ކޮވިޑް ވެކްސިން ޖަހަން ބެލްޖިއަމްގެ ކުޅުންތެރިން ދެކޮޅު ހަދައިފި

ޔޫރޯ ފުޓްބޯޅަ މުބާރާތުގެ ކުރިން، ކޮވިޑް-19 އިން ރައްކާތެރި ވުމަށް ޖަހާ ވެކްސިން ޖަހަން ބެލްޖިއަމްގެ ބައެއް ކުޅުންތެރިން ދެކޮޅު ހަދައިފި އެވެ.

ވެކްސިން ޖަހަން ސްކޮޑްގެ ދެބައިކުޅަ އެއްބައި ކުޅުންތެރިން ދެކޮޅު ހަދާ ކަމަށް މީޑީއާތަކުން ރިޕޯޓް ކުރި އެވެ. ވެކްސިން ޖަހަން ކުޅުންތެރިން ދެކޮޅު ހަދަނީ، ސައިޑް އިފެކްޓްގެ ސަބަބުން ކުޅުންތެރިންނަށް މިދަނޑިވަޅުގައި މެޗުތައް ގެއްލުމުގެ ފުރުސަތު އޮވެދާނެތީ އެވެ. ވެކްސިން ޖަހާ ކޮންމެ 10 މީހެއްގެ ތެރެއިން އެކަކަށް ސައިޑްއިފެކްޓް ކުރިމަތިވާކަމަށް ދިރާސާތަކުން ދައްކަ އެވެ. އެހެންވެ މުހިންމު މުބާރާތަކާ ކުރިމަތިލާއިރު މިވަގުތު ވެކްސިން ޖެހުން ރަނގަޅު ނުވާނެތީ ގިނަ ކުޅުންތެރިން މިވަގުތު ވެކްސިން ޖަހަން ދެކޮޅު ހަދަ އެވެ.

މިފަހަރުގެ ޔޫރޯ ކާމިޔާބު ކުރުމުގެ އަމާޒުގައި ޔޫރޯ އާ ކުރިމަތިލާ ބެލްޖިއަމްގެ އެފްއޭއިން ގަބޫލު ކުރާ ގޮތުގައި، މުބާރާތް ނިމެންދެން ކުޅުންތެރިން ފުރިހަމަ ސިއްހަތެއްގައި ތިބުމަކީ މުހިންމު ކަމެކެވެ. އެހެންވެ އެ ގައުމުގެ އެފްއޭއިން ވަނީ، ފައިޒާ ވެކްސިން ޖެހުމުގެ އިންތިޒާމު ކުޅުންތެރިންނަށް ހަމަޖައްސައިފަ އެވެ.

ވެކްސިން ޖަހަން އިންކާރު ނުކުރާ ކުޅުންތެރިގެ ތެރެއިން އެންމެ މަޝްހޫރު ކުޅުންތެރިޔަކީ ގޯލްކީޕަރު ކޯޓްއާ އެވެ. އޭނާގެ އިތުރުން ޓޮބީ އަލްޑާވީލްޑް، ޓިމޮތީ ކަސްޓޭން އަދި ތޯމަސް ވާމެލޮން ވަނީ ވެކްސިން ޖަހައިފަ އެވެ.