އިނގިރޭސި ޒުވާން ފުލްބެކް ޓްރެޓް އަލެކްސަންޑަ-އާނޯލްޑަށް އަނިޔާގެ ސަބަބުން، އަންނަ ހަފްތާގައި ފަށާ ޔޫރޯ ފުޓްބޯޅަ މުބާރާތުން ފުރުސަތު ގެއްލިއްޖެ އެވެ.
މި ފަހަރުގެ ޔޫރޯ ސްކޮޑުން އާނޯލްޑަށް ޖާގަ ލިބުނީ އޭނާ އަށް ޓީމުން ފުރުސަތެއް ނެތް ކަމަށް ބުނެ އިނގިރޭސި މީޑިއާގައި ވަރަށް ބޮޑަށް އަޑުފެތުރިފައިވަނިކޮށެވެ. އެއީ މާޗް މަހު ވޯލްޑް ކަޕް ކޮލިފައިން އަށް ނެގި އިނގިރޭސި ސްކޮޑުން އާނޯލްޑަށް ފުރުސަތު ނުދޭތީ އެވެ.
އާނޯލްޑަށް އަނިޔާވީ މިދިޔަ ބުދަ ދުވަހުގެރޭ އިންގްލެންޑުން 1-0 އިން އޮސްޓްރިއާ ބަލިކުރި މެޗުގެ ފަހު ވަގުތުގަ އެވެ. އާނޯލްޑްގެ ފަލަމަސްގަނޑަށް ލިބުނު އަނިޔާއިން ރަނގަޅުވެ އޭނާ އަށް އަލުން ކުޅުމުގެ ތެރެއަށް އާދެވޭނީ ހަ ހަފްތާ ފަހުންނެވެ.
އާނޯލްޑްގެ ބަދަލުގައި ކުޅުންތެރިއަކު ނަގާނީ އެންމެ ފުރަތަމަ ނެގި 33 ކުޅުންތެރިންގެ ސްކޮޑުން ބާކީ ކުރި ހަތް ކުޅުންތެރިންގެ ތެރެއިންނެވެ. އޭރު ސްކޮޑުން ބާކީކުރީ މެންޗެސްޓާ ޔުނައިޓެޑްގެ ޒުވާން ފޯވާޑް މޭސަން ގްރީންވުޑާއި ވެސްޓް ހޭމް ޔުނައިޓެޑްގައި މޮޅު ކުޅުމެއް ދެއްކި ޖެސީ ލިންގާޑާއި ޝެފީލްޑް ޔުނައިޓެޑްގެ ކީޕަރު އާރޮން ރާމްސްޑޭލް، ބްރައިޓަންގެ ބެން ވައިޓް، އެވަޓަންގެ ބެން ގޮޑްފްރޭ، ސައުތެމްޓަންގެ ކެޕްޓަން ޖޭމްސް ވާޑް-ޕްރައުސް އަދި އެސްޓަން ވިލާގެ އޮލީ ވަޓްކިންސް އެވެ.
