މުޅި ޔޫރަޕް ބައްރު އެއްކޮށް، ކޯވިޑް19އިން ދިފާއުކޮށް ދިނުމަށް ބޭނުންވާ 1 ބިލިއަން ޑޯޒްގެ ވެކްސިން މިއަހަރުގެ ސެޕްޓެމްބަރުގެ ނިޔަލަށް ލިބޭނަކަމަށް އެ ޔޫނިއަންއިން ތައްޔާރުކޮށްފައިވާ، އެ އީޔޫގެ ލީޑަރުންނަށް އަންގާރަ ދުވަހު ހުށަހެޅުމަށް ތައްޔާރު ކޮށްފައިވާ ބައެއް ޑޮކިއުމަންޓްތަކުން ދައްކައިފިއެވެ.
ޔޫރަޕިއަން ކޮމިޝަންއިން ތައްޔާރުކޮށްފައިވާ، ރޮއިޓާރސްއަށް ލިބިފައިވާ ޑޮކިއުމަންޓްތަކުން ދައްކާ ގޮތުގައި، މުޅި ޔޫރަޕްގެ އާބާދީއަށް ކޯވިޑް19އިން ރައްކާތެރިކަން ފޯރުކޮށްދެވޭ ވަރަށް ވެކްސިން، އަންނަ ސެޕްޓެމްބަރު މަހުގެ ނިޔަލަށް، ވެކްސިން އުފައްދާ ކުންފުނިތަކުން ލިބިގެން ދާނެއެވެ.
މިއީ ޔޫރަޕިއަން އިއްތިހާދުން، އަންނަ ހޫނު މޫސުން ނިމުމުގެ ކުރިން އިއްތިހާދުގެ މުޅި އާބާދީގެ ބޮދެތި މީހުންގެ %70އަށް ކޯވިޑުން ރައްކަތެރިކަން ފޯރުކޮށް ދިނުމަށް ކަނޑައަޅާފައިވާ އަމާޒަށްވުރެ ކުރިން ހާސިލް ކުރެވިގެންދާ ލަނޑުދަޑިއެކެވެ.
އީޔޫއިން އުއްމީދު ކުރަނީ، މިއަހަރުގެ ދެވަނަ ކުއާޓަރުގައި 413 މިލިއަން ޑޯޒްގެ ވެކްސިން ލިބިގެން ދާނެކަމަށެވެ. އަދި 529 މިލިއަން ޑޯޒްގެ ވެކްސިން މިއަހަރުގެ ޖުލައިމަހާއި ސެޕްޓެމްބަރު މަހުގެ ތެރޭގައި ލިބިގެންދާނެ ކަމަށެވެ. އީޔުއަށް ވަނީ، 106 މިލިއަން ޑޯޒްގެ ވެކްސިން މިއަހަރުގެ ފުރަތަމަ ކުއާޓަރުގެ ތެރޭގައި ލިބިފައެވެ.
މިއަހަރު ނިމިގެންދާއިރު، އިތުރު 452 މިލިަން ޑޯޒުގެ ވެކްސިން ލިބޭނެކަމަށް އެ އިއްތިހާދުން އުންމީދު ކުރާއިރު، މިއަހަރު ނިމޭއިރު، ޖުމްލަ 1.5 ބިލިއަން ޑޮޒްގެ ވެކްސިން ޔޫރަޕިއަން އިއްތިހާދަށް ލިބިގެންދަނެ ކަމަށް އެއިއްތިހާދުން އަންދާޒާ ކުރެއެވެ.
މިވެކްސިންތައް އީޔުއަށް ފޯރުކޮށްދިނުމަށް ހަމަޖެހިފައިވަނީ ފައިޒް ބައޯއެންޓެކް އިންނާއި، ޖޯންސަން އެންޑް ޖޯންސަން އިންނާއި އެސްޓްރާޒެނެކާ އަދި މޮޑާނާއިންނެވެ.
މީގެތެރޭގައި، ޖަރުމަނުގެ ބައޯޓެކް ފާރމް ކިއޯވެކް އިންނާއި އަދި ފްރާންސްގެ ބޭސް އުފައްދާ ކުންފުނި ސަނޯފީއިން ޔޫރަޕަށް ފޯރުކޮށް ދިނުމަށް މިހާރުވެސް އެއްބަސްވުމުގައި ސޮއިކޮށްފައިވާ އެތައް ސަތޭކަ މިލިއަން ޑޯޒްގެ ވެކްސިން ނުހިމެނެއެވެ. މިކުންފުނިތަކުން އަދި ދަނީ، އެމީހުން އުފައްދާފައިވާ ވެކްސިންތަކަށް އީޔޫގެ ކަމާގުޅޭ މުވައްސަސާތަކުން ހުއްދަ ހޯދުމަށް މަސައްކަތް ކުރަމުންނެވެ.
އީޔުއިން ބުނެފައިވަނީ، އެ ބައްރުގައި ނުހިމެނޭ، ދުނިޔޭގެ ފަގީރު ގައުމުތަކަށް، މިއަހަރު 100 މިލިއަން ވެކްސިން ޑޯޒު އެއިއްތިހާދުން ފޯރުކޮށްދިނުމަށްވެސް ހަމަޖެހިފައި ވާކަމަށެވެ.
