ޔޫރޯ ފުޓްބޯޅަ މުބާރާތަށް ތައްޔާރުވުމުގެ ގޮތުން ބުރާސްފަތި ދުވަހުގެރޭ ކުޅުނު ބައިނަލްއަގުވާމީ އެކުވެރިކަމުގެ މެޗުގައި ގްރީސްއިން ދުނިޔޭގެ ރޭންކިންގެ އެއްވަނައިގައި އޮތް ބެލްޖިއަމް ހިފަހައްޓައިފި އެވެ.
ބެލްޖިއަމުގައި ކުޅުނު މި މެޗު އެއްވަރުވީ 1-1 ލަނޑުންނެވެ. މި މެޗުގައި އެންމެ ފުރަތަމަ ލަނޑު ޖަހާ ލީޑު ނަގާފައިވަނީ ބެލްޖިއަމުންނެވެ. މެޗުގެ 20 ވަނަ މިނެޓުގައި މި ލަނޑު އެ ގައުމަށް ކާމިޔާބުކޮށްދިނީ ތޯގަން ހަޒާޑްއެވެ. އޭގެ ފަހުން ގްރީސްއިން ބެލްޖިއަމުގެ ގޯލަށް ނުރައްކާކުރިއިރު، އެ ޓީމުން ނަތީޖާ އެއްވަރުކޮށްފައިވަނީ ދެވަނަ ހާފުގައެވެ.
މެޗުގެ 66 ވަނަ މިނިޓުގައި މި ލަނޑު އެ ގައުމަށް ކާމިޔާބުކޮށްދިނީ ޖެއޯޖިއޮސް ޒަވޭލަސްއެވެ. މި މެޗުގައި ގްރީސްއިން ވަރުގަދަ ބެލްޖިއަމާ އެއްވަރުކުރިއިރު، މި ފަހަރުގެ ޔޫރޯއަށް ގްރީސް ކޮލިފައިވެފައެއް ނުވެއެވެ. މި ފަހަރުގެ ޔޫރޯގައި ބެލްޖިއަމް ހިމެނެނީ ގްރޫޕް ބީ ގައެވެ. އެ ގްރޫޕުގައި ދެން ހިމެނޭ ގައުމުތަކަކީ ޑެންމާކް، ފިންލެންޑް އަދި ރަޝިއާއެވެ.
ގުރޫޕްގެ ގެ ފުރަތަމަ މެޗުގައި ޑެންމާކާ ދެކޮޅަ ނުކުތުމުގެ ކުރިން އާދިއްތަ ދުވަހުގެރޭ އެކުވެރިކަމުގެ ފަހު މެޗުގައި ބެލްޖިއަމް ނުކުންނާނީ ކޮރޭޝިޔާ ދެކޮޅަށެވެ.
