ކޯވިޑް 19 އިން ރައްކާތެރި ވުމަށްޓަކައި ބޭނުންކުރަން ދުނިޔޭގައި އުފައްދާފައިވާ ވެކްސިންތަކުގެ ތަރެއިން އިތުރު 2 ބާވަތެއްގެ ވެކްސިން ރާއްޖޭގައި ބޭނުންކުރުމުގެ ހުއްދަ ފުޑް އެންޑް ޑްރަގް އޮތޯރިޓީން ދީފި އެވެ.
ރާއްޖޭގެ ފުޑް އެންޑް ޑްރަގް އޮތޯރިޓިން މިއަދު ބޭނުން ކުރަން ހުއްދަދީފައި ވަނީ މޮޑާނާ އަދި ޖެންސެން ވެކްސިނެވެ. މި ދެ ވެކްސިނަށްވެސް އަދި މިހާތަނަށް ހުއްދަ ދީފައި ވަނީ އެމަޖެންސީ ހާލަތުގައި އުމުރުން 18 އަހަރުން މަތީގެ މީހުންނަށް ޖެހުމަށެވެ.
އެފްޑީއޭއިން ބުނީ، މި ވެކްސިންތައް ބޭނުން ކުރުމުގެ ހުއްދަ ދީފައިވަނީ އެކަމުގައި ފުރިހަމަ ކުރަން ޖެހޭ އެންމެހާ ލިޔެކިޔުންތައް ފުރިހަކަ ކުރުމަށްފަހު ބަލަން ޖެހޭ ޓެކްނިކަލް ކަންކަން ފުރިހަމައަށް ބަލައި ދިރާސާކޮށް އަދި އޮތޯރިޓީއަށް ފަންނީ ލަފާދޭ ނޭޝަނަލް ފާރމަސޫޓިކަލް ބޯޑުގެ ލަފަޔާ މަޝްވަރާ އެކު ކަމަށެވެ.
ކޯވިޑުން ރައްކާތެރި ވުމަށް އުފައްދާފައިވާ ޖެންސެން ވެކްސިނަކީ އެމެރިކާގެ ޖޯންސަން އެންޑް ޖޯންސަން ކުންފުނީގެ ވެކްސިނެކެވެ. އަދި މޮޑާނާ ވެކްސިނަކީ ސްޕެއިންގެ މޮޑާނާ ކުންފުނީގެ ވެކްސިނެކެވެ.
މޮޑާނާ ވެކްސިނަކީ ދުނިޔޭގެ ސިއްހަތު ޖަމްއިއްޔާގެ އެމަޖެންސީ ޔޫސް ލިސްޓުގައި މިހާތަނަށް 49 ގައުމެއްގައި ކުއްލި ހާލަތުގައި ބޭނުން ކުރަމުން އަންނަ ވެކްސިނެވެ. އަދި ޖެންސެން ވެކްސިނަކީ 42 ގައުމެއްގައި ބޭނުން ކުރަމުން އަންނަ ވެކްސިނެކެވެ.
މި ދެ ވެކްސިނަށް ފުޑް އެންޑް ޑްރަގް އޮތޯރިޓީން ހުއްދަ ދިނުމާއެކު ރާއްޖޭގައި ކޯވިޑުން ރައްކާތެރިވުމަށް ބޭނުންކުރަން ޖުމްލަ 6 ވެކްސިނަކަށް ހުއްދަލިބުނީއެވެ. އެއީ މި ދެ ވެކްސިންގެ އިތުރުން ސްޕުޓްނިކް ވީ، ފާއިޒާ، ސިނޮފާމް އަދި ކޮވިޝީލްޑެވެ.
