ސަރުކާރުގެ ބޯހިޔާވަހިކަމުގެ ސިޔާސަތާގުޅޭ ހާއްސަ ކަމެއް މާދަމާރޭ އިއުލާންކުރާނެކަމަށް ސަރުކާރުން ބުނެފިއެވެ.

ބޯހިޔާވަހިކަމުގެ ސިޔާސަތާގުޅޭ ހާއްސަ އިއުލާނެއް މާދަމާ 21:30 ގައި ޓީވީތަކުން ދުރައްދައްކާނެ ކަން އިއުލާންކޮށްފައިވަނީ ސަރުކާރުގެ ރަސްމީ ޓްވިޓަރ އެކައުންޓުން މީގެ އިރުކޮޅެއް ކުރިން ކުރި ޓްވީޓެއްގަ އެވެ. އެހެންނަމަވެސް މިކަމާގުޅޭ އިތުރު ތަފްސީލެއް ހާމައެއް ނުކުރެއެވެ.

We have a very special announcement regarding our Housing Policy tomorrow evening at 2130hrs.

The event will be broadcast live on all local TV stations #Gedhoruveriya pic.twitter.com/OeZt6Pp52u

— Government of Maldives (@governmentmv) June 13, 2021

ނަމަވެސް މަޢުލޫމާތު ލިބިފައިވާ ގޮތުގައި މާދަމާރޭ ހާމަކުރާނީ ހައުސިންގ ފައިނޭންސިންއާއި ގުޅުން ހުރި ކަމެކެވެ.

މިސަރުކާރުގެ ބޯހިޔާވަހިކަމާގުޅޭ ސިޔާސަތުތައް އަވަހަށް ތަންފީޒުކޮށް، އެ ސިޔާސަތުތައް ކަނޑައަޅާފައިވާ މުއްދަތުގެ ތެރޭގައި ނިންމުމަށް ސަރުކާރަށް ދެންނެވުމަށް ރައްޔިތުންގެ މަޖިލީހުން އޭޕްރީލްމަހު ފާސްކޮށްފައި ވެއެވެ. އެގޮތުން މަޖިލީހުން އޭރު ފާސްކޮށްފައިވާ ރިޕޯޓުގައި ވަނީ ސަރުކާރުގެ "ސްޓްރެޓ ޖިކް އެކްޝަން ޕްލޭން 2023-2019″ ގައި ބޯހިޔާވަހިކަމާގުޅޭ މައިގަނޑު ސިޔާސަތުތައް ތަންފީޒު ކުރުމާއި ގާތައްވެސް އަދި މިހާތަނަށް މަސައްކަތް ކުރެވިފައި ނުވާކަމަށް ބުނެފައެވެ.

މިސަރުކާރުން ވެރިކަމަށް އައުމަށް ރައްޔިތުންނަށް ވެފައިވާ ބޯހިޔާވަހިކަމުގެ ވައުދު ނުފުއްދި ގިނަ ދުވަސްތަކެއް ވަމުންދާތީ ގިނަބައެއްގެ ނުރުހުން ވަނީ ސަރުކާރަށް އަމާޒުވެފައެވެ. އަދި ނިމިދިޔަ ކައުންސިލް އިންތިޚާބުގައި މާލެ ސިޓީގެ ސާފު އައުލަބިއްޔަތު އިދިކޮޅު ޕްރޮގްރެސިވް ކޯލިޝަން ވަނީ ދީފައެވެ. މާލެ ސިޓީން އެމްޑީޕީއަށް މިފަހަރު ބޮޑު ނާކާމިޔާބީއެއް ލިބިފައިވަނީ ބޯހިޔާވަހިކަމަށް ވެފައިވާ ވައުދުތައް ނުފުއްދުމުންކަމަށް އެމްޑީޕީގެ ގިނަ މެމްބަރުންވެސް ވަނީ ބުނެފައެވެ.

ބޯހިޔާވަހިކަމަށް ސަރުކާރަށް އެކަށީގެންވާ މަސައްކަތެއް މިހާތަނަށް ކުރެވިފައި ނުވާއިރު، ރައީސް ޞާލިހު ވިދާޅުވީ މިދައުރުގެ ތެރޭގައި 15،000 ހައުސިން ޔުނިޓް އަޅައި ދެއްވާނެކަމަށެވެ.