ޔޫރޯ ފުޓްބޯޅަ މުބާރާތައް ތައްޔާރުވުުމުގެ ގޮތުން މިހާރު ޔޫރަޕްގެ ޤައުމުތަކުން ކުޅެމުން އަންނަ އެކުވެރިކަމުގެ މެޗުތަކުގެ ތެރެއިން ފްރާންސް ކުޅުނު ފަހު މެޗުގައި ޖިރޫޑްގެ ލަނޑާއެކު ބަލްގޭރިއާގެ މައްޗަށް ކުރި ހޯދައިފިއެވެ.
މި މެޗު ފްރާންސުން ކާމިޔާބުކުރީ 0-3 ގެ ނަތީޖާއަކުންނެވެ. މި މެޗުގެ ކުރިން ފްރާންސް ވަނީ 0-3 ގެ ނަތީޖާއަކުން ވޭލްސްގެ މައްޗަށްވެސް ކުރި ހޯދާފައެވެ.
ފްރާންސް އާއި ބަލްގޭރިއާ ވާދަކުރި މެޗުގައި ފްރާންސުން ލީޑު ނެގީ ބާސެލޯނާއަށް ކުޅެމުން އަންނަ ފޯވާޑް އެންޓޮއިން ގްރީޒްމަން ޖެހި ހިތްގައިމު ގޯލުންނެވެ. އޯވަހެޑަކުން އޭނާ މި ލަނޑު ކާމިޔާބުކޮށްދިނީ 29 ވަނަ މިނެޓުގައެވެ. މެޗުގެ ފުރަތަމަ ހާފް ނިމުނީ ގްރީޒްމަން ކާމިޔާބުކޮށްދިން ލަނޑުން ފްރާންސް ކުރީގައި އޮވެގެންނެވެ.
މި މެޗުގައި ފްރާންސުން ޖެހި ފަހު ދެ ލަނޑު ކާމިޔާބުކޮށްފައިވަނީ މެޗުގެ ފަހު 10 މިނެޓުގެ ތެރޭގައި އޮލީވިއާ ޖިރޫޑްއެވެ. އެގޮތުން ފްރާންސްގެ ދެވަނަ ލަނޑު 83 ވަނަ މިނެޓުގައި ކާމިޔާބުކޮށްދިންއިރު، ތިންވަނަ ލަނޑު ޖިރޫޑް ޖެހީ 90 ވަނަ މިނެޓުގައެވެ.
ހުކުރު ދުވަހު ފަށާ ޔޫރޯ ފުޓްބޯޅަ މުބާރާތުގައި ފްރާންސް ލައްވާލާފައިވަނީ އެންމެ ވަރުގަދަ ގްރޫޕް ގައެވެ. އެގޮތުން ފްރާންސް ހިމެނޭ ގްރޫޕް އެފް ގައި ފްރާންސާއެކު ދެން ހިމެނޭ ޤައުމު ތަކަކީ، ޕޯޗުގަލް، ޖަރުމަނު އަދި ހަންގޭރީއެވެ.
ޔޫރޯގައި ފްރާންސް ކުޅޭ ފުރަތަމަ މެޗުގައި މިމަހުގެ 16 ވަނަ ދުވަހު ނުކުންނާނީ ޖަރުމަނާ ދެކޮޅަށެވެ.
ކޮމެންޓު ފޮނުވާ