މިހާރު ކުރިޔަށްދާ ޔޫރަޕުގެ އެންމެ ޝަރަފްވެރި ފުޓްބޯޅަ މުބާރާތް ކަމަށްވާ ޔޫރޯ 2020 ގައި މިރޭ ޔޫކްރެއިން އަތުން ނެދަލެންޑްސް ސަލާމަތްވެއްޖެއެވެ.

ނެދަލެންޑްސްގެ އަމްސްޓެޑަމްގައި ކުޅުނު މި މެޗުގައި ޔޫކްރެއިންގެ މައްޗަށް ނެދަލެންޑްސް ކުރި ހޯދީ، 2-3 ގެ ނަތީޖާ އަކުންނެވެ.

ބަލާހިތްވާ ކަހަލަ ފޯރިގަދަ ކުޅުމެއް ފެނިގެން ދިިޔަ މި މެޗުގައި ޖެހި ހުރިހާ ލަނޑެއްވެސް ފެނިގެން ދިޔައީ ދެވަނަ ހާފް ގައެވެ. ނަމަވެސް ފުރަތަމަ ހާފުގައި ނެދަލެންޑްސްގެ ފަރާތުން ގިނަ ހަމަލާތަކެއް ވަނީ ފެނިގެން ގޮސްފައެވެ.

މެޗުގެ ދެވަނަ ހާފް ފަށައިގެން ނެދަލެންޑްސް އިން ލީޑު ނެގީ 52 ވަނަ މިނެޓުގައެެވެ. މި ލަނޑު ނެދަލެންޑްސް އަށް ކާމިޔާބުކޮށްދިނީ، ކެޕްޓަން ޖިނީ ވައިނަލްޑަމްއެވެ. ނެދަލެންޑްސް އިން ލަނޑު ޖަހާ ލީޑު ނެގިތާ 7 މިނެޓު ފަހުން ވޫޓް ވޭހޯސްޓް ވަނީ އިތުރު ލަނޑެއް ޖަހާ ލީޑު ފުޅާކޮށްފައެވެ. ނެދަލެންޑްސް އިން 2 ލަނޑުގެ ލީޑެއް ނެގިފަހުން ޔޫކްރެއިން ޓީމުން ވަނީ ކުޅުން ރަނގަޅުކޮށް މެޗުގެ ތެރެއަށް ވަންނަން މަސައްކަތް ކޮށްފައެވެ. އޭގެ ނަތީޖާއެއްގެ ގޮތުން 75 ވަނަ މިނެޓުގައި ޕެނަލްޓީ އޭރިޔާ ބޭރުގައި ހުރެ ކެޕްޓަން އެންޑީ ޔާމޮލަންކޯ ފޮނުވާލި ބޯޅަ ގޯލުގެ މަތީ ކަަނަށް ވަދެ ޔޫކްރެއިންގެ ފުރަތަމަ ލަނޑު ފެނިގެން ދިޔައެވެ. އަދި އޭގެ 3 މިނެޓު ފަހުން ރުސްލާން މަލިނޯވްސްކީ ނަގައިދިން ހިލޭ ޖެހުމަކުން ބޯޅަ ބޮލުން ގޯލު ތެރެއަށް ފޮނުވާލައި ރޯމަން ޔަރެމްޗުކް ވަނީ މެޗުގެ ނަތީޖާ ޔޫކްރެއިންނަށް ހަމަހަމަކޮށްދީފައެވެ. ނަމަވެސް ހިތްވަރު ދޫނުކޮށް ނެދަލެންޑްސް ޓީމުން ދިޔައީ އިތުރު ލަނޑެއް ޖަހާ މެޗުން 3 ޕޮއިންޓް ހޯދުމަށް ވަރަށް މަސައްކަތް ކުރަމުންނެވެ. އެގޮތުން މެޗުގެ 85 ވަނަ މިނެޓުގައި، ޑެންޒެލް ޑަމްފްރީސް ވަނީ ނެދަލެންޑްސް މޮޅުކޮށްދިން ލަނޑު ކާމިޔާބުކޮށްދީފައެވެ. މިއީ ޑަމްފްރީސް ގައުމީ ޓީމަށް ޖަހައިދިން ފުރަތަމަ ލަނޑެއެވެ.

11 ޖޫން އިން 11 ޖުލައިގެ ނިޔަލަށް ކުރިޔަށްދާ ޔޫރޯ ފުޓްބޯޅަ މުބާރާތުގައި މިއަދުވެސް 3 މެޗެއް ކުޅުމަށް ވަނީ ހަމަޖެހިފައެވެ.