އިނގިރޭސި ކްލަބް ޗެލްސީއާއެކު ހަދާފައިވާ ކޮންޓްރެކްޓް ތޯމަސް ޓުޗެލް އާކޮށްފިއެވެ.
ޓުޗެލް ޗެލްސީ އާއެކު ހަދާފައިވާ ކޮންޓްރެކްޓް އާކޮށްފައިވަނީ އިތުރު ދެ އަހަރު ދުވަހުގެ ނިޔަލަށެވެ. އާ އެއްބަސްވުމާއެކު 2024 ގެ ޖޫންގެ ނިޔަލަށް ޗެލްސީގައި ޓުޗެލް މަޑުުކުރާނެއެވެ. މިދިޔަ އަހަރުގެ ޑިސެމްބަރު މަހު ޕީއެސްޖީގެ ކޯޗުކަމުން ވަކިކުރި ޓުޗެލް ޗެލްސީއާ ހަވާލުވީ 18 މަސް ދުވަހުގެ ކޮންޓުރެކްޓެއްގެ ދަށުންނެވެ.
ޗެލްސީގެ ކޯޗަކަށް ޓުޗެލް ހަމަޖެއްސީ އޭރު ޗެލްސީގައި ހުރި ކޯޗު ފްރޭންކް ލަމްޕާޑް މަގާމުން ދުރު ކުރުމަށްފަހުއެވެ. ލަމްޕާޑް ޗެލްސީގެ ކޯޗު ކަމުން ވަކިކުރީ މި ސީޒަނަށް ޗެލްސީން ބޮޑު ހަރަދުކޮށް ރަނގަޅު ނަތީޖާތަކެއް އޭރު ނުނެރެވުމުންނެވެ.
މީގެ ފަސް މަސް ކުރިން ޗެލްސީގެ ކޯޗު ކަމާއި ހަވާލުވި ޓުޗެލް ވަނީ މި ސީޒަނުގެ ޔުއެފާ ޗެމްޕިއަންސް ލީގުގެ ޗެމްޕިއަންކަން ޗެލްސީއަށް ހޯދައިދީފައެވެ. އަދި އިނގިރޭސި އެފްއޭ ކަޕުގެ ފައިނަލަށްވެސް ޓުޗެލްގެ ކޯޗުކަމުގެ ދަށުން ޗެލްސީ ދަތުރުކުރިއެވެ. މީގެ އިތުުރުން އިނގިރޭސި ޕްރިމިއާ ލީގުގެ ގަދަ ހަތަރެއްގައި ވެސް ޗެލްސީ ވަނީ ހިމެނިފައެވެ.
ކޮންޓްރެކްޓް އައުކުރުމަށްފަހު ޗެލްސީގެ ވެބްސައިޓާއި ވާހަކަ ދައްކަމުން ޓުޗެލް ބުނީ މިއީ ކޮންޓްރެކްޓް އައު ކުރަން އެންމެ މުނާސަބު ވަގުތު ކަމަށެވެ. ޗެލްސީއާއެކު ކުރަމުންދާ ތަޖުރިބާތަކަށް ޝުކުރުވެރިވާ ކަމަށާއި އަދިވެސް ހޯދަން ހުރި ކާމިބުތައް ގިނަ ކަމަށް ބުނެ ޓުޗެލްވަނީ އަންނަ ސީޒަނަށް ތައްޔާރުވުމަށް މިހާރު ވެސް މަސައްކަތް ފަށާފައިވާ ކަމަށް ހާމަކޮށްފައެވެ.
ކޮމެންޓު ފޮނުވާ