފަހު އުފާފާޅުނުކުރީ ޑެންމާކްގެ ސަޕޯޓަރުންނަށް އިހުތިރާމް ކުރުމުގެ ގޮތުން ކަމަށް ބެލްޖިއަމްގެ މިޑްފީލްޑަރު ކެވިން ޑި ބްރޭނާ ބުނެފިއެވެ.
ޑި ބްރޭނާ ދެ ވަނަ ހާފްގައި ކުޅެންއެރިއިރު، ޑެންމާކް އޮތީ 1-0 އިން ކުރީގައެވެ. ޑި ބްރޭނާ ކުޅެން އަރައި 10 މިނިޓް ތެރޭ ބެލްޖިއަމް އިން އެއްވަރުކުރި ގޯލަށް ފުރުސަތު ތަަނަވަސްކޮށްދިނެވެ. އޭގެ 15 މިނިޓް ފަހުން ބެލްޖިއަމް މޮޅުކޮށްދިން ގޯލު ޖެހީ ޑިބްރޭނާ އެވެ. އެ ގޯލު ޖެހުމަށް ފަހު އޭނާ އުފާފާޅެއްނުކުރެއެވެ.
ޑެންމާކުން މި ފަހަރުގެ ޔޫރޯގައި ކުޅުނު ފުރަތަަމަ މެޗުގައި ފިންލެންޑާ ދެކޮޅަށް މެޗުގެ 43 ވަަނަ މިނިޓްގައި ހިތް ހުއްޓިގެން ދަނޑު މައްޗަށް ވެއްޓުނު ކްރިސްޓިއަން އެރިކްސަން ހޮސްޕިޓަލްގައި ފަރުވާ ހޯދަމުން އަންނައިރު، ރޭގެ މެޗުގައި އޭނާގެ ހަނދާނުގައި ގިނަ ކަންތައްތަކެއް ވަނީ ކޮށްފައެވެ. އެރިކްސަންގެ ހާލު ރަނގަޅުވަމުން އަންނައިރު، އޭނާ އަށް ތަރުހީބު ދޭން ރޭގެ މެޗުގެ 10 ވަނަ މިނިޓް ވަނީ އެއް މިނިޓަށް ކުޅުން މެދުކަނޑާލައިފައެވެ.
ރޭގެ މެޗަކީ މި ފަހަރު ޔޫރޯގައި ޑި ބްރޭނާގެ ފުރަތަމަ މެޗެވެ. މިދިޔަ މަހު ފަހުކޮޅު ކުޅުނު ޗެމްޕިއަންސް ލީގުގެ ފައިނަލުގައި ލޯ ކައިރީ ކަށިގަނޑަށް ލިބުނު އަނިޔާއެއްގެ ސަބަބުން އޮޕަރޭޝަނެއް ކުރި ޑި ބްރޭނާ އަށް މި ފަހަރުގެ ޔޫރޯގައި ބެލްޖިއަމް ކުޅުނު ފުރަތަަމަ މެޗު ގެއްލުނެވެ. އޭނާ ރޭ ވެސް ބަދަލު ކުޅުންތެރިއެއްގެ ގޮތުގައި ކުޅެން އެރީ މުޅިން އެއްކޮށް ފިޓްނުވާތީއެވެ.
ރޭގެ މެޗު ބަލަން 23,395 ސަޕޯޓަރުން ޑެންމާކްގެ ޕާކެން ސްޓޭޑިއަމް އަށް ވަންއިރު، ގިނައީ ޑެންމާކުގެ ސަޕޯޓަރުންނެވެ.
ކޮމެންޓު ފޮނުވާ