ޔޫރޯ ފުޓްބޯޅަ މުބާރާތުގައި ސްޕެއިން ކުޅެން އޮތް ފުރަތަމަ މެޗަށް 8 ދުވަހަށް ވެފައިވަނިކޮށް އެ ޓީމުގެ ކެޕްޓަން އަދި މިޑްފީލްޑަރު ސާޖިއޯ ބުސްކެޓްސް ކޮވިޑް-19 އަށް ޕޮޒިޓިވްވެއްޖެއެވެ.
ބުސްކެޓްސް ޕޮޒިޓިވްވީ މާދަމާ ރޭ ސްޕެއިނުން ލިތުއޭނިއާއާ ދެކޮޅަށް ސްޕެއިން ކުޅެން އޮތް އެކުވެރިކަމުގެ މެޗުގެ ކުރިން ކުރި ޓެސްޓްތަކުންނެވެ. ބުސްކެޓްސް ޕޮޒިޓިވްވިއިރު، މި މަހު 14 ވަނަ ދުވަހު އެ ޓީމުން ސްވިޑެންއާ ދެކޮޅަށް ޔޫރޯގައި ކުޅޭ މެޗަށް މިހާރު މި އޮތީ ހަފްތާ އަކަށް ވެފައެވެ. އެ މެޗުގައި އޭނާ އަށް ކުޅެވުމުގެ ފުރުސަތު ވަރަށް ކުޑައެވެ. ބުސްކެޓްސް މިދިޔަ ބުރާސްފަތި ދުވަހުގެރޭ ވަނީ ސްޕެއިނާއި ޕޯޗުގަލް ލަނޑެއް ނުޖެހި އެއްވަރުވި މެޗުގައި ކުޅެފަ އެވެ.
އެ މެޗު ކުޅުމުގެ ކުރިން ހުރިހާ ކުޅުންތެރިން ކޮވިޑަށް ޓެސްޓްކުރިއިރު، ބުސްކެޓްސް ވަނީ ނެގެޓިވްވެފައެވެ. ސްޕެއިންގެ މުޅި ސްކޮޑުގެ ހުރިހާ މެމްބަރުން ޓެސްޓްކުރިއިރު، ޕޮޒިޓިވްވީ ބުސްކެޓްސް އެކަނިއެވެ. ބުސްކެޓްސް ޕޮޒިޓިވްވުމާ އެކު އޭނާގެ އިތުރުން ދެން ކޮންޓެކްޓްވި އެންމެން ވަނީ އެކަހެރި ކޮށްފައެވެ. މީޑިއާ ރިޕޯޓްތައް ބުނާގޮތުން ބުސްކެޓްސްއާ ކޮންޓެކްޓް ވެގެން ފަސް ކުޅުންތެރިއަކާއި ދެ އޮފިޝަލަކު ވަނީ އައިސޮލޭޓްކޮށްފައެވެ.
ބުސްކެޓްސް ޕޮޒިޓިވްވުމާ އެކު ސްޕެއިން ސީނިއާ ޓީމުގެ ބަދަލުގައި މާދަމާރޭ ލިތުއޭނިއާއާ ދެކޮޅަށް ކުޅޭނީ ސްޕެއިންގެ 21 އަހަރުން ދަށުގެ ޓީމެވެ.
ކޮމެންޓު ފޮނުވާ