މެމްބަރުންކުރެ ހޭ ވެސް އަހާނުލައި މަޖިލީސް ތެރެއިން ކަންކަން ނިމިގެންދާ ވާހަކަ ނޫސްތަކުން އެބަ ފެންނަކަމަށް ރައްޔިތުންގެ މަޖިލީހުގެ މަރަދޫ ދާއިރާ އިބްރާހީމް ޝަރީފް (މަވޯޓާ) ވިދާޅުވެއްޖެ އެވެ.

ޝަރީފް މިއަދު ކުރެއްވި ޓްވީޓެއްގައި ވިދާޅުވީ މި ކަންކަން މިހެން ހިނގާތީ، ރައްޔިތުންގެ މަޖިލީހަކީ ކޮބައިކަން މިހާރު އޮޅިއްޖެ ކަމަށެވެ.

"އަޅުގަނޑުމެން މެމްބަރުން ކުރެން ހޭ ވެސް އަހާނުލައި ކަންކަން ނިމިގެންދާ ވާހަކަ ނޫސްތަކުން އެބަ ފެނޭ" – ޝަރީފް

Mihaaru Rayyithun ge Majlis akee kobaikan olhijje. Alhugamen memberun kuren hey ves ahaa nulaa kan kan nimigen dhaa vaahaka noos thakun eba feney.

— Ibrahim Shareef (@AdduShareef) June 5, 2021

ޝަރީފް މިހެން ވިދާޅުވެފައި މިވަނީ ރައްޔިތުންގެ މަޖިލީހިގެ ރައީސް އަވަހާރަކޮށްލަން ދިން ޓެރަރިސްޓް ހަމަލާއަށްފަހު އެމަނިކުފާނަށް އެމްއެންޑީއެފް އިން ފޯރުކޮށްދޭ ސެކިއުރިޓީ ބްރީޗުވިގޮތުގެ އިންކުއަރީއެއް މަޖިލީހުގެ ސަލާމަތީ ޚިދުމަތްތަކާއި ބެހޭ ކޮމިޓީން ހަދަމުންގެންދާ ދަނޑިވަޅެއްގަ އެވެ.

މަޖިލީހުގެ ސަލާމަތީ ޚިދުމަތްތަކާއި ބެހޭ ކޮމިޓީ ނުވަތަ 241 ކޮމިޓީން ހިންގަމުންގެނދާ މި ޕާލިމަންޓްރީ އިންކުއަރީއަށް ސަލާމަތީ ޚިދުމަތްތަކުގެ އިންޓެލިޖެންސް ނިޒާމާއި ގުޅޭ މަޢުލޫމާތު ސާފުކުރުމަށް މިއަދު ވަނީ ކޮމިޝަނަރ އޮފް ޕޮލިސް މުޙައްމަދު ހަމީދާއި ކައުންޓަ ޓެރަރިޒަމްގެ ޑިރެކްޓަރ ސުޕްރިންޓެންޑެންޓް އޮފް ޕޮލިސް ފަރީދު އިސްމާއީލްވެސް ވަކި ވަކީން ހާޒިރުކޮށްފަ އެވެ.

ފުލުހުން މަޖިލީހިގެ ކޮމިޓީއަށް ވަކިވަކީން ހާޒިރުވެފައި މިވަނީ އޭގެ ކުރިން ގައުމީ ސަލާމަތީ ބާރު އެމްއެންޑީއެފުން، ވަކިވަކި ސިފައިން މަޖިލީހަށް ޖަވާބުދާރީ ނުވާނެ ކަމަށާއި މުޅި ސިފައިންގެއިން އެކަމަށް އައްޔަންކުރާ ޓީމަކުން މަޖިލީހުގެ އިންކުއަރީއަށް ޖަވާބުދާރީ ވާނެކަމަށާއި އެއްބާރުލުން ދޭނެ ކަމަށް ސަލާމަތީ ބާރުން މަޖިލީހަށް އަންގާފައި ވަނިކޮށެވެ.

މިކަމާގުޅިގެން އެމްޑީޕީގެ ބައެއް މެމްބަރުން ހާއްސަކޮށް 241 ކޮމިޓީގައި ހިމެނިވަޑައިގަންނަވާ މެމްބަރުން ކަންބޮޑުވުން ފާޅުކުރައްވާފައި ވެއެވެ. ނަމަވެސް މަޖިލީހުގެ ބައެއް މެމްބަރުން ގެންދަވަނީ، މަޖިލީހަކީ ތަހުގީގު އިދާރާއެއް ނޫންކަމަށް ވިދާޅުވެ 241 ކޮމިޓީގެ މިމަަސައްކަތްތަކަށް ފާޑުވިދާޅުވަމުންނެވެ.

މިފަދަ ކަންތައްތަކެއް މަޖިލީހުގެ ތެރޭގައި ހިނގަމުން ދާއިރު މަޖީހުގެ އެތެރޭގައި ހިނގާކަންކަން މެމްބަރުންނަށް އެނގިވަޑައި ނުގަންނަވާފަދަ މޭރުމަކުން ވާހަކަ ދައްކަވާފައި ވާ މެމްބަރު ޝަރީފަކީ ފަހަކަށް އައިސް މަޖިލީހުގެ ރިޔާސަތަށް ހާއްސަކޮށް މަޖިލީހުގެ ރައީސް މުޙައްމަދު ނަޝީދަށް ފާޅުގައި ހަރުކަށި އިބާރާތުން ބަސްވިދާޅުވާ ބޭފުޅެކެވެ.