ހުރިހާ ކަމަކަށް ޝުކުރު އަދާކުރުމާއެކު އަލުން އަނބުރާ ދަނޑަށް އެރުމުގެ އުންމީދު ގެއްލުވައި ނުލާނެ ކަމަށް ޑެންމާކުގެ ތަރި ކްރިސްޓިއަން އެރިކްސަން ބުނެފިއެވެ.
ޔޫއެފާއިން ބުނެފަ ވަނީ އެރިކްސަން ސްޓޭބަލް ވެ، ހާލު ރަނގަޅުވަމުން އަންނަ ކަމަށެވެ. ޓީމަށް ކޯލެއް ކޮށް، ވާހަކަ ދެއްކި ކަމަށްވެސް ބުނެފައިވެއެވެ. ސަޕޯޓަރުންނާ ހަމައަށް އެރިކްސަން ފުރަތަމަ މެސެޖު ދީފައި ވަނީ ރޭގެ ވަގުތެއްގައި އޭނާގެ މެނޭޖަރު މެދުވެރިކޮށެވެ. މެސެޖުގައި ބުނެފައި ވަނީ ހުރިހާ ފަރާތްތަކަކުން އޭނާއަށް ކޮށްދިން ކަންކަމަށް ޝުކުރު އަދާކުރާ ކަމަށެވެ. އަދި މިހާރު ހާލު ރަނގަޅު ކަމަށާއި، ކަން ހިނގައި ދިޔަ ގޮތް ބަލަން ބޭނުންވާ ކަމަށްވެސް އެރިކްސަން ވަނީ ބުނެފައެވެ.
ޑޮކްޓަރުންނާ ހަވާލާދީ ނޫސްތަކުން ބުނެފައި ވަނީ އެރިކްސަން އަލުން އެނބުރި ފުޓުބޯޅައަށް ނުކުތުމަކީ އުނދަގޫ ކަމަކަށް ވާނެ ކަމަށެވެ. އެފަދަ ކާޑިއެކް އެރެސްޓްތަކަށް ދާ ކުޅުންތެރިންނަށް ގިނަ ގައުމުތަކުގައި އޮންނަނީ ކުޅުން މަނާވެސް ކޮށްފަ އެވެ. އެއީ ސިއްހީ އިމަޖެންސީތައް މަދުކުރުމަށް ހަދާފައިވާ އުސޫލުތަކެކެވެ. އެހެންނަމަވެސް އެރިކްސަންގެ މެސެޖުގައި އޭނާ ބުނެފައި ވަނީ ދަނޑު މައްޗަށް އަނބުރާ ދިއުމުގެ އުންމީދު ގެއްލުވައި ނުލާނެ ކަމަށެވެ.
A message from @ChrisEriksen8.
♥️? pic.twitter.com/WDTHjqE94w— DBU – En Del Af Noget Større (@DBUfodbold) June 15, 2021
ޔޫރޯ 2020 ގައި ޑެންމާކާއި ފިންލޭންޑް ވާދަކުރި މެޗުގައި ޑެންމާކުގެ ތަރި އެރިކްސަން ހަބަރު ހުސްވެ ދަނޑު މައްޗަށް ވެއްޓިފައި ވަނީ ކާޑިއެކް އެރެސްޓެއްގައެވެ. މެޗުގެ ފުރަތަމަ ހާފު ނިމެން ހަތަރު މިނެޓަށް ވެފައި ވަނިކޮށް، ވީ އެންމެ އަވަހަށް މެޑިކަލް އޮފިސަރުންނަށް ގޮވައި ރެފްރީ މެޗު ހުއްޓުވައިލީ މެޑިކަލް އިމަޖެންސީއެއްގައެވެ.
މެޗުގެ ބާކީބައި ގާތްގަނޑަކަށް ގަޑިއިރެއްހާއިރު ފަހުން ކުޅެން ނިންމީ އެރިކްސަން ހޮސްޕިޓަލަށް ގެންގޮސް، އޭނާގެ ހާލު ސްޓޭބަލް ވުމުންނެވެ.
