ފާއިތުވެދިޔަ މޭމަހު، އިސްރާއީލުގެ އަސްކަރިއްޔާއިން ގާޒާއަށް ދިން އުދުވާނީ ހަމަލާތަކަށްފަހު، ހިފާފައިވާ ބިންތަކުގައި ދިރިއުޅެމުންދާ ފަލަސްތީނުގެ 200،000 ރައްޔިތުންނަށް މިހާރުން މިހާރަށް ފޯރުކޮށްދޭންޖެހޭ ސިއްޙީ އެހީތެރިކަން ބޭނުންވެފައިވާ ކަމަށް ދުނިޔޭގެ ސިއްޙަތު ޖަމިއްޔާ، ޑަބްލިއުއެޗްއޯއިން ބުނެފިއެވެ.
"ޑަބްލިއުއެޗްއޯއިން މިހާރުވެސް ގެންދަނީ، ފަލަސްތީނުގެ ހިފާފައިވާ ބިންތަކުގައި ދިރިއުޅޭ، 200،000 އަށްވުރެ ގިނަ ރައްޔިތުންނަށް ބޭނުންވާ ސިއްޙީ އެހީތެރިކަން ފޯރުކޮށްދެވޭތޯ މަސައްކަތްކުރަމުން،" ޑަބްލިއުއެޗްއޯގެ އީސްޓަރން މެޑިޓެރޭނިއަން ރީޖަނަލް އޮފީހުން ނެރުނު ބަޔާނެއްގައި ބުނެފައި ވެއެވެ.
"ހާލަތު އޮތީ އަދިވެސް ވަރަށް ނާޒުކު ފައްތަރެއްގައި. މިއީ ޑަބްލިއުއެޗްއޯއިން ވަރަށް ބޮޑަށް ކަންބޮޑުވާ ކަމެއް.. އަދި އިންސާނީ އެހީތެރިކަމާ ގުޅުންހުރި، އަދި ތަރައްގީއާއި ގުޅުންހުރި އެންމެ އަސާސީ ވަސީލަތްތައް މެދު ނުކެޑި ފޯރުކޮށްދެވޭ މަގު ފަހިކުރުމަށްވެސް ގޮވާލަން. އަދި ހަމައެފަދައިން ބަލިމީހުން ބޭނުންވާ ހާލަތްތަކުގައި ގާޒާއިން ބޭރަށް ގެންދެވޭނެ މަގު ފަހިކޮށްދިނުމަށްވެސް ގޮވާލަން،" ޑަބްލިއުއެޗްއޯގެ ރިކް ޕީޕަރކޯން ވިދާޅުވެފައިވެއެވެ.
ފާއިތުވެދިޔަ މަހު، އިސްރާއީލު ސިފައިން މަސްޖިދުން އަގްސާއަށް ހަމަލާ ދިނުމާއި ގުޅިގެން އުފެދުނު ހަމަ ނުޖެހުންތަކުގައި، އިސްރާއީލުން ގާޒާއަށް މެދުނުކެޑި 11 ދުވަސް ވަންދެން ދިން އަސްކަރީ ވަރުގަދަ ހަމަލާތަކާއި ގުޅިގެން ގާޒާއަށް އުމުރާނީގޮތުން ބޮޑެތި ގެއްލުންތަކެއް ލިބި، ފަލަސްތީނުގެ 240 މީހަކުވަނީ ޝަހީދުވެފައެވެ.
މި ހަމަލާތަކުގެ ރައްދުގައި ހަމާސް ޖަމާއަތުން އިސްރާއީލަށް ދިން ރޮކެޓް ހަމަލާތަކުގައި އިސްރާއީލުގެ 12 މީހަކު މަރުވިއެވެ. މީގެ ތެރޭގައި 1 ކުޑަ ކުއްޖަކާއި، އިސްރާއީލުގެ ސިފައިންގެ މީހަކު ހިމެނެއެވެ.
ގާޒާގެ ހާލަތާއި ގުޅޭގޮތުންޑަބްލިއުއެޗްއޯއިން ނެރުނު ބަޔާނުގައި ބުނެފައިވަނީ، އިސްރާއީލުން ދިން ހަމަލާތަކުގެ ސަބަބުން ގާޒާގެ 77،000 މީހުންގެ ގެދޮރު ނެތިފަައި ވާކަމަށާއި އަދި ސިއްޙީ ފަރުވާދޭ 30 ތަނަކަށް ބޮޑެތި ގެއްލުންތަކެއް ލިބިފައިވާ ކަމަށެވެ.
2007 ވަނަ އަހަރު ގާޒާ ހަމާސްގެ ބާރުގެ ދަށަށް ދިއުމާއެކު އިސްރާއީލުންވަނީ، ގާޒާ އެއްގަމާއި ކަޑުގެ މަގުން ހިސާރުކޮށް ބަންދު ކޮށްފައެވެ. ގާޒާއަކީ، ފަލަސްތީނުގެ 2 މިލިއަން ރައްޔިތުން ދިރިއުޅެމުންދާ ސިޓީއެކެވެ. އަދި މިއީ މިހާރު މުޅި ދުނިޔޭގައިވެސް، މީހުން އެންމެ ބޮޑަށް ތޮށްޖެހިފައި އޮތް އެއް ސިޓީވެސް މެއެވެ.
ގާޒާއިން ބޭރަށް މީހުންނަށް ދެވެން އޮންނަ ހަމަ އެކަނި މަގަކީ، ވަރަށް ބޮޑަށް ސަލާ،މަތީ ފިޔަވަޅުތައް ވަރުގަދަ ކޮށްފައި އޮންނަ، މިސްރުން ބަލަހައްޓަކުންދާ ރަފާ ބޯޑަރެވެ. ގާޒާގެ ވަށައިގެންވާ ސަރަހައްދުތަކުގެ ތެރެއިން، އިސްރާއީލުގެ ބާރުގެ ދަށުގައި ނޯންނަ ހަމައެކަނި ސަރަހައްދަކީ މިއީއެވެ.
