އަންނަ ޖުލައިމަހު ޖަޕާނުގައި ފެށުމަށް ހަމަޖެހިފައިވާ އޮލިމްޕޮކް މުބާރާތް ފަސްކުރެވޭނެ އެއްވެސް ޖާގައެއް ނެތްކަމަށް ޖަޕާންގެ އޮލިމްޕިކް އޯގަނިޒޭޝަން ކޮމިޓީގެ ވެރިޔާ ބުރާސްފަތު ދުވަހު ވިދާޅުވެއްޖެއެވެ.
ޖަޕާންގެ އޮލިމްޕިކް އޯގަނިޒޭޝަން ކޮމިޓީގެ ވެރިޔާ މިގޮތަށް ވިދާޅުވެފައިވަނީ، ޖަޕާނަށް މިހާރު އަންނަމުންދާ ކޯވިޑް19ގެ ރާޅާއެކުވެސް، އޮލިމްޕިކްސް ކުޅިވަރު މުބާރާތުގައި ބައިވެރިވުމަށް މިހާރު ޖަޕާނަށް އެތެރެވަމުންދާ އެތައްހާސް އެތުލީޓުންނާއި އޮފިޝަލުންގެ ކަންބޮޑުވުންތައް އިންތިހާއަށް ބޮޑުވެފައި ވަނިކޮށެވެ.
އަންނަ ޖުލައިމަހު 23 ވަނަ ދުވަހު ފެށުމަށް ހަމަޖެހިފައިވާ އޮލިމްޕިކްސް ކުޅިވަރު މުބާރާތް އެންމެ ފުރަތަމަ ފެށުމަށް ހަމަޖެހިގެން ދިޔައީ ފާއިތުވި އަހަރުއެވެ. އެހެންނަމަވެސް، މުޅި ދުނިޔެއަށް ފެތުރެންފެށި ކޯވިޑް19 ކާރިސާއާއި ގުޅިގެން އެއަހަރު މިމުބާރާތް ބޭއްވޭގޮތް ނުވެ، މިއަހަރަށް ލަސްކުރަން މަޖުބޫރުވިއެވެ. އަދި މުބާރާތް ލަސްކުރުމުގެ ސަބަބުން، 3.5 ބިލިއަން އެމެރިކާ ޑޮލަރުގެ މާލީ ގެއްލުން މިހާތަނަށް ވަނީ ލިބިަފއެވެ.
އަދި، ކޯވިޑް ކާރިސާގެ ހާލަތު ޖަޕާނުގައިވެސް ރަގަޅުވެފައި ނުވާތީ، މިއަހަރު މިމުބާރާތް ބޭއްވުމަށް މިހާރު ހަމަޖެހިފައިވަނީ، ކުރިން ބޭއްވުމަށް މަސައްކަތް ކުރެވެމުން އައި މިންވަރަށްވުރެ ސައިޒުން ކުޑަކޮށް، އަދި ޖަޕާނުން ބޭރުގެ އެއްވެސް ބަޔަކަށް މުބާރާތް ބެލުމަށް އައުމުގެ ފުރުސަތުވެސް ނުދީއެވެ.
އެހެންނަމަވެސް، ޖަޕާނުގައި ކޯވިޑް ވެކްސިން ދިނުމުގެ ސްޕީޑް އާދަޔާ ޚިލާފަށް ލަސްވުމާއި، އަދި ވެރިރަށް ޓޯކިޔޯ ހިމެނޭގޮތުން އިތުރު 9 ސަރަހައްދެއްގައިވެސް ސިއްހީ ކުއްލި ނުރައްކަލުގެ ހާލަތު އިއުލާކޮށްފައި ވަނިކޮށް، އަދި މީގެ އިތުރުން ޖަޕާނުގައިވެސް ކޯވިޑް19ގައި ބަލިވާ މީހުންގެ އަދަދު އެއްދުވަހުން އަނެއްދުވަހަށް މަތިވަމުން ދަނިކޮށް މި މުބާރާތް ޖަޕާނުގައި ބޭއްވުމާއި، ޖަޕާނުގެ ގިނަ އަދަދެއްގެ ރައްޔިތުންވެސް ދަނީ ދެކޮޅު ހަދަމުންނެވެ.
7 ފަހަރެއްގެމަތިން، ހޫނު މޫސުމްގެ އަދި ފިނި މޫސުމްގެ އޮލިމްޕިކްސް މުބާރާތުގައި ސައިކްލިސްޓް އަދި ސްކޭޓަރއެއްގެ ގޮތުން ވާދަކޮށްފައިވާ، ޖަޕާން އޮލިމްޕިކް ކޮމިޓީގެ ރައީސް ސެއިކޯ ހަޝިމޯޓޯ ބުނެފައިވަނީ، މި މުބާރާތާމެދު ޖަޕާންގެ ރައްޔިތުންގެ ކަންބޮޑުވުން އިންތިހާއަށް އޮތްކަމަށް އޭނާވެސް ގަބޫލުކުރައްވާ ކަމުގައެވެ. އެހެންނަމަވެސް، އެ ރައްޔިތުންނަށްވެސް، މުބާރާތް ބޭއްވުމަށް ރައްކާތެރިކަމުގެ ހުރިހާ ފިޔަވަޅެއް (ބަބްލް ސޓުުއޭޝަންއެއް) އެއް އެޅިފައިވާ ކަމުގެ ފުރިހަމަ ޔަގީންކަން ދޭކަމުގައެވެ.
ޖަޕާނުގެ ބޮޑުވަޒީރު ޔޮޝިހިޑޯ ސުގާވެސް ވަނީ، ކާމިޔާބުކަމާ އަދި ރައްކާތެރިކަމާއެކު، މި މުބާރާތް ބޭއްވޭނެކަމުގެ ޔަގީންކަން ދީފައެވެ.
