ފަލަސްތީނުގެ ބިންތަކަށް ގަދަކަމުން ވެރިވެގެންފައިވާ ޒަޔަނިސްޓް ދައުލަތް، އިސްރާއީލުގެ ތާރީޚުގައި އެންމެ ދިގު މުއްދަތަކަށް ބޮޑުވަޒީރުކަން ކުރި، ނަތަންޔާހޫގެ ވެރިކަން ނިމުމަކަށް ގެނައުމަށްޓަކާ އެގައުމުގެ ގާނޫނު ހަދާ މަޖިލީހުގައި މިއަދު ވޯޓު ނަގާނެއެވެ.

އިސްރާއީލުގެ ގާނޫނު ހަދާ މަޖިލިސް ކްނެސެޓްގައި މިއަދު ވޯޓަށް އަހާއިރު، އެކުލަވާ ނުލެވޭނެކަމަށް ބެލެވުނު ކޯލިޝަން، ނަތަންޔާހޫއާއި ދެކޮޅަށް، ކެނެސެޓްގައި ކާމިޔާބު ހޯދާނެކަމަށް ބެލެވިފައިވަނީ އެންމެ ގޮޑިއެއްގެ ތަފާތަކުންނެވެ.

އަދި، ގާނޫނު ހަދާ މަޖިލިހުގެ މިވޯޓާއެކު، ފާއިތުވި 2 އަހަރު ދުވަހު، ހައްލެއް ނުހޯދި، 3 އިންތިޚާބަކާއި ކުރިމަތި ލާންޖެހުނު އިސްރާއީލުގެ ސިޔާސީ މަސްރަހު ހުއްޓުމަކަށް އައިސްފަ އޮތް އޮތުންވެސް މިއަދު ނިމުމަކަށް އަންނާނެ ކަމަށް ބެލެވެއެވެ.

ނަތަންޔާހޫގެ ވެރިކަން ނިމުމަކަށް ގެނައުމަށްޓަކާ އެކުލަވާލެވުނު ކޯލިޝަން އެއްބަސްވުމުގެ ދަށުން، އެގައުމުގެ ބޮޑުވަޒީރުކަމަށް އަންނާނީ، ކަނާތުފިޔައިގެ ވަތަނީ ލީޑަރެއްކަމުގައިވާ ނަފްތާލީ ބެނެޓްއެވެ. އޭނާ ވެރިކަމުގެ ބާރުތައް ހިއްސާ ކުރައްވާނީ، ކޯލިޝަންގައި ހިމެނޭ އެންމެބޮޑު ޕާޓީގެ ލީޑަރ، މެދުނިމިނުގެ ސިޔާސަތުތަކަށް ތާއީދު ކުރައްވާ ލީޑަރެއްކަމުގައިވާ ޔައިރު ލަޕިޑްއާއެވެ.

ނަތަންޔާހޫގެ ވެރިކަން ނިންމުމަށް އެއްބަސްވެވިފައިވާ ކޯލިޝަން އެއްބަސްވުމުގައި ވާގޮތުން ބެނެޓް އިސްރާއީލުގެ ވެރިކަން ކުރައްވާނީ، 2023ވަނަ އަހަރުގެ ސެޕްޓެމްބަރު މަހުގެ ނިޔަލަށެވެ. އެއަށްފަހު ބޮޑޫވަޒީރުކަމާ ހަވާލުވެ ވަޑައިގަންނަވާނީ މެދުމިނުގެ ސިޔާސަތުތަކަށް ތާއީދުކުރާ ޔެޝް އަޓިޑް ޕާޓީގެ ލީޑަރު ޔައިރ ލަޕިޑްއެވެ.

އެއަށްފަހު ދެން ކުރިޔަށް އޮންނަ 2 އަހަރު އިސްރާއީލުގެ ބޮޑުވަޒީރުކަން ކުރައްވާނީ ޔައިރު ލެޕިޑްއެވެ.

އިސްރާއީލުގެ އާ ކޯލިޝަންގެ ވެރިކަން ފެށުމާއެކު، އިސްރާއީލުގައި އެންމެ ދިގު މުއްދަތަކަށް ބޮޑު ވަޒީރުކަން ކުރި، އަދި ކަނާތުފިގައިގެ ލިކޫޑް ޕާޓީގެ ލީޑަރުގެ ހައިސިއްޔަތުން ނަތަންޔާހޫ ވެވަޑައިގަންނަވާނީ އިސްރާއީލުގެ އިދިކޮޅު ލީޑަރަށެވެ.

އޭނާވަނީ، އިސްރާއީލުގެ ވެރިކަމާ ހަވާލުވާ މިކޯލިޝަނަކީ، ނުރައްކާތެރި އަދި ކޮރަޕްޓް ކޯލިޝަނެއްގެ ގޮތުގައި ސިފަކުރައްވާ، ވަރަށް އަވަހަށް މިކޯލިޝަނުން އުފައްދާ ސަރުކާރު ނިމުމަމަކަށް ގެންނާނެ ކަމަށް ބުނެފައެވެ.

ހަމައެއާއެކު، ނަތަންޔާހޫގެ މައްޗަށް ކުރެވެމުންދާ ކޮރަޕްޝަންގެ ދައުވާތަކުގެ ޝަރީއަތް އިސްރާއީލުގެ ކޯޓުތަކުގައި މިހާރުވެސްދަނީ ކުރިޔަށެވެ.

އާ ބޮޑުވަޒީރު ނަފްތާލީ ބެނެޓްއަކީ ކާކު؟

ނަތަންޔާހޫއަށްފަހު އިސްރާއީލުގެ ބޮޑުވަޒީރުކަމަށް ވަޑައިގަންނަވާ، ނަފްތާލީ ބެނެޓްއަކީ، ކުރީގެ ޓެކް ވިޔަފާރަވެރި، މަލްޓި މިލިއަނަރެކެވެ. އޭނާ ސިޔާސީ ދާއިރާއަށް ނިކުންނެވީ، ކަނާތު ފިޔައިގެ، ދީނީ-ވަތަނީ ވިސްނުމުގެ މީހުންނާއިއެކު އަޑުއުފުލައިގެންނެވެ.

އުމުރުން 49 އަހަރުގެ ބެނެޓްވަނީ، އޭނާގެ މުޅި ސިޔާސީ ހަޔާތުގައިވެސް، ކަނާތު ފިޔައިގެ ހައްދު ފަހަނަ އަޅާފައިވާ، ވޯޓު ލުމުގެ ހައްގު ލިބިފައިވާ މީހުންގެ ހައްގުގައި އަޑު އުފުލާފައެވެ. އަދީ އޭނާއަކީ، އިސްރާއީލުގެ ޔާމިނާ ޕާޓީގެ ލީޑަރަށް ވާއިރު، އެ ޕާޓީއަކީ ހިފާފައިވާ ހުޅަގު އައްސޭރީގެ ބިންތަކަކީ އިސްރާއީލުގެ ބަޔަކަށް ހެދުމަށް ވަކާލާތު ކުރަމުންދާ ޕާޓީއެކެވެ.

ގިނަ ކަންކަމުގައި ހަރުކަށި ވިސްނުން ގެންގުޅޭ ސިޔާސީ މީހެއްގެ ގޮތުގައި އޭނާ ފާހަގަކުރެވިގެން ގޮސްފައިވާއިރު، އޭނާއަކީ މިނިވަން ވިޔަފާރިއަށް ވަރަށް ބޮޑަށް ތާއީދު ކުރާ މީހެކެވެ. އަދި އޭނާއަކީ، އިރާނާއި ދެކޮޅަށް ވަކީން ޚާއްސަކޮށް ހަރުކަށި ވިސްނުން ގެންގުޅޭ މީހެއްވެސް މެއެވެ.

މިގޮތުން، އިރާނާއި ދެކޮޅަށް އޭނާއާއި ނަތަންޔާހޫ އެއް ވިސްނުމެއް ގެންގުޅޭއިރު، އޭނާވަނީ ނަތަންޔާހޫގެ ލިކޫޑް ޕާޓީގެ ސަރުކާރުގެ އިސް ގިނަ މަގާމްތަކެއްވެސް ފުރުއްވާފައެވެ. އެހެންނަމަވެސް، ފަހަކަށް އައިސް ނަތަންޔާހޫއާއި ބެނެޓް ގިނަ ކަންކަމުގައި ވަނީ ވަރަށް ބޮޑަށް ޚިޔާލު ތަފާތު ވެފައެވެ.

ކުރީގެ އިސްރާއީލުގެ ސްޕެޝަލް ފޯސެސްގެ ކޮމާންޑޯއެއްގެ ގޮތުގައި ހަރަކާތްތެރި ވެފައިވާ ބެނެޓްއަކީ އެމެރިކާއަށް އުފަން ދެމަފިރިއެއްގެ ދަރިއެކެވެ. އަދި އޭނާ ދިރިއުޅެމުން ދަނީ، އޭނާގެ އަންހެނުން ގަލިޓްއާއި 4 ދަރިންނާއެކީ އިސްރާއީލުގެ ރާނަނާ ސިޓީގެ މެދުތެރޭ ސަރަހައްދުގައެވެ.

އޭނާ ސިޔާސީ ދާއިރާއަށް ވެންނެވީ އޭނާގެ އުފެއްދި ޓެކް ކުންފުނި 2005 ވަނައަހަރު 145 މިލިއަން ޑޮލަރަށް ވިއްކާލުމަށްފަހުއެވެ. އަދި ޖެހިގެން އައި އަހަރު އޭނާވަނީ ނަތަންޔާހޫގެ ޗީފް އޮފް ސްޓާފްގެ މަގާމަށް ވަޑައިގަތެވެ. އޭރު ނަތަންޔާހޫއަކީ ގެންދެވީ ސިޔާސީގޮތުން އިދިކޮޅުގައި މަސައްކަތް ކުރައްވަމުންނެވެ.

2010 ވަނަ އަހަރު، ނަތަންޔާހޫގެ ސަރުކާރުން ވަކިވުމަށްފަހު އޭނާ މަސައްކަތް ކުރައްވަން ފެއްޓެވީ ޔެޝާ ކައުންސިލްގެ އެންމެ އިސްވެރިއެއްގެ ގޮތުގައެވެ. މި ކައުންސިލަކީ ހިފާފައިވާ ހުޅަގު އައްސޭރީގެ ބިންތަކުގައި ޔަހޫދީން އާބާދު ކުރުމަށް ވަކާލާތު ކުރަމުން އައި ކައުންސިލެކެވެ.

އަދި އެއަށްފަހު، 2012 ވަނަ އަހަރު، އޭނާ ސިޔާސީ ދާއިރާއަށް ވަންނަވާ، އޭނާ ވެވަޑައިގަތީ، އޭރު ހީނަރުވެ އުވެމުންދިޔަ ކަނާތު ފިޔައިގެ ހައްދު ފަހަނަ އަޅާފައިވާ ޔަހޫދީ ހޯމް ޕާޓީގެ ލީޑަރަށެވެ. އަދި އޭނާވަނީ، އިސްރާއީލުގެ ގާނޫނު ހަދާ މަޖިލީހުގައި އެޕާޓީން ހިއްސާ ކުރާ މިންވަރު 4 ގުނައަށް މަތިކޮށްފައެވެ. އަދި އޭނާ ގިނަ މީޑިއާ ހެޑްލައިންތައް ހައްދަވަން ފެއްޓެވީ، ފަލަސްތީނާއި ދެކޮޅަށް ދައްކަވަމުން ގެންދިޔަ އިހާނާތްތެރި ވާހަކަތަކާއި، ފަލަސްތީނު މައްސަލަށް އިތުރަށް ހޫނު ކުރުމަށް އޭނާ ދައްކަވަމުން ގެންދެވި ހަރުކަށި ވާހަކަތަކުންނެވެ.

މިގޮތުން 2013ވަނަ އަހަރު އޭނާ ބުނެފައިވަނީ، “ފަލަސްތީނުގެ އެއްވެސް ޓެރަރިސްޓަކު ދޫކޮށް ނުލާ ޖެހޭނީ މަރަން”، ކަމަށެވެ.

އަދި އޭނާވަނީ އެތައް ފަހަރެއްގެ މަތިން، ފަލަސްތީނުގެ މައްސަލާއިގެ، ދެފަރާތުގެ ދެމެދުގައި ޚިޔާލު ތަފާތުވުން އުފެދޭނެ އެތަކެއް ވާހަކަތަކެއް ދައްކަވާފައެވެ. މިގޮތުން، ހުޅަގު އައްސޭރިއަކީ ހިފާފައިވާ ބިމެއް ނޫންކަމުގައިވެސް އޭނާ ބުނެފައި ވެއެވެ. ސަބަބެއްކަމަށް އޭނާ ބުނެފައިވަނީ، އެ ބިމުގައި ދުވަހަކުވެސް ފަލަސްތީނުގެ ދައުލަތެއް ހިގަމުން ގޮސްފައި ނުވުމެވެ. އަދި އޭނާ ބުނެފައިވަނީ، އިސްރާއީލު މައްސަލަ ދުވަަކުވެސް ހައްލު ނުކުރެވޭނެ ކަމަށެވެ. އެހެންކަމުން އޭނާ ބުނެފައިވާ ގޮތުގައި އެ މައްސަލައާއެކު ޖެހޭނީ ދިރިއުޅޭށެވެ.

ނަތަންޔާހޫގެ ސަރުކާރުގެ ޑިފެންސް މިނިސްޓަރެއްގެ މަގާމް އަދާކުރުމުގެ އިތުރުން ބެނެޓްވަނީ، ނަތަންޔާހޫގެ ސަރުކާރުގެ އިކޮނޮމިކް މިނިސްޓަރކަމާއި، އެޑިއުކޭޝަން މިނިސްޓަރުކަންވެސް ކޮށްފައެވެ.

އޭނާވަނީ ޔަހޫދީ ހޯމްޕާޓީ 2018ވަނަ އަހަރު ރީބްރޭންޑްކޮށް، އެޕާޓީގެ ނަން ޔަމިނާ (ހެޔޮމަގު) ޕާޓީގެ ނަމަށް ބަދަލު ކޮށްފައެވެ. އަދި އެއަހަރު އެޕާޓީ ނަތަންޔާހޫގެ ސަރުގެ ކޯލިޝަން ޕާޓްނަރެއްގެ މަގާމުގައި އޮތުމަށްފަހު، ހަމަ އެއަހަރު އެކޯލިޝަނުން ވަކިވެފައި ވެއެވެ.

މިގޮތުން ފާއިތުވެދިޔަ އަހަރު މޭމަހު ނަތަންޔާހޫ އުފެއްދެވި އެއްބައިވަންތަކަމުގެ ސަރުކާރާ ގުޅިވަޑައިގަތުމަށް ނަތަންޔާހޫ ބެނެޓަށް ދައުވަދެއްވާފައެއް ނުވެއެވެ. މީގެއިން، ނަތަންޔާހޫގައި ބެނެޓްއާއި ދެބޭފުޅުން އެއްގޮތް އެތަކެއް ވިސްނުންތަކެއް ގެންގުޅުއްވަމުން ގެންދެވިނަމަވެސް، ނަތަންޔާހޫ ބެނެޓްއާއި ދޭތެރޭ ހިންހަމަ ނުޖެހުން އޮތް މިންވަރު ހާމަވެގެން ދިޔައެވެ.

ސިޔާސީގޮތުން ނަތަންޔާހޫއާއި އިދިކޮޅުގައި ހުންނަވައިގެން، އަދި 2020ވަނަ އަހަރު ކޯވިޑް ޕެންޑަމިކް އެންމެ ބޮޑަށް ފެތުރެމުންދިޔައިރު، އޭނާވަނީ، ކަނާތުފިޔައި ވިސްނުން ކުރިޔަށް ނެރެ، ނަތަންޔާހޫގެ ސިއްޙީ ދާއިރާގެ ސިޔާސަތުތަކަށް ވަރަށް ބޮޑަށް ފާޑުވިދާޅުވެފައެވެ.

އަދި ސިއްޙީ ކާރިސާ ކޮންޓްރޯލްކުރުމަށް އޭނާ ގެންގުޅުއްވާނެ ސިޔާސަތުތައް އާންމުކުރައްވާ، އަދި އިގްތިސާދު ކުރިޔަށް ގެންދިއުމަށް ގެންގުޅޭނެ ސިޔާސޔަތުތައްވެސް ހާމަކޮށް ރައްޔިތުންގެ ތާއީދު ހޯދުމަށް އޭނާ މަސައްކަތް ކުރައްވާފައި ވެއެވެ.

ނަތަންޔާހޫއަށްވުރެ ސިޔާސަތު ހަކަށިވާނެ ކަމަށް ބެލެވޭ! 

ނަފްތާލީ ބެނެޓްއަކީ، ހިފާފައިވާ ހުޅަގު އައްސޭރިއާއި، ޖުރޫސެލަމް އަކީވެސް އިސްރާއީލުގެ ބިންތަކެއްކަމުގައި ދައުވާ ކުރާ މީހެކެވެ.

ނަތަންޔާހޫގެ ސަރުކާރުގެ އެޑިއުކޭޝަން މިނިސްޓަރެއްގެ ގޮތުގައި އޭނާ ހުންނެވިއިރު، އަލްޒަޖީރާއަށް ދިން އިންޓަވިއުއެއްގައި އޭނާ ބުނެފައިވަނީ، ފަލަސްތީނުގެ ހިފާފައިވާ ބިންތަކަކީ ޔަހޫދީންގެ ބިންތަކެއް ކަމުގައި، ކުރިސްޓިއަނުންގެ މުގައްދަސް ފޮތް ބައިބަލްގައި ވާކަމަށެވެ.

މީގެ އިތުރުން 2013ވަނަ އަހަރު އޭނާ ބުނެފައިވަނީ، “ފަލަސްތީނުގެ އެއްވެސް ޓެރަރިސްޓަކު ދޫކޮށް ނުލާ ޖެހޭނީ މަރަން”، ކަމަށެވެ.

މިގޮތުން ބެނެޓްއަކީ، ހިފާފައިވާ ބިންތަކުގައި، ބައިނަލްއަގުވމީ ގާނޫނުތަކާ ޚިލާފަށް، އިސްރާއީލުން މިހާރުވެސް ފުޅާކުރަމުންދާ އެގައުމުގެ އާބާދީ ފަލަސްތީނުގެ ބިންތަކަށް ފުޅާކުރުމަށް ތާޢީދުކުރާ، އަދި ފަލަސްތީނުގެ ދައުލަތެއްވެސް އޮންނަން ޖެހޭނެކަމަށް ގަބޫލުނުކުރާ މީހެކެވެ.

ހަމައެފަދައިން، ނަފްތާލީ ބެނެޓް ފާހަގަވެގެން ގޮސްފައިވަނީ، އިރާނާ ދޭތެރޭ ނަތަންޔާހޫ ގެންގުޅުއްވި ހަރުކަށި ވިސްނުމަށްވެސް ވަރަށްބޮޑަށް ތާއީދުކުރާ މީހެއްގެ ގޮތުގައެވެ. އަދި ބެލެވޭގޮތުގައި، އެމެރިކާއިން އިރާނާއެކީ މިހާރުވެސް މަޝްވަރާކުރަމުންދާ ނިއުކުލިއަރ އެއްބަސްވުމާ، ނަތަންޔާހޫއެކޭ އެއްގޮތަށް ބެނެޓްވެސް ދެކޮޅު ހައްދަވާނެއެވެ.

އެހެންނަމަވެސް، ބައެއް ފަރާތްތަކުން ދެކޭގޮތުގައި އެމެރިކާގެ މިހާރުގެ ސަރުކާރާއެކީ ރަގަޅު ގުޅުމެއް ގާއިމްކުރުމަށް އިސްރާއީލުގެ އާސަރުކާރުން ބޭނުންވާނެތީ، އެމެރިކާގެ ސިޔާސަތުތަކާ ފުށުއަރާ ކަންކަން، ނަތަންޔާހޫގެ ސިޔާސަތުތަކާ ޚިލާފަށް، ފަރުދާގެ ފުރަގަހުގައި އިސްރާއީލުގެ އާސަރުކާރުން ގެންގުޅޭނެކަމަށް ބެލެވެއެވެ.

އިސްރާއީލުގައި އަލަށް އުފެދިގެންދާ ސަރުކާރަކީ، ފުރަތަމަ ފަހަރަށް އަރަބި އިސްރާއީލީ ޕާޓީއަލުން ކޯލިޝަނއެއްގައި ހިމެނިގެން އުފެދޭ ސަރުކާރަށް ވުމާއިއެކު، މިސަރުކާރުން، އިސްރާއީލުގެ އަރަބިންނަށް އިހުނަށްވުރެ ރަގަޅު ފުރުސަތުތަކެއް ތަނަވަސް ވެގެންދާނެ ކަމަށް ބެލެވެއެވެ.

އިސްރާއީލުގެ %20 ރައްޔިތުންނަކީ އަރަބީންނެވެ. އަދި މިމީހުންނަކީ، މިހާރުވެސް އެގައުމުގައި ނަސްލީ ތަފާތުކުރުންތަކާ ކުރިމަތިލާން ޖެހިފައިވާ ބައެކެވެ.

އެހެންނަނަމެވެސް، މަންސުރު އައްބާސްގެ ލީޑަރެއްގެ ގޮތުގައި ހުންނެވި ކުޑަ ޕާޓީއެއްކަމުގައިވާ ޔުނައިޓެޑް އަރަބް ލިސްޓް ޕާޓީއަކީވެސް މި ކޯލިޝަންގެ ބައިވެރިޔަކަށް ވާތީ، ނަތަންޔާހޫގެ ވެރިކަން ނިމުމަކަށް ގެނައުމަށް މިޕާޓީން ވެދިން އެހީތެރިކަމުގެ ބަދަލެއްގެ ގޮތުން، އިސްރާއީލުގެ އާބާދީގައި ހިމެނޭ އަރަބި މުސްލިމުންނަށް ގެދޮރު ބިނާކުރުމަށް އިހުނަށްވުރެ ބޮޑު ބަޖެޓެއް ލިބިގެން ދިއުުގެ އިތުރުން އަރަބި ކޮމިއުނިޓީގެ މެދުގައި ސަލާމަތީކަންކަން ބެލެހެއްޓުމުގައި އިހުނަށްވުރެ ބޮޑަށް ފުރުސަތު ފަހިވެގެން ދާނެކަމުގައި ބެލެވެއެވެ.

އެހެންނަމަވެސް، އިސްރާއީލުގެ އާބާދީގައި ހިމެނޭ އަރަބި މުސްލިމުންނަކީވެސް، ފަލަސްތީނުގެ އާއިލާތަކާއި އެކި ގޮތްގޮތުން ގުޅިލާމެހިފައިވާ އާއިލާތަކަކަށްވާތީ، އިސްރާއީލުގައި އަބަދުވެސް މި ކޮމިއުނިޓީތަކާމެދު ބެލެވެނީ ޝައްކުކެ ނަޒަރަކުންނެވެ. އަދި މި ކޮމިއުނިޓީތަކުން، ފަލަސްތީނުގެ ރައްޔިތުން މިނިވަންކަމަށް ކުރަމުންދާ ޖިހާދަށް ތާއީދުކުރަމުންދާ ކަމަށް އިސްރާއީލުން އަބަދުވެސް ތުހުމަތު ކުރެއެވެ.

ފާއިތުވެދިޔަ މޭމަހު، އުފެދިގެން ދިޔަ ބޮޑެތި ހަމަނުޖެހުންތައް އުފެދިގެން ދިޔައީ، އިސްރާއީލާއި ފަލަސްތީނުގެ ރައްޔިތުން ދިރިއުޅެމުންދާ ސިޓީތަކުގައި ޔަހޫދީންނާއި ފަލަސްތީނު ރައްޔިތުންނާ ދެމެދު ހިގަންފެށި ހަމަނުޖެހުންތަކަށް ފަހުއެވެ.

އެހެންކަމުން، އިސްރާއީލުގެ ބޮޑުވަޒީރުކަމާ އަލަށް ހަވާލުވެވަޑައިގަންނަވާ ނަފްތާލީ ބެނެޓްގެ ބޮޑުވަޒީރުކަމުގައި، ފާއިތުވެދިޔަ ތަނުގައި އޭނާ ފަލަސްތީނާގުޅެގޮތުން ދައްކާފައިވާ ހަރުކަށިވާހަކަ ތަކުންނާއި، އަދި އޭނާ ނިސްބަތްވެފައިވާ ސިޔާސީ ހަރަކާތްތަކަށް ބަލާއިރު، އޭނާގެ ސިޔާސަތުތަކުގެ ތެރެއިން ފަލަސްތީނުގެ ރައްޔިތުންނަށް ކުރެވިދާނޭ މާބޮޑު އުއްމީދުތަކެއް އޮތްކަމަށް މަސްރަހު ދިރާސާކުރާ ފަރާތްތަކުން ގަބޫލެއް ނުކުރެއެވެ.