މި މަހުގެ ކުރީކޮޅު އިސްރާއީލުން ގާޒާއާއި ދެކޮޅަށް ހިންގި އުދުވާންގައި، ގާޒާއަށް ދީފައިވާ ހަމަލާތަކަކީ، ހަގުރާމައިގެ ޖަރީރާމާތަކުގެ ގޮތުގައި ބެލެވިދާނެކަމަށް، ޔޫއެންގެ އިންސާނީ ހައްގުތަކާބެހޭ އިސްވެރިޔާ މިޝޭލް ބަޗެލެޓް ބުރާސްފަތި ދުވަހު ވިދާޅު ވެއްޖެއެވެ. އޭނާ ވިދާޅުވިގޮތުގައި ހަމާސްއިންވެސް އިސްރާއީލަށް ދީފައިވާ ރޮކެޓް ހަމަލާތަޖަކަކީ އިންސާނީ ހައްގުތަކާބެހޭ ބައިނަލް އަގުވާމީ ގާނޫނުތަކާ ޚިލާފަށް ދީފައިވާ ހަމަލާތަކެއް ކަމަށެވެ.
ބަޗެލެޓް ވިދާޅުވި ގޮތުގައި، އޭނާގެ އޮފީހުން މިހާރުވަނީ، އިސްރާއީލުން ގާޒާއަށާއި، ވެސްޓް ބޭންކު އަދި އިރުމަތީ ޖެރޫސެލަމްއަށް ދިން ހަމަލާތަކުގައި މަރުވެފައިވާ ފަލަސްތީނުގެ 270 މީހުންގެ ވަނަވަރު މިހާރު ފުރިހަމަޔަށް ދިރާސާ ކޮށްފައެވެ. މީގެތެރޭގައި 68 ކުޑަކުދިންވެސް ހިމެނެއެވެ. އިސްރާއީލުން މެދުނުކެޑި 11 ދުވަސްވަންދެން ދިން މިހަމަލާތަކުގައި ގިނައީ ގާޒާގައި ޝަހީދުވި މީހުންނެވެ.
ހަމާސްއިން އިސްރާއީލަށް ދިން ރޮކެޓް ހަމަލާތަކުގައި އިސްރާއީލުގެ 10 މީހަކު މަރުވެފައި ވެއެވެ.
ޔޫއެންގެ އިންސާނީ ހައްގުތަކާބެހޭ އިސްވެރިޔާ މިޝޭލް ބަޗެލެޓް މިމޭރުމުން ވާހަކަ ދައްކާފައިވަނީ، އިސްލާމީ ގައުމުތަކުގެ އެދުމުގެމަތިން ބޭއްވުނު ޔޫއެން ހިއުމަން ރައިޓްސް ކައުންސިލްގެ ޚާއްސަ ސެޝަންއެއްގައެވެ. އިސްލާމީ ގައުމުތަކުން މި ފޯރަމްގައި އެދިފައިވަނީ މި ހަގުރާމާގައި ހިންގާފައިވާ އިންސާނީ ހައްގުތަކާ ޚިލާފް ޖަރީމާތައް ތަހުގީގު ކުރުމަށް އިންކުއަރީ ކޮމިޝަނެއް އެކުލަވާ ލުމަށެވެ.
އިސްރާއީލާ ފަލަސްތީނާ ދެމެދު ހަމަނުޖެހުންތައް ފެށިފައިވަނީ، 1967ގެ ހަގުރާމާގައި އިސްރާއީލުން ހިފާފައިވާ އިރުމަތީ ޖެރޫސެލަމްގެ ޝެއިޚް ޖައްރާއިން ފަލަސްތީނު ރައްޔިތުން ބޭރުކުރުމުގެ މަސައްކަތް އިސްރާއީލުން ފެށުމާއި ގުޅިގެންނެވެ. މިގޮތުން ހަމަނުޖެހުން ހިގާފައިވާ ސަރަހައްދުތަކުގެ ތެރޭގައި، ޝެއިޚް ޖައްރާއާއި، އަރަބި-އިސްރައީލު މީހުން ދިރިއުޅެމުންދާ އަވަށެއް ކަމުގައިވާ ހައިފާވެސް ހިމެނެއެވެ.
ހަމާސްއިން އިސްރާއީލަށް އަމާޒުކޮށް ރޮކެޓް ހަމަލާތައް ދީފައިވަނީ، މިމަހުގެ ކުރީކޮޅޔ އަލް-އަގްސާ މިސްކިތުގައި ހިގަމުންދިޔަ ހަމަނުޖެހުންތަކަށްފަހު، އިސްރާއީލުގެ ސެކިއުރިޓީ ފޯސްތަކުން އަލް-އަގުސާ މިސްކިތް ދޫކޮށް ދިއުމަށް، ގާޒާގައި ވެރިކަން ކުރަމުންދާ ހަމާސްގެ އިސްވެރިން އިސްރާއިލަށް ދިން މުހުލަތު ފާއިތުވެގެން ދިއުމަށް ފަހުއެވެ.
